لو بتحس إنك أهم شخص في الكون.. مبروك عندك “Main Character Syndrome”

عارف اللحظة اللي بتبقى داخل فيها على مكان.. وتحس إن فيه موسيقى ملحمية شغالة في الخلفية.. والناس كلها عينها عليك مركزين مع كل خطوة وقاعدين مستنيينك.. انت أهم واحد موجود في اللحظة دي وكل حاجة بتدور حواليك.. مبروك انت غالبًا بتعاني من الـ”متلازمة الشخصية الرئيسية”..

حسب “Cleveland Clinic” و “WebMd”
“متلازمة الشخصية الرئيسية” هي الشعور اللي بيلازمك بإن حياتك عبارة عن فيلم وانت البطل فيها.. وكل الشخصيات اللي هم عبارة عن مساعدين ليك دورهم الوحيد إنهم يكملوا الكادرات اللي انت نجم فيها.. ولو مش بيساعدوك في الفيلم فهم أعدائك الأشرار.. مفيش وسط.. يا معاك يا ضدك..

وده بيخليك ماتحسش بحد تاني غير نفسك.. حتى ممكن يبقى فيه حد بيشتكيلك وانت تتجاهله أو تتعامل مع مشاكله وزعله إنهم مش مهمين زي اهتمامك بمشاكلك وزعلك.. 

المتلازمة دي ليها أسباب:

1- السوشيال ميديا: واحدة من الأسباب اللي بتزود الإحساس ده جواك.. فكرة إنك بتكتب كلام أو بتشارك صور وفيديوز مع الناس ده بيحسسك مع الوقت إنك نجم والناس مستنية اللي هتقوله أو تظهره ليهم.. 

2- القلق وانعدام الثقة بالنفس وتدني تقدير الذات: الناس اللي بتعاني من الصفات دي غالبًا مابيحبوش يحسوا إنهم على طبيعتهم.. وإحساس إنهم نجوم بيكون مرضي ومريح ليهم أكتر.. 

علامات بتدل عليها:

متلازمة الشخصية الرئيسية ممكن تستدل عليها من أعراض وسلوكيات في منها إيجابي وفي منها سلبي.. وهنقولك الاتنين دلوقتي..

1- الإيجابي منها:
– الشخص بيكسب ثقة في نفسه أكتر.. وده نتيجة إنه بيبقى شايف نفسه بجد
– كمان بيبقى عنده تحفيز وطاقة عالية.. نتيجة إنه بيبقى مستمتع باللقطة اللي هو شايف نفسه فيها
– بيقدر يعمل حاجات هو بيخاف منها في العادي.. وده نتيجة الثقة في نفسه اللي بتديهاله المتلازمة دي 

2- السلبي منها:
– الشخص بيفقد قدرته على الإحساس والتعاطف مع غيره.. وده بيكون نتيجة إنه شايف نفسه محور الأحداث وأهم واحد في المشهد دايمًا
– بيهتم بتفاصيل كتير في شكله ولبسه وطريقته.. وساعات كتير التفاصيل دي ممكن ماتكونش متشافة أو حد هيلاحظها أصلًا.. بس هو نجم لازم يظهر بأفضل صورة دايمًا
– كل حاجة بيقلبها عن نفسه.. حتى لو الكلام مش داير عليه أو حد تاني بيحكي حاجة عن نفسه.. بيقلب الكلام ويحكي هو عن نفسه وحواديته
– كمان بيقلب أبسط المواقف لدراما كبيرة.. مفيش حاجة عنده بسيطة.. كل حاجة بتبوظ الكادر اللي في دماغه بتبقى مشكلة كبيرة 

إزاي تتجنب إنك تقع في المتلازمة دي؟

– أهم خطوة تعملها إنك تتقبل إنك شخص عادي.. انت مش مهم الأهمية اللي في دماغك.. وده مش معناه إنك تقلل من نفسك.. بس تقدرها التقدير المناسب
– افصل بين الحياة الحقيقية والقصة اللي بتسردها في دماغك.. الواقع مش هيمشي دايمًا زي ما انت بتتخيله..
– راقب نفسك كويس.. كل ما تلاقي دماغك بتقولك إنك المفروض تتعامل بشكل معين اسأل نفسك أنا بعمل ده ليه؟.. عشان ده اللي المفروض يتعمل ولا دي القصة اللي أنا نجم فيها؟..
– اتعامل مع الناس على إنهم بشر زيهم زيك عادي.. انت مش أحسن منهم ولا هما موجودين عشان يكملوا قصتك.. هما بشر زيك وليهم حياتهم وانت نفسك جزء منها..
– اكسر وهم الكاميرا اللي بتتخيلها طول الوقت.. واسأل نفسك هو أنا لو محدش شايفني خالص هعمل نفس التصرفات؟ 

في النهاية “متلازمة الشخصية الرئيسية” مش مرض نفسي ولا مشكلة كبيرة يتخاف منها.. هي حاجة بتأثر على سلوكياتك وتصرفاتك وتخلي الناس مش متقبلاك مع الوقت بشكل كبير.. وعشان كده محتاج تغير الطريقة اللي بتشوف بيها العالم عشان يبقى عالم أفضل.