إيه هي إنفلونزا الرجال “Men flue” وهل هي حقيقة بيولوجية ولا مجرد مبالغة؟
فترة الشتاء دور البرد مش راحم حد وبيلف على الكل.. وعلى السوشيال ميديا بيكون فيه خناقة عن إن الرجالة بتبالغ في تعبها من مجرد إنفلونزا وبتبدأ تكلم محامي عشان تكتب وصيتها عكس الستات اللي ممكن الدكتور يطلب منها راحة تامة بس تقوم تروق الشقة كلها وتنزل شغلها.. واختلفت الآراء بين هل إنفلونزا الرجالة حقيقة بيولوجية فعلًا ولا مجرد مبالغة منهم لرغبتهم في الاهتمام.. كمل الموضوع وهتعرف!
يعني إيه “انفلونزا الرجال – Man flue”؟
المصطلح ده أُدرج في قاموس أكسفورد وكامبريدج وهو خلل فطري عند الرجالة لما بيجيلهم نزلة برد.. وبيبالغوا في شدة أعراض النزلة وبيعتمدوا على اللي حواليهم كتير عشان يساعدوهم في كل حاجة
المجلة الطبية البريطانية سنة 2017 نشرت تقرير بيتكلم عن إن فيه فروقات هرمونية بين الستات والرجالة بتزيد من شدة أعراض الإنفلونزا على الرجالة
- دراسة عن الفروق بين الجنسين والمناعة انتشرت سنة 2022 بتتكلم عن إن فيه فعلًا فرق بين استجابة الستات والرجالة للفيروسات والبكتيريا.. فالهرمونات الذكورية زي التستوستيرون بتتسب في تعرض الرجالة لضعف الجهاز المناعي فده بيزود من خطر الإصابة بالإنفلونزا
- بعد الإصابة بفيروس نقص المناعة البشرية.. الخلايا المناعية المعروفة باسم الخلايا الجذعية البلازمية pDC بتنتج عند الستات مستويات أكبر من المادة الكيميائية “IFN-α” مقارنة بالرجالة.. والبروتين ده بيتحكم في الالتهاب وده عنصر مهم في مواجهة الفيروسات.. فالستات بتنتجه بشكل أسرع من الرجالة
- الستات مستويات الأجسام المضادة لمواجهة عدوى إنفلونزا الخنازير أكتر من الرجالة
- الستات عندها استجابات أقوى لخلايا الذاكرة CD8 + T وده معناه إن أجهزتهم المناعية بتبقى مجهزة بشكل أفضل لمحاربة نفس العدوى الفيروسية في المستقبل
- العادات الاجتماعية والأعراف بتفرض صورة نمطية على الرجالة بتخليهم نادرًا لما يحسوا بألم أو تعب يروحوا للدكتور على طول أو يشتكوا عكس الستات
- عالمة المناعة في جامعة إنسبروك في النمسا “بياتركس جروبيك” قالت إن هرمون الإستروجين عند الستات بيساعد على مضاعفة الخلايا المناعية المحددة.. وإن الستات عامة بيتصابوا بعدوى فيروسية أقل من الرجالة
- متوسط العمر المتوقع عالميًا باستمرار إن الستات في المتوسط بيعيشوا أطول من الرجالة ومن بداية جائحة كورونا لحد الإنفلونزا الإسبانية سنة 1918.. إن الفيروسات بتموت الرجالة أكتر من الستات
طب ليه الرجالة بتحس بالتعب الشديد أكتر من الستات؟
- الاستجابة المناعية وشدة الأعراض بتختلف من شخص للتاني.. فمثلًا الصداع والسعال أعراض مزعجة بس هي علامة على إن جهاز المناعة بيشتغل بكامل طاقته.. فافتراض إن الشعور بالمرض أشد عند الرجالة مش معناه إن ده ضعف للجهاز المناعي
- الهرمونات أكيد بتأثر على طريقة عمل جهاز المناعة ولكن الاستنتاج السريع بإن الإحساس الشديد بأعراض المرض عند الرجالة سببه الهرمونات استنتاج غلط ومتسرع
- رغم إن الجنس ليه دور في شدة الأعراض بس فيه عوامل تانية بتلعب دور إنها تخلي الأعراض أشد على المريض.. زي العمر والأدوية وغيرها
وفي الآخر الإحساس بالتعب هو شعور صعب بيمر على كل شخص باختلاف جنسه.. فضروري يتقدر ويتقدم للشخص التعبان الرعاية والعلاج اللي محتاجها
