لعبة “شد الودان” تحدي رياضة غريب.. اختبار أعصاب مش عضلات

لعبة Ear Pull أو زي ما بنقولها بالعربي “شد الأذن” هي لعبة تقليدية عند شعب الإينويت اللي عايشين في المناطق القطبية الشمالية زي ألاسكا وكندا وجرينلاند.. واللعبة دي مش مجرد تسلية.. دي اختبار حقيقي للصبر والتحمل البدني والنفسي.. وبتعتبر جزء أصيل من التراث الثقافي لشعوب القطب الشمالي.

طريقة اللعب والقواعد

شكلها بسيط جدًا.. لكن التحدي فيها صعب قوي.. اتنين متنافسين يقعدوا قدام بعض ويربطوا رجلهم عشان يثبتوا جسمهم.. بعدها يستخدموا خيط سميك أو حبل رفيع ويتربط بين أذن كل واحد فيهم.. وأول ما الخيط يثبت.. يبدأ السحب
وكل واحد يشد التاني باستخدام أذنه بس.. لحد ما الخيط يطلع من ودان حد.. أو حد يستسلم من الألم.. والموضوع كله قايم على التحمل.. مش القوة.

الهدف الثقافي

رغم إن شكلها قاسي.. لكن ليها معنى أعمق بكتير.. وشعب الإينويت كانوا بيستخدموا اللعبة دي عشان يعلموا الأطفال والشباب إزاي يتحملوا الظروف القاسية في البرد القطبي الشديد.. والتحمل ده كان ضروري جدًا للصيد والبقاء على قيد الحياة.

والألعاب التقليدية زي Ear Pull كان هدفها تنمية الصبر.. وقوة التحمل البدني والنفسي.. مش مجرد لعب للمتعة.

مكانها في البطولات الرسمية

اللعبة بقت جزء من فعاليات World Eskimo-Indian Olympics ودي فعالية سنوية بتحتفل بالتراث والمهارات التقليدية لشعوب القطب الشمالي.

والمهرجان بيشمل ألعاب تانية زي سحب الأصابع وسحب الرأس.. وكلها بتركز على القوة والتحمل والمهارات القديمة.

والحدث ده بيقام في الصيف في ألاسكا وهدفه حماية التراث الثقافي.. وكمان بيكون فيه رقصات وعروض وسرد قصصي يعبر عن هوية الشعوب دي.

التحديات والمخاطر

اللعبة دي اختبار لتحمل الألم أكتر من كونها مهارة رياضية تقليدية وبعض المشاركين ممكن يتعرضوا لنزيف ويحتاجوا خياطة لو الإصابة كانت قوية.

وعشان كده حصل جدل كبير حوالين اللعبة.. خصوصًا من ناس مش متعودة على الثقافة دي وبيشوفوها مؤلمة أو غير آمنة لكن عند مجتمعات القطب الشمالي.. اللعبة رمز للشجاعة.. والصبر.. والتحمل

تاريخها وانتشارها

تاريخ اللعبة مش متوثق بشكل دقيق في المصادر الغربية.. لأنها كانت جزء من التقاليد الشفوية والممارسات اليومية لشعب الإينويت وانضمامها لـ World Eskimo-Indian Olympics خلاها تنتشر أكتر.. وخلّى ناس كتير حوالين العالم تعرف عنها.

في النهاية دي مش مجرد لعبة شد ودان.. دي حكاية ثقافة كاملة.. بتجمع بين الترفيه والتحمل البدني.. وبتعيش لحد النهارده كمهرجان ثقافي ورياضي في نفس الوقت.. تفتكر تقدر تستحمل كام ثانية في لعبة زي دي؟