لعبة Cycle Ball.. رياضة بتدمج بين الكورة والعجل
لعبة Cycle Ball أو زي ما ناس كتير بتسميها Radball هي واحدة من أغرب وأمتع الألعاب اللي ممكن تشوفها.. لعبة واخدة من كورة القدم الفكرة ومن ركوب العجل الجنون.. اتنين لاعيبة راكبين عجل بيتحدوا فريق تاني علشان يدخلوا الكرة الجون.. بس من غير رجل ولا إيد.. بالعجلة نفسها أو بالرأس.. والأهم إن رجلك ما تلمسش الأرض نهائي.
بتتلعب إزاي؟
اللعبة بتتلعب بين فريقين.. كل فريق مكوّن من لاعبين بس.. والماتش كله بيبقى جوه صالة مغلقة.. على ملعب صغير نسبيًا حوالي 14 متر طول × 11 متر عرض.. المباراة شوطين.. كل شوط 7 دقايق بس.. يعني مفيش وقت تضييعه وكل ثانية ليها تمن.
بداية الحكاية
اللي اخترع اللعبة واحد أمريكي من أصل ألماني اسمه نيكولاس إدوارد كوفمان سنة 1893.. القصة الطريفة إن الراجل كان بيحاول يبعد كلابه من قدام البيت باستخدام عجلة الدراجة.. وفجأة قال لنفسه.. طب ما نخليها كرة بدل كلب.. ومن هنا اتولدت الفكرة.
أول ماتش رسمي اتلعب يوم 14 سبتمبر 1893 في أمريكا.. وبعدها اللعبة انتقلت لأوروبا واتنظمت وبقى ليها قوانين وبطولات رسمية.. وأول بطولة عالمية كانت سنة 1929.
قوانين غريبة
في Cycle Ball مفيش هزار في القوانين.. ممنوع تلعب الكرة برجلك أو بإيدك.. اللعب كله بالعجلة الأمامية أو الخلفية.. ومسموح بالرأس بس.
وفي حالة واحدة بس الإيد تدخل اللعبة.. لو لاعب اتحول لحارس جوه منطقة جزاء صغيرة جدًا.. ساعتها بس مسموح له يستخدم إيده.
وأي لاعب يحط رجله على الأرض.. الحكم يوقف اللعب فورًا.. واللاعب لازم يرجع ورا خط مرماه الأول قبل ما يكمل.
الكرة هنا مش زي كرة القدم العادية.. أصغر شوية.. قطرها من 17 لـ 18 سم ووزنها حوالي 550 لـ 600 جرام.. ومع ضربات العجل القوية الكرة ممكن توصل لسرعات مجنونة تقرب من 70 كم في الساعة.. يعني أي تسديدة ممكن تبقى هدف في ثانية.
ليه اللعبة دي صعبة فعلًا؟
اللعبة محتاجة توازن عالي جدًا.. إنك تفضل راكب عجل طول الماتش من غير ما رجلك تلمس الأرض.. ده لوحده تحدي.
غير كده التحكم في الكرة بالعجلة محتاج تنسيق رهيب بين العين والعجلة.. وكمان تفاهم كبير بين الاتنين اللي في الفريق.. لأن أغلب الأهداف بتيجي من جملة منظمة مش لعب فردي.
وزود على ده ضغط الوقت.. 14 دقيقة بس للماتش كله.. يعني مفيش فرصة تضيع.
الاتحاد الرسمي والبطولات
اللعبة مش أوليمبية.. بس منظمة رسميًا تحت إشراف الاتحاد الدولي للدراجات UCI.. والاتحاد ده بينظم بطولات كبيرة أهمها UCI Cycle Ball World Cup.
البطولة بتتلعب كل سنة في دول زي ألمانيا وسويسرا والمجر.. ومع توسع اللعبة بقى ليها جولات في أماكن جديدة زي هونج كونج.. خصوصًا في موسم 2025.
مين مسيطر عليها ؟
لو هنتكلم أرقام وتاريخ.. ألمانيا هي الملك الحقيقي للعبة.. أكتر دولة فازت بكأس العالم Cycle Ball بأكتر من 5 مرات.
بعدها تيجي النمسا بقوة جدًا.. خصوصًا مع النجم الكبير باتريك شنايتزر اللي اتعتبر من أساطير اللعبة وفاز بحوالي 8 بطولات عالمية من آخر 11 نسخة.. وكمان سويسرا وتشيكيا عندهم فرق قوية وحضور ثابت في البطولات.
اللعبة دلوقتي وشعبيتها
Cycle Ball مش لعبة جماهيرية زي الكورة العادية.. بس ليها جمهورها.. خصوصًا في ألمانيا والنمسا وسويسرا والتشيك واليابان.
وفي ألمانيا لوحدها أكتر من 315 نادي مسجل بيلعب اللعبة.. وفي سويسرا حوالي 43 نادي.. غير دول تانية في أوروبا وآسيا.
واللعبة بتتلعب جوه صالات مغلقة.. وبتحتاج تركيز عالي جدًا.. وده بيخلي أي حد يشوفها لأول مرة يحس إنها غريبة.. بس أول ما يفهمها يدمنها.
في الآخر.. اللعبة دي مش مجرد رياضة غريبة بالعجل.. دي تجربة كاملة بتجمع مهارة وتوازن وذكاء وتحكم في الجسم والعجلة والكرة في نفس اللحظة.. لعبة بتثبت إن الكورة مش لازم تتلعب بالرجل بس.. وممكن بعجلة تعمل اللي يخلي اللي قدامك يقول: إزاي دول واقفين أصلًا؟
