إزاي كتب محمد صلاح أسطورته في ليفربول؟

لما انضم محمد صلاح إلى ليفربول في صيف 2017 الصفقة دي ما كانتش واخدة الزخم الكبير اللي ممكن نشوفه مع نجوم تانية.. خاصة بعد تجربة مش ناجحة بشكل كامل مع تشيلسي لكن المدرب الألماني يورجن كلوب كان شايف إنه هيكون مشروع مختلف.. لاعب سريع.. ومباشر.. وعنده شخصية قوية ويقدر يبني عليها فريق كامل.

من أول موسم صلاح قلب كل التوقعات.. سجل 44 هدف في كل البطولات وكسر رقم قياسي في الدوري الإنجليزي وبقى النجم الأول بدون منازع.. النجاح ده ما كانش مجرد أرقام لكنه كان بداية علاقة خاصة جدًا بين لاعب وجمهور علاقة اتبنت على الإحساس قبل أي حاجة تانية.

واحد مننا

في مدينة زي ليفربول الجمهور مش بيحب بسهولة لكن لما بيحب بيدي كل حاجة.. وصلاح قدر يوصل للمرحلة دي بسرعة غير طبيعية.. لدرجة إن جماهير كتير بقت تشوفه “واحد منهم” مش لاعب جاي من بره.

تصريحات عمدة ليفربول السابق “جو أندرسون” كانت واضحة.. أكد إن صلاح مش بس لاعب مهم للنادي لكنه كمان شخصية مؤثرة في المدينة كلها وساهم في نشر صورة إيجابية عن التعايش والتسامح.. تقارير أجنبية كتير ربطت وجوده بانخفاض مظاهر العنصرية والإسلاموفوبيا في محيط المدينة وده بيأكد إن تأثيره تعدى حدود الملعب.

أغنية أصبحت رسالة 

الهتاف الشهير لجماهير ليفربول لصلاح ما كانش مجرد تشجيع لكنه كان رسالة إن اللاعب ده قدر يكسر حواجز كتير.. الأغنية اللي بتتغنى باسمه بقت واحدة من أشهر لقطات المدرجات في إنجلترا واتكلمت عنها وسائل إعلام عالمية باعتبارها نموذج نادر للتقبل والتنوع.

صلاح هنا ما كانش مجرد هداف لكنه بقى رمز ثقافي.. لاعب قدر يخلي جماهير إنجليزية تحتفي بهويته وتتبناها بشكل إيجابي وده شيء قليل جدًا في عالم كرة القدم.

شهادات الأساطير

لما نتكلم عن تقييم صلاح.. لازم نرجع لكلام أساطير ليفربول نفسهم. ستيفن جيرارد أكد إن صلاح ضمن أعظم اللاعبين في تاريخ النادي.. مش بس بسبب أرقامه.. لكن كمان بسبب استمراريته وتأثيره في اللحظات الكبيرة.

“جيمي كاراجر” دايمًا كان بيشدد إن صلاح لازم يتحط في نفس مستوى رموز كبيرة زي كيني دالجليش.. وده تقدير بيحصل قليل لأي لاعب معاصر كمان إيان راش أشاد بيه واعتبره قريب جدًا من صدارة تاريخ الهدافين في النادي وده دليل على حجم الإنجاز اللي حققه.

جيل اتشكل باسمه

تأثير صلاح ما وقفش عند البطولات زي دوري أبطال أوروبا والدوري الإنجليزي لكنه امتد لجيل كامل من الجماهير.. أطفال كتير في ليفربول كبروا وهم شايفين صلاح هو النجم الأول هو القدوة وهو رمز النادي.

القميص رقم 11 بقى من الأكثر مبيعًا.. واحتفالته بقت مميزة ومقلدة في كل مكان وده خلق حالة نادرة إن لاعب يبقى “هوية جيل” كامل مش مجرد نجم في فترة معينة.

بعيدًا عن الملعب.. صلاح كان نموذج للاعب المحترف اللي محافظ على قيمه وفي نفس الوقت ناجح في أعلى مستوى.. مشاركته في الأعمال الخيرية ودعمه لمبادرات إنسانية خلت صورته مختلفة عن كتير من النجوم.

وسائل الإعلام الأجنبية دايمًا كانت بتتكلم عن شخصيته الهادية والتزامه وده خلاه محبوب مش بس من جماهير ليفربول لكن من جماهير أندية تانية كمان.. التأثير ده بيأكد إن أسطورته ما كانتش مبنية على الكورة بس.. لكن على شخصيته كمان.

إعلان رحيل صلاح بعد 9 سنين مع ليفربول كان لحظة مؤثرة جدًا.. الجماهير ما تعاملتش مع الخبر كرحيل لاعب لكن كنهاية حقبة كاملة.. الصحف الإنجليزية وصفتها بأنها نهاية واحدة من أهم الفترات في تاريخ النادي الحديث.. كل هدف.. كل احتفال.. كل ليلة أوروبية في أنفيلد.. بقت ذكريات بتتراجع في لحظة واحدة.. وده بيأكد إن تأثير صلاح كان أعمق بكتير من مجرد أرقام أو بطولات.

محمد صلاح قدر يعمل حاجة قليلة جدًا في كرة القدم.. بقى أسطورة نادي.. وفي نفس الوقت أسطورة مدينة.. الفالعلاقة اللي بناها مع ليفربول هتفضل نموذج لأي لاعب بيحلم يسيب أثر حقيقي.

في النهاية.. في لاعيبة كتير بتنجح.. لكن قليل جدًا اللي بيغير مدينة كاملة.. وصلاح كان واحد من القليلين دول.