مين قرب من الـ1000 هدف زي رونالدو.. وهل حصلت قبل كده؟
في عالم كرة القدم كل الأنظار دلوقتي متعلقة بلحظة ممكن تبقى فريدة في تاريخ اللعبة.. وصول كريستيانو رونالدو للهدف رقم 1000 في مسيرته كل عشاق الكرة متابعين اللحظة دي بشغف لأن الرقم ده مش بس رقم ده إنجاز تاريخي نادر جدًا ومع إنه فيه لاعبين من الماضي اتقال عليهم إنهم سجلوا أكتر من ألف هدف أغلب الأرقام دي كانت في مباريات ودية أو بطولات غير رسمية وده اللي خلق جدل حوالين مين فعلًا وصل للرقم ده رسميًا.
دلوقتي السؤال اللي شاغل الكل هل فيه حد وصل قبل كريستيانو للهدف 1000 رسميًا؟ الحقيقة إن في العصر الحديث رونالدو هو الأقرب والأكثر استعدادًا لتسجيل الرقم ده رسميًا بينما أساطير زي بيليه أو روماريو أو جوزيف بيكان سجلوا أكتر من ألف هدف شامل كل المباريات لكن مش كلها رسمية.
وبالنظر للمستقبل فيه احتمالية كبيرة إن لاعبين ناشئين أو لاعبين حاليين زي ليونيل ميسي أو روبرت ليفاندوفسكي يحاولوا يوصلوا الرقم ده في السنين الجاية لكن الوصول للألف هدف الرسمي محتاج مزيج صعب من الاستمرارية واللياقة والموهبة العالية جدًا وده اللي بيخلي اللحظة دي اللي كريستيانو على وشك تحقيقها لها طابع خاص جدًا في تاريخ كرة القدم.
رونالدو حاليًا سجل حوالي 961 هدف رسمي مع الأندية والمنتخب وده رقم خليه متصدر قائمة الهدافين الرسميين في كرة القدم الحديثة.. لو حسبنا كل الأهداف اللي سجلها في المباريات الودية أو الاستعراضية فهو متجاوز بالفعل حاجز الألف هدف وبالتحديد حوالي 1008 أهداف حسب إحصائيات مؤسسة RSSSF .
ورغم كده الأهداف الرسمية لسه أقل من 1000 ورونالدو نفسه أكد في مقابلاته إنه حلمه الأكبر هو الوصول للرقم ده قبل الاعتزال وهو بيحافظ على كل أهدافه بالفيديو عشان يثبت كل الناس صحة الرقم.
ده خلى سباق الألف جول النهاردة ممتع جدًا خصوصًا مع وجود منافس شرس زي ليونيل ميسي اللي سجل 901 هدف رسمي حتى الآن.. الفارق بينهم كبير نسبيًا لكن ميسي كمان قادر نظريًا يوصل للألف إذا استمر بنفس المعدل.
الجيل الحالي
الجيل الحالي من اللاعبين فيه ناس نادرة جدًا قادرة على الاقتراب من الرقم الأسطوري ده واللي يلمس الرقم ده رسميًا غالبًا هيكون من ضمنهم زي ما قولنا كريستيانو رونالدو الأقرب بفضل المعدل التهديفي الخرافي اللي حافظ عليه لعشرين سنة.. هو مش بس سجل أهداف في الدوريات الكبرى زي الدوري الإنجليزي الإسباني والإيطالي لكنه كمان سجل مع منتخب البرتغال في بطولات كبيرة وده خلى مجموع أهدافه رسميًا يقرب جدًا من حاجز الألف.
أما ليونيل ميسي فمعدل تسجيله عالي جدًا برضه رغم الفارق بينه وبين رونالدو.. مسيرته الطويلة مع برشلونة وبعدها باريس سان جيرمان وبالنهائية إنتر ميامي ومع منتخب الأرجنتين خلت مجموع أهدافه الرسمي حوالي 901 هدف.. الرقم ده محتاج حوالي 100 هدف إضافي للوصول للألف وده ممكن يحصل في 3–4 مواسم أو أقل لو فضل مستمر بنفس المعدل التهديفي.
وفي نفس الوقت فيه لاعبين تانيين نشطين وسجلوا أكثر من 500 هدف رسمي زي روبرت ليفاندوفسكي اللي سجل حوالي 693 هدف ولويس سواريز حوالي 600 هدف وده بيخليهم جزء من الجيل الحالي اللي يقدر يلمس الإنجازات الكبيرة لكن الفرق بينهم وبين رونالدو وميسي واضح لأن الوصول للألف هدف محتاج استمرار طويل جدًا وده التحدي الأكبر لأي لاعب مهما كان مستواه.
لاعيبة بردوا زي هاري كين اللي وصل لـ 500 كين من الممكن لو استمروا بالشكل دة يوصلوا لـ 1000 جون وبردوا هدافين بحجم مبابي وهالاند يقدروا يوصلوا بسرعة للرقم دة في ظل معدل التهديف الكبير ليهم بالوقت الحالي وبردوا صغر سنهم.
الأساطير القديمة
قبل العصر الحديث كان فيه لاعبين كتير اتقال عليهم إنهم سجلوا أكتر من ألف هدف لكن أغلب الأرقام دي كانت شاملة مباريات ودية أو بطولات غير رسمية وده خلق جدل كبير حوالين صحة الأرقام كمان مفيش سجل رسمي أو قاعدة بيانات مؤكدة سجلت الأهداف دي.
أشهر مثال على ده هو الأسطورة البرازيلية بيليه اللي اتقال عنه إنه سجل حوالي 1324 هدف خلال مسيرته لكن لو بصينا للأهداف الرسمية فقط الرقم حوالي 778 هدف.. الباقي كان في مباريات ودية أو استعراضية ومع ذلك بيليه محتفظ بمكانته كأسطورة عالمية وكأفضل لاعب في القرن حسب اللجنة الأولمبية الدولية.
كمان فيه روماريو البرازيلي اللي أعلن إنه سجل أكتر من 1000 هدف لكن الأهداف الرسمية وصلت حوالي 785–790 هدف بس وجوزيف بيكان التشيكي النمساوي سجل حوالي 1813 هدف إجمالي لكن رسميًا حوالي 950 هدف فقط وكان معدل تسجيله لكل مباراة مذهل حوالي 1.66 هدف لكل مباراة.. إروين هيلمشن الألماني سجل حوالي 1611 هدف شامل المباريات الودية و989 هدف رسمي.
كمان في أساطير تانية زي فيرينك بوشكاش المجري اللي سجل حوالي 1569 هدف إجمالي منهم 802 رسمي والباقي ودية وجيرد مولر الألماني حوالي 1483 هدف شامل كل المباريات منهم 735 هدف رسمي وحتى لاعبين زي فيرينك ديك وفيرينك بيني المجريين سجلوا أكتر من 1400 هدف كلهم لكن الرسمي أقل بكثير.
الفترة الزمنية دي كانت صعبة في التوثيق وسجلات المباريات مش كاملة عشان كده فيه اختلاف كبير بين الأرقام الرسمية وغير الرسمية وده اللي بيخلي مقارنة الأجيال صعبة جدًا.
ليه صعب المقارنة؟
الفرق الكبير بين الأجيال هو طريقة تسجيل الأهداف نفسها زمان المباريات الودية والجولات الاستعراضية كانت محسوبة ضمن إحصائيات اللاعب دلوقتي الأرقام الرسمية بس هي اللي بتتحسب.. كمان التوثيق في بدايات القرن العشرين لم يكن دقيق وده بيخلي بعض الأرقام التاريخية محل جدل بين المؤرخين الرياضيين.. المؤسسات الحديثة زي الاتحاد الدولي لتاريخ وإحصاءات كرة القدم بيحسب الأهداف في البطولات الرسمية فقط وده بيخلي المقارنة بين الجيل الحالي والأساطير القديمة صعبة جدًا.
حتى النهاردة لو بصينا للأرقام الرسمية الألف هدف الرسمي لسه محدش وصل له.. أقرب واحد دلوقتي هو كريستيانو رونالدو ومعاه ليونيل ميسي اللي ممكن يلحقه لو فضل مستمر في الملاعب أما الأساطير القديمة زي بيليه.. روماريو.. وجوزيف بيكان وفيرينك بوشكاش سجلوا أكتر من 1000 هدف لكن أغلبها مش رسمي والرقم الحقيقي أقل بكثير.
