اختراع جديد.. لو سألتها قوليلي إيه يا مرايتي هتقيم شكلك وتقولك اقتراحات!

تعرفي تقوليلي صرفتي قد إيه على منتجات السكين كير اللي جبتيها بسبب ريفيوهات التيكتوكرز وطلعت ما يعلم بيها إلا ربنا؟

ومش هتكلم بقى لما بتفضلي تسألي صحابك ليل نهار على مرطب للبشرة الدهنية ويقولولك على واحد ويطلع أتقل من السمنة البلدي.

فعليكي بإيه يا بنت الحلال بس من ده كله؟ دلوقتي فيه مراية ذكية عملتها شركة Swan Beauty الأمريكية عشان تبطلي تمشي ورا التيكتوكرز تاني وتحافظي على الباقي من فلوسك.. أو الصراحة مش هتحافظي أوي لأن المراية بـ 795 دولار.

على حسب ريفيوهات اللي جربوها.. دي مميزات المراية:

• تحليل البشرة بالذكاء الاصطناعي:

المُحلل ده بيقدر يعمل فحص معتمد من أطباء الجلدية عشان يقيم مشاكل البشرة.. أمال هندي حلول عمياني كده؟ 

المراية بتفضل تدور على المشاكل زي: التجاعيد والدهون الزيادة والبقع اللي بتعملها الشمس.. وبعدها بتقيس كل مشكلة على مقياس معين.. لما يزيد الرقم يبقى بشرتك صحية وزي الفل ولما يقل يبقى يا مصيبتي يا يالهوي يا خرابي!

بتبدأ المراية تقترحلك روتين ومنتجات مناسبة بناءًا على نتايج الفحص.

لكن لأجل الأمانة.. اتقال إنها لسة مش دقيقة أوي في موضوع الفحص ده.. وإن ساعات النتايج بتتفاوت يعني ممكن تديكي 100 في حب الشباب “مفيش أحسن من كده” وانتي وشك مافيهوش حتة مافيهاش حباية.

بس بشكل عام المراية بتدي لمحة عامة كويسة عن حالة بشرتك.. خدي بقى الكلام ده وكملي عليه بسيرش حلو كده عشان تتعمقي وتفهمي المشكلة أكتر أو روحي لدكتور حقيقي مش AI.. يعني خلي عندك شوية تراست إيشوز كده وحرصي برضه.

• ميكاب أرتيست في البيت:

دي بقى أكتر ميزة عجبت اللي جربوها.. هتساعدك تحطي ميكاب كإن فيه ميكاب أرتيست عايشة معاكي.. يعني أبشري هتعرفي تظبطي الأيلاينر وتخليهم زي بعض.

بتبدأ المراية تسألك الأول كام سؤال عشان تعرف ملامح وشك.. وبتاخد الاسئلة دي وبتعملك دليل ميكاب شخصي ليكي انتي.

• أونلاين شوبينج:

هتلاقي المراية موفرالك براندات كتير لمنتجات السكين كير مخصوص ليكي بناءً على بيانات بشرتي.. عشان تبطلي تشتري أي حاجة عمال على بطال لمجرد إن صاحبتك جابتها بس.

• الإستمرارية تتصل بكِ:

وعشان ماتهتميش يوم وعشرة لأ المراية هتساعدك على الالتزام أخيرًا لأن كل ما هتعملي خطوة في الروتين “اللي المراية قالتلك عليه” تقدري تكتبيها زي الـ CheckList كده.. عشان تشجعي نفسك وتشوفي عملتي إيه وفاضل إيه.. الإستمرارية هي الأساس يا عزيزتي أمال عايزة تبقى حلوة من غير مجهود ولا إيه؟ 

• الجيت ريدي ويز مي على حق ربنا:

دي باينه من إسمها.. المراية فيها كاميرا بتصور لحد 4K وإضاءات مختلفة تقدري تستخدميهم وتصوري عشان تشاركي البنوتات صحابك معاكي.. ولا أجدعها إنفلونسر!

• منكم نستفيد يا أخواتي:

هتلاقي جوه قسم إسمه “Community” مليان دروس تعليمية وترشيحات  وتيبس آند تريكس لمشاكل بشرتك.

فلو عايزة شويتين تلاتة “رفاهية” ومعاكي دولارات مش عارفة توديهم فين.. أستأذنك تبعتيلنا شوية والباقى هاتي بيه المراية.