ليه اللاعيبة بتستثمر في أندية إسبانيا؟ 

في السنوات الأخيرة بقى واضح إن في ظاهرة متكررة في كرة القدم الأوروبية وهي إن مستثمرين ومالكين أندية من الدوري الإنجليزي الممتاز بقى عندهم اهتمام متزايد بشراء أو الاستثمار في أندية الدوري الإسباني لا ليجا وده مش مجرد صدفة لكنه نتيجة تغير كبير في شكل الاقتصاد الكروي في أوروبا.

القصة مش بس “حب في إسبانيا” أو رغبة في دخول سوق جديد لكن فيه أسباب اقتصادية واستراتيجية عميقة بتخلي الأندية الإسبانية هدف مهم للاستثمار خصوصًا في عصر المنافسة المالية الضخمة مع الدوري الإنجليزي الممتاز ودة شوفناه مع أكبر أسمين في الكرة زي ليونيل ميسي اللي استمثر في نادي كورنيلا اللي بيلعب في دوري الدرجة الخامسة الكتالوني وكريستيانو رونالدو في ألميريا اللي بيلعب في الدرجة الثانية وقرب يطلع الليجا.

ليه إسبانيا؟

المصدرات والتحليلات الاقتصادية بتوضح إن من أهم الأسباب إن السوق الإسباني أرخص نسبيًا مقارنة بالدوري الإنجليزي على سبيل المثال متوسط إيرادات أندية منتصف الجدول في إنجلترا أعلى بثلاث مرات تقريبًا من نظيرتها في إسبانيا وكمان الفرق في التقييم المالي بين أندية القاع في الدوريين ضخم جدًا لدرجة توصل لأكتر من 6 أضعاف لصالح إنجلترا.

لكن في نفس الوقت الأندية الإسبانية بتمثل “فرصة استثمارية” أكتر من كونها منافس مباشر لأن قيمتها أقل لكن عندها تاريخ كبير وبنية كروية قوية وسمعة عالمية.

واحدة من أهم النقاط إن إسبانيا تعتبر بوابة ذهبية للاعبين من أمريكا الجنوبية بسبب الروابط اللغوية والثقافية وكمان قوانين تسهّل تسجيل اللاعبين من دول معينة في أوروبا.. ده بيخلي الأندية الإسبانية مكان مثالي لتطوير المواهب وبيعها بعد كده بأرباح كبيرة.

كمان النظام الكروي الإسباني بيعتمد بشكل كبير على الأكاديميات زي لا ماسيا وده بيخلي الأندية تنتج لاعبين شباب بجودة عالية بدون تكلفة ضخمة وده عنصر جذاب جدًا للمستثمرين.

تغييرات اقتصادية 

التحولات الاقتصادية أجبرت الأندية الإسبانية إنها تفتح مجالات جديدة للربح مش بس من كرة القدم لكن من استغلال الملاعب في حفلات وأحداث عالمية.. مثال واضح هو ملعب أتلتيكو مدريد اللي بيستضيف حفلات ضخمة زي حفلات “باد باني” ضمن خطة لتعظيم الإيرادات.

وكمان دخول صناديق استثمار خاصة ساهم في ضخ استثمارات ضخمة وصلت لمليارات الجنيهات وده موجه بشكل أساسي لتطوير البنية التحتية والتوسع التجاري عالميًا.

الدوري الإنجليزي مثلاً عنده أفضلية واضحة بسبب اللغة الإنجليزية كلغة عالمية وانتشار البث التلفزيوني وقوة التسويق الخارجي ده بيخلي إيراداته أعلى بكتير من إسبانيا وبيخلي الفجوة المالية كبيرة جدًا بين الدوريتين لكن رغم التفوق المالي الإنجليزي إسبانيا مازالت محافظة على تفوق رياضي واضح في البطولات الأوروبية خلال العقد الأخير.

الأرقام بتقول إن أندية لا ليجا وصلت لـ 15 نهائي أوروبي في آخر 10 سنين مقابل 13 فقط للأندية الإنجليزية أندية زي ريال مدريد وبرشلونة وأتلتيكو مدريد كانت دايمًا حاضرة في دوري أبطال أوروبا وإشبيلية سيطر على الدوري الأوروبي وفياريال حقق لقب أوروبي مهم وحتى أندية زي ريال بيتيس وصلت لمنافسات قارية.. ده بيأكد إن رغم الفارق المالي الأداء الكروي الإسباني لسه قوي جدًا على المستوى الأوروبي.

ليه المستثمرين الإنجليز؟

التقرير الاقتصادي بيكشف إن في موجة كبيرة من استثمارات ملاك أندية الدوري الإنجليزي في إسبانيا خلال السنوات الأخيرة سواء شراء أندية أو الدخول في حصص ملكية.

وفي نفس السياق.. الظاهرة دي مش جديدة.. وشفنا أكتر من نموذج واضح خلال السنوات الأخيرة.. ملاك بيرنلي دخلوا السوق الإسباني واستحوذوا على إسبانيول.. وفي خطوة مشابهة ملاك برينتفورد اشتروا نادي ميريدا.. بينما مجموعة فينواي سبورتس جروب المالكة لليفربول كانت بتدرس التوسع في أندية زي إلتشي وخيتافي ومالاجا.. كمان مجموعة سيتي فوتبول جروب كانت من أوائل النماذج الناجحة بعد استحواذها على جيرونا وتوظيفه ضمن شبكة أنديتها.

التحركات دي مش عشوائية، لكنها مبنية على أسباب واضحة بتخلي السوق الإسباني جذاب للأندية الإنجليزية أولها إن وجود نادي في إسبانيا بيسهل اكتشاف المواهب الشابة وتطويرها قبل إعادة بيعها أو تصعيدها للفريق الأكبر.. وكمان قوانين تسجيل اللاعبين هناك أكثر مرونة.. وده بيدي مساحة أكبر في إدارة القوائم.. وخصوصًا للاعبين غير الأوروبيين.

إضافة لكده.. نظام الإعارات في إسبانيا أقل تعقيدًا مقارنة بإنجلترا.. وده بيساعد الأندية على تدوير لاعبيها بشكل أفضل ومع الاستقرار المالي النسبي وانخفاض قيمة الأندية مقارنة بالسوق الإنجليزي.. وبقت الفكرة دي استثمار ذكي بيجمع بين التطوير الرياضي والعائد الاقتصادي.. ومرشح إنه يتكرر بشكل أكبر خلال السنوات الجاية.