إيه حكاية فريق كومو اللي مفيش في تشكيلته الأساسية لاعب إيطالي؟

نادي كومو عمل حالة غريبة الموسم ده في الدوري الإيطالي.. الفريق اللي صعد جديد للدوري مالفتش الانتباه بسبب وجوده في المراكز الستة الأولى في الدوري.

إنما لفت الانتباه  لما بدأ 23 مباراة الموسم ده من غير ولا لاعب إيطالي في التشكيلة الأساسية.. وكمان الأرقام بتقول إن النادي عنده 8 لاعبين إيطاليين بس من أصل 34 لاعب في قائمة الفريق الأول بس مشاركتهم قليلة جدًا.

مثال على كده المدافع الإيطالي إدواردو جولدانيجا لعب دقيقة واحدة الموسم ده.. والاتجاه ده فتح نقاش كبير حول مستقبل الكورة الإيطالية.. والسؤال هل الأندية بقت تفضّل اللاعب الأجنبي على حساب تطوير اللاعب المحلي؟

وسيسك فابريجاس مدرب الفريق علق بشكل مباشر على الجدل ده في تصريحات صحفية يوم 27 أغسطس 2025 ودافع عن سياسة نادي كومو في التعاقدات.. وأكد إن المشكلة مش في تجاهل اللاعب الإيطالي لكن في قلة عدد اللاعبين الإيطاليين الشباب الجاهزين للمنافسة على مستوى دوري الدرجة الأولى.

وفابريجاس ساعتها قال إنهم حاولوا يلاقوا لاعبين إيطاليين يناسبوا المشروع اللي شغالين عليه دلوقتي لكن الواقع إن أي لاعب إيطالي مميز في السن ده بيكون هدفه الأول الانتقال لأندية القمة في إيطاليا وده بيخلّي الخيارات المتاحة محدودة جدًا للأندية الصاعدة اللي زي كومو.

كمان وضح إن اعتماده على لاعبين أجانب خصوصًا من السوق الإسباني سببه إنه يعرف السوق ده بشكل كويس.. وبيلاقي فيه لاعبية بإمكانيات تناسب أسلوب اللعب اللي عايز يطبقه وإن الهدف في النهاية هو بناء فرقة قادرة على المنافسة وكمان عندها الاستمرارية مش مجرد تجربة مؤقتة.

و لما نيجي نبص على سجل الميركاتو الشتوي الأخير هنلاقي إنه استغني عن لاعب إيطالي وخرج 4 على سبيل الإعارة وفي المقابل تعاقد مع لاعب إيطالي واحد بس.

وكمان الفريق مخسرش غير ماتشين من أصل 10 مباريات لعبهم من بداية السنة وكمان وصل نصف نهائي كأس إيطاليا بعد ما خرج نابولي
ودي نتائج متخليش حد يقدر يلوم فابريجاس على فلسفته لأنه قادر ينافس أندية عندها خبرة أكتر منه في الدوري.