نجوم أغنياء مش محتاجين الشهرة ودخلوا عالم الكورة بمزاجهم

في عالم الكورة إحنا متعودين على قصة واحدة لاعب طالع من بيئة صعبة حلمه ينجح ويغير حياته.. بس الحقيقة إن في نوع تاني خالص.. لاعيبة أصلهم غني جدًا ومش محتاجين الكورة عشان الفلوس لكن بيلعبوها عشان بيحبوها أو حتى للتسلية.. النوع ده بيكسر كل القواعد التقليدية وبيفتح باب لنقاش مهم هل الشغف لوحده كفاية؟

فلاميني.. بيلعب وهو ملياردير

أول مثال لازم نبدأ بيه هو ماثيو فلاميني نجم أرسنال السابق.. فلاميني مش بس لاعب كرة ده واحد من أغنى لاعبي العالم بسبب استثماراته في شركة GF Biochemicals اللي شغالة في مجال الطاقة البديلة.

بحسب تقارير كتيرة قالت إن ثروة فلاميني وصلت لأرقام ضخمة جدًا وده معناه إنه كان ممكن يسيب الكورة في أي وقت لكنه كمل لأنه ببساطة بيحب اللعبة وده نموذج واضح للاعب بيلعب “بمزاجه” مش مضطر.

بولكيا.. أغنى لاعب

لو فلاميني غني فـ”فايق بولكيا” قصة تانية خالص.. الراجل ده ابن عيلة حاكمة وهو قريب “حسن البلقية” واحد من أغنى حكام العالم من مدينة بروناي الآسيوية.

تقارير من The Guardian وESPN أكدت إن ثروته بالمليارات ومع ذلك اختار يلعب كورة ومر على أندية زي تشيلسي وليستر سيتي.. بس بصراحة؟ الكورة بالنسبة له مش “حياة أو موت” دي أقرب لهواية متطورة لو بطل بكرة حياته مش هتتأثر بحاجة.

بيرلو وبيكيه.. رفاهية من البداية

مش كل الأمثلة بنفس التطرف لكن في لاعيبة كبار جايين من عائلات مريحة جدًا زي أندريا بيرلو اللي عيلته كانت بتملك شركات وده خلاه يلعب من غير ضغوط مادية.

ونفس الكلام على جيرارد بيكيه اللي جاي من عيلة قوية اقتصاديًا في إسبانيا.. وده ظهر بعد الاعتزال لما دخل عالم البزنس بقوة.. وتقارير كتيرة بتأكد إن الخلفية المادية المستقرة بتدي اللاعب هدوء بس أحيانًا بتقلل “الجوع” اللي بيصنع الفارق.

هل الغني عنده نفس الدوافع؟

هنا بقى السؤال المهم اللاعب اللي جاي من تحت بيبقى عنده حافز رهيب عايز ينجح بأي تمن لكن اللاعب الغني؟ هو بيلعب عشان مستمتع وده ممكن يطلع أحسن نسخة منه لأنه بيلعب من غير ضغط وممكن العكس يخليه مش مركز بنفس الدرجة وده اللي اتكلمت عنه تحليلات في سكاي اللي قالت إن “الدافع الداخلي” هو العامل الحاسم مش الفلوس.

زمان كان ممكن الأندية تبص للاعب الغني بشك لكن دلوقتي الموضوع اختلف لو عندك الموهبة والانضباط محدش هيسأل معاك فلوسك جاية منين.. بالعكس بعض المدربين شايفين إن اللاعب اللي مش مضغوط ماديًا ممكن يكون أهدى في قراراته.. 

في الآخر الكورة لعبة بتجمع كل القصص من لاعب بيجري ورا حلمه عشان يغير حياته للاعب عنده كل حاجة وبيختار يلعب عشان الحب.. النموذجين موجودين وناجحين كمان بس الفرق الحقيقي بيبقى في حاجة واحدة الشغف لأن مهما كان معاك فلوس لو معندكش حب حقيقي للعبة مش هتكمل.