لو عايز الدنيا تبقى ربيع والجو يبقى بديع بجد.. خد بالك من دول!
خرجنا من الجو الشتوي الجميل ونسمة الهواء الحلوة ودخلنا على فصل جديد مليان ألوان وزرع وهو “الربيع”.. ومش هنتكلم عن حلاوة فصل زي الربيع.. والورد الحلو المفتح لأن أكبر دليل على كده هي الست سعاد وهي بتقول “الشجر الناشف بقى ورور.. والطير بقى لعبي ومتهور”
بس بالرغم من كل اللطافة والفراشات دي.. إلا أنه مابيجيش لوحده وبيجي معاه شوية أمراض كده لزوم الساسبينس.. فمحتاجين نعرفها ونخلي بالنا منها عشان يبقى موسم لذيذ علينا.
1. الرمد الربيعي
ده نوع من أنواع حساسية العين وبيكون عبارة عن رد فعل عينك بتعمله عشان بتتعرض “لمثيرات” معينة موجودة في الهواء في الوقت ده من السنة بسبب انتشار حبوب اللقاح في الجو.
وأعراض “الرمد الربيعي” أشد شوية من باقى أنواع حساسية العين.. وده اللي بيخليه يسبب التهاب ويزود احمرار العين والتورم والدموع.. فرصة اهو تعيط شوية وتجيبها في الرمد.
تقدر تعالج “الرمد الربيعي” عن طريق:
- ماتفركش في عينك وسيبها في حالها
- اغسل عينك بمحلول ملح بارد أو بمياه
- استخدم قطرات مرطبة عشان تقلل الجفاف
- اعمل شوية كمادات باردة على العين كذا مرة في اليوم
- ولو لقيت الموضوع بيزيد أو بعد ما خفيت اتكرر تاني ممكن تستشير دكتور.. وياريت ماتاخدش أي قطرة مضادة للالتهاب من نفسك عشان ساعات بيكون فيها كورتيزون.. فروح لحد فاهم وإدي العيش لخبازه.
2. الحساسية الموسمية
دي الحساسية العادية أم “عطس” دي.. بس بتزيد أكتر في الربيع.. لأن نفس حبوب اللقاح اللي قولنا عليها فوق بتعمل شوية ردات فعل في جهازك المناعي وجسمك بيعتبرها مواد سامة وبتسببلك عطس.. سيلان في الأنف.. شوية دموع على ضيق تنفس.
وعادةً بتيجي للناس اللي سنهم من 12 لـ 17 سنة أكتر من غيرهم.
ممكن تعالجها بقى بالحاجات دي:
- عشان المناخير السايبة.. ممكن تستخدم غسول للأنف.. بالماء والملح.. أو الغسول اللي موجود في الصيدليات.
- اشرب كميات كافية من المياه.. عشان جسمك هيحتاج سوائل في الفترة دي.
- كتر من الأكلات اللي فيها فيتامين سي عشان المناعة
- وطبعًا انت عارف لو الموضوع زاد معاك هتعمل إيه؟.. شاطر.. بالظبط هتروح للدكتور
3. الطفح الجلدي
ساعات الحساسية بتوصل للجلد.. وممكن تعمل حاجات زي الإكزيما “التهاب جلدي تحسسي” وده بيحصل عشان الطبقة الواقية للجلد بتتعرض لمثيرات خارجية.. فبتقشر وتجف وتعمل طفح جلدي.
وممكن تسبب التهاب على شكل “خلايا النحل” اللي بتظهر على سطح الجلد وبتكون عبارة عن “نتوءات عالية” لونها أحمر وتحسسك إنك عايز تهرش ومش مرتاح.
لو حصلك كده تعمل إيه؟
- أولًا دشك الساقع بقى كل شوية كده
- ومضادات الهيستامين هتساعدك جدًا.. لأن دي المادة اللي جسمك بيفرزها عشان يقلل الحساسية.. وبتكون متوفرة على شكل حبوب وكريمات وهتلاقيها في الصيدلية.
- رطب جلدك بأي مرطب طبي.. هيهديلك الجلد ويقلل الالتهاب
4. البرد المتأخر
خلي بالك إننا في وقت تغيير فصول وجسمك لسه مش متعود على قلبة الجو دي.. فهتلاقي شوية عطس وبرد كده من العادي بتاعنا.. فاعمل حسابك بقى وخد فيتاميناتك من دلوقتي واشرب سوائل كتير.. وماتخففش اللبس أوي دلوقتي.
5. الربو الشعبي
ماتقلقش هو مابيجيش في الربيع.. بس لو هو عندك أصلًا هيزيد شوية.
فخلي بالك من أدويتك.. وقلل التعرض لحبوب اللقاح.. هتقولي إزاي؟
هقولك البس نضارة شمس.. البس كاب وكمامة لو خارج في الهواء.. ماتقعدش في حتة جنب الشباك.. حلول الدنيا أهو خلي بالك من صحتك بقى.
طب عمومًا ناخد بالنا من صحتنا؟
- ماتخرجش من البيت كتير الفترة دي.. ولو عندك جهاز تنقية الهواء يبقى كتر خيرك.
- لو من هواة الجيم والفورمة حاول ماتلعبش رياضة في مكان مقفول والجو الكتمة.
- أول ما تدخل البيت.. خد دش واغسل شعرك عشان لو فيه حبوب لقاح جت عليها وانت برا.. وماتنساش تغسل هدومك كويس.
وأخيرًا ماتنساش وسط كل ده و وانت بتاخد بالك من صحتك.. تتبسط بالخُضرة والألوان الحلوة الرباني اللي حوالينا.
