مش كل حباية بتطلع في الوش بيتقالها معلش.. ممكن نعالجها بحاجات تانية!

كام مرة طلعتلنا حباية في وشنا وروحنا نسأل صحابنا وقالولنا نضغط عليها ونفرقعها ونحط بعدها مضاد حيوي وهتروح وهتبقى زي الفل؟

هي هتروح آه بس هتسيب أثار الدنيا والآخرة وهتندمنا على اليوم اللي طلعتلنا فيه.

فخلينا نتعلم من أخطاء الماضي.. حصل خير وملحوقة.. تعالي نقولك إيه الصح ونتعامل إزاي مع حبوب الوش؟

مبدئيًا كده اعتقادنا بإن الحاجات الكتير اللي بنحطها على وشنا هي السبب مش صح!

ومش غلط برضو يعني.

بس هو الموضوع كله إن الحبوب مش نوع واحد.. وكل نوع بيطلع بسبب حاجة.. فبالتالي مش لازم الحبوب اللي طلعتلك تكون بسبب السيروم أبو ألف جنيه يعني.. محتاجين بس نعرف أنواع الحبوب وبتطلع ليه؟

• النوع الأول: الحبوب اللي بتطلع في القورة 

ودي بنسبة كبيرة “حبوب فطرية” بسبب الزيوت أو منتجات الشعر اللي بنستخدمهم.. عشان لما بينزلوا على جلدنا بيسدوا المسام.. ونحط في اعتبارنا قشرة الشعر كمان.

فمهم نحاول مانجيبش الحاجات دي على وشنا.. طب ولو حصل نعمل إيه؟

هتحتاج أي دواء مضاد للفطريات.. عارف الشامبو ضد القشرة؟

هو ده.. نغسل بيه وشنا مرة كل يوم لحد مايروحوا لحالهم وماننساش نرطب كويس عشان بينشفوا الوش.

• النوع التاني: حبوب الـ T Zone

المكان اللي مليان غدد دهنية قد كده ده آه.. وهي فيها الخير بتبقى عايزة ترطب البشرة بس للأسف الزيادة منها بيسد المسام وبيعمل حبوب.

طب نشيل مناخيرنا خالص ونرتاح؟ لأ.. غسولك اللي فيه سالسيلك أسيد الجميل.. سيروم النياسيناميد اللي بيقلل إفراز الدهون في الوش ومرطب خفيف مناسب هيقضوا الغرض.

• النوع التالت: حبوب الخدود

الحبوب اللي هنا بقى بتطلع بسبب احتكاك الجلد.. أبسط مثال.. التليفون اللي حاطينه على ودننا طول النهار أو المخدة وقت النوم.

طب الحل إيه في الظروف دي؟

أولًا: نغير سكرينة الموبايل كل شوية وكيس المخدة كمان.

ثانيًا: نغسل وشنا بنفس الغسول اللي فيه الساليسلك أسيد اللي لسه قايلين عليه فوق.

ونبعد عن المضادات الحيوية بالذات اللي فيها “كورتيزون”.. عشان بترقق الجلد وهتعملك مشاكل أكبر وإحنا مش ناقصين.

• النوع الرابع: الحبوب اللي بتطلع في الفك “الجوو لاين يعني”

ودي غالبًا بتكون بسبب مشاكل مع مناطق تانية في الجسم.. زي لخبطة الهرمونات مثلًا أو التوتر الزيادة.. وممكن تطلع في الدقن كمان أو بسبب الماسكات اللي فيها شد كتير دي “Peel-off “.

ودي لما تطلعلنا نحاول نتقي الله فيها ونسيبيها في حالها.. يا إما لو مهتمين أوي يعني نرطب بحاجة خفيفة ونحط عليها لازقة الصيدلية المدورة الصغيرة دي.

 وناكل وننام ونشرب ماية كويس.. ونسيبنا من التوتر اللي مابيجيش من وراه إلا المشاكل!

وبما إن الوقاية خيرُِا من دكتور الجلدية.. خد بالك من دول:

• اغسل وشك مرة أو اتنين كل يوم مش أكتر وبغسول خفيف ومناسب مع نوع بشرتك

• حافظ على الترطيب داخليًا بشرب الماية وخارجيًا بالمرطب المناسب

• ماتلمسش وشك كتير.. ولو بنت ابعديشعرك عن وشك

• حاول المنتجات اللي هتستخدمها تبقى طبية.. لا فيها زيوت ولا عطور

• وطبعًا النصيحة الأولى والأهم مانفعصش الحباية عشان خاطري أرجوكو

وأخيرًا الحبوب شئ طبيعي وبتطلعلنا كلنا.. الأهم بس نتعامل معاها صح ومانسمعش كلام صحابنا اللي بيفتوا.