ليه بطولة إفريقيا لليد برواندا مهمة لمنتخب مصر؟
منتخب مصر داخل على تحدي جديد إفريقي بس المرة دي في كرة اليد .. هيشارك في بطولة أمم إفريقيا لليد 2026 برواندا وده مش مجرد حدث قاري عادي لكن محطة مهمة جدًا في تاريخ كرة اليد في القارة.. النسخة دي فيها 16 منتخب من شمال وجنوب وشرق وغرب إفريقيا والمنافسة السنة دي مختلفة من كل النواحي.
ويمكن من أكتر الحاجات اللي هتميز النسخة دي هي إنها بتلعب دور مهم وهو إنها هتساعد في التصفيات المباشرة لبطولة العالم 2027 بألمانيا.. وده معناه إن أحسن 5 منتخبات في أمم إفريقيا هيشاركوا في مونديال اليد.
مجموعات البطولة
والمنتخبات المشاركة في بطولة إفريقيا على رأسهم مصر وتونس والجزائر أكتر تلاتة واخدين البطولة.. وتونس هي الأكتر بـ 10 بطولات ووراها مصر بـ 9 بطولات وبعدهم منتخب الجزائر بـ 7 بطولات.
والمجموعة الأولى ضمّت الجزائر ونيجيريا ورواندا وزامبيا والمجموعة التانية فيها مصر وأنجولا والجابون وأوغندا.. أما المجموعة التالتة فيها تونس وغينيا والكاميرون وكينيا.. والمجموعة الرابعة فيها المغرب والرأس الأخضر والكونغو وبنين.
مباريات مصر
هيبدأ منتخب مصر مشواره في البطولة يوم 21 يناير بمواجهة الجابون الساعة 12:30 ظهرًا.. وبعده ماتش ضد أنجولا يوم 22 الساعة 5 مساءً ثم هنلاعب أوغندا 24 يناير الساعة مساءً.
نظام البطولة
والبطولة بتتكون من 4 مجموعات في الدور الأول ويتأهل أول اتنين في كل مجموعة للدور الثاني وبعدها يبقى في دور ربع نهائي ونصف نهائي وأخيرًا النهائي.
حلم “العاشرة”
منتخب مصر بيلعب البطولة دي وهو بطل النسخة اللي فاتت اللي اتلعبت في مصر وهو بطل آخر 3 نسخ للبطولة.. ومكتسح إفريقيا بقاله فترة كبيرة لكن عينه على النجمة العاشرة عشان يعادل تونس في البطولات كلها.
ولو ده حصل هيكون كمان منتخب مصر هيكون تاني منتخب في تاريخ القارة يحقق البطولة 4 مرات على التوالي بعد الجزائر اللي فاز باللقب خمس مرات على التوالي من 1981 لحد 1989.
القائمة فيها مين؟
قائمة منتخب مصر لبطولة أمم إفريقيا بضم: حراسة المرمى: محمد علي – محمد عصام الطيار – عبدالرحمن حميد، الجناح الأيمن: أكرم يسري – محمد أوكا، الجناح الأيسر: أحمد هشام سيسا – محمد مؤمن صفا، الظهير الأيمن: يحيى خالد – مهاب سعيد، الظهير الأيسر: علي زين – أحمد هشام دودو – نبيل شريف – هشام صلاح، الدائرة: إبراهيم المصري – أحمد عادل – ياسر سيف – محمود عبدالعزيز جدو، صانع الألعاب: يحيى الدرع – سيف الدرع.
ولأسباب فنية وإصابات بيغيب 5 لاعبين مهمين في صفوف مصر وهما كريم هنداوي (حارس مرمى) ومحمد سند (جناح أيمن) وأحمد خيري (صانع ألعاب) وحسن وليد قداح (ظهير أيسر) وعبد الرحمن فيصل (ظهير أيمن).
كوتش خبرة
مصر داخلة البطولة بالمدير الفني المخضرم الإسباني خافي باسكوال اللي اتولى المهمة في يونيو 2025 وهو مدرب خبراته كبيرة وبيسعى يحقق البطولة عشان تنضم لدولاب بطولات كبيرة ليه.
واتجه للتدريب وبدأ في برشلونة وبقى المدير الفني للفريق سنة 2009 مع برشلونة حقق إنجازات جامدة جدًا زي 11 لقب دوري إسباني و 10 كؤوس إسبانيا و11 كأس ASOBAL وكمان 3 ألقاب دوري أبطال أوروبا.
وبعد ما ساب برشلونة في 2021 درب فريق دينامو بوخارست في رومانيا وفاز معاهم بالدوري والرابطة وكؤوس كتير وكمان درب منتخب رومانيا لفترتين.
وفي 2024 اتفق مع نادي فيزبريم المجري لتدريب الفريق المجري وبعدها في يونيو 2025 أعلن الاتحاد المصري لكرة اليد تعيينه مدرب لمنتخب مصر عشان يحضّر الفريق لأمم إفريقيا 2026 وبطولة العالم 2027 وعقده مستمر لحد أولمبياد لوس أنجلوس 2028.
وفي النهاية بتأمل طبعًا الجماهير المصرية إن منتخب اليد يحقق البطولة دي عشان هتفرق في حاجات كتيرة زي ما قولنا سواء لبطولة العالم أو عشان نحقق “العاشرة” وأهو تبقى اليد بتصالحنا عن اللي حصل فينا من منتخب الكورة في بطولة أمم أفريقيا.
