كان دي كومبا”.. “الشيش” بس بطريقة مختلفة”

رياضة Canne de Combat أو “كان دي كومبا” يمكن ناس كتير تسمع اسمها لأول مرة لكنها واحدة من أقدم الرياضات القتالية في فرنسا واللي بتعتمد على استخدام عصا خفيفة في مواجهات مليانة سرعة ودقة وتكتيك. 

وعلى الرغم إنها مش منتشرة في العالم العربي بالشكل الكافي إلا إنها تعتبر من الرياضات الرسمية في فرنسا وليها بطولات محلية ودولية واتحاد عالمي بيتابع تطويرها ونشرها.

بداية اللعبة كانت في القرن الـ19 وقت ما كانت العصا الخشبية جزء أساسي من حياة الناس في فرنسا.. وقتها كان كتير من الرجال بيمشوا بعصا سواء للمساعدة أو للحماية ومع زيادة حوادث السرقة في الشوارع بدأ الناس يتعلموا إزاي يستخدموا العصا للدفاع عن نفسهم بدل ما تكون مجرد وسيلة للمشي. 

وبعد فترة اتحول أسلوب الدفاع ده لرياضة منظمة واتحطت له قواعد واضحة وأصبحت جزءًا من الفنون القتالية الفرنسية خصوصًا مع رياضة السافات (Savate) أو الملاكمة الفرنسية.

ومع مرور السنين خرجت اللعبة من الشوارع ودخلت صالات التدريب وأصبحت تمارس بشكل احترافي لحد ما تأسست اتحادات بتنظم البطولات المحلية والدولية وبقت فرنسا هي المركز الرئيسي للرياضة قبل ما تنتشر في عدد من الدول الأوروبية وآسيا وأمريكا الشمالية.

وأول ما تتفرج على مباراة كان دي كومبا غالبًا هتفتكر رياضة الشيش أو المبارزة لأن طريقة الحركة قريبة جدًا منها.. الاتنين بيعتمدوا على السرعة ورد الفعل والتحرك المستمر واللاعبين بيحاولوا يلمسوا المنافس قبل ما يستقبلوا ضربة.. لكن الفرق إن الشيش بيستخدم سيف معدني بينما الكان دي كومبا بتستخدم عصا خشبية خفيفة والضربات فيها بتكون أوسع وأسرع مع اعتماد أكبر على الحركات الدائرية والتنقل المستمر داخل الملعب وده بيخلي اللعبة مزيج بين المبارزة والفنون القتالية فـ بتدي إحساس بالاستعراض والمهارة أكتر من مجرد مواجهة تقليدية.

ليه اللعبة مختلفة عن باقي الرياضات القتالية؟

اللي يميز “كان دي كومبا” إنها مش رياضة قائمة على القوة البدنية بقدر ما هي قائمة على المهارة والسرعة.. العصا المستخدمة مصنوعة من خشب خفيف جدًا طولها يقارب المتر ووزنها لا يتعدى حوالي 120 جرامًا وده بيسمح للاعب إنه يتحرك بيها بسرعة كبيرة جدًا.

المباراة بتشبه إلى حد كبير المبارزة لكن بدل السيف بيستخدم اللاعب عصا وبيكون لابس خوذة واقية وواقي للجسم وقفازات وكل وسائل الأمان المطلوبة والهدف الأساسي مش إصابة المنافس أو إلحاق الأذى بيه لكن تسجيل لمسات صحيحة تحتسب كنقاط.

الملعب بيكون مفتوح نسبيًا واللاعبين طول الوقت بيتحركوا بخفة وكل واحد بيحاول يقرأ حركة التاني ويستغل أي ثغرة عشان يسجل نقطة.. وفيه أنواع مختلفة من الضربات منها المستقيمة والدائرية والجانبية وكل ضربة ليها طريقة تنفيذ محددة لازم اللاعب يلتزم بيها عشان الحكم يحتسبها.

الجميل كمان إن اللعبة بتعتمد بشكل كبير على حركة القدمين.. المدربين دايمًا بيأكدوا إن اللاعب اللي يقف ثابت في مكانه بيكون خسر نص المعركة لأن الحركة المستمرة هي اللي بتسمح له بالهجوم والدفاع في نفس الوقت وده بيخلي أي مباراة في “كان دي كومبا” مليانة إيقاع سريع جدًا وممكن النقاط تتغير في ثواني قليلة لأن أي لحظة تردد أو تأخير في رد الفعل ممكن تكلف اللاعب نقطة.

رياضة للعقل قبل العضلات

رغم إن شكل اللعبة يوحي إنها مجرد قتال بالعصا لكن الحقيقة إنها من أكتر الرياضات اللي بتحتاج تركيز ذهني.. اللاعب لازم يقدر يتوقع حركة منافسه ويختار الضربة المناسبة في التوقيت المناسب وفي نفس الوقت يكون مستعد يغير خطته في جزء من الثانية.

علشان كده كتير من المدربين بيقولوا إن كان دي كومبا “لعبة عقل قبل ما تكون عضلات”.. القوة ممكن تساعد لكن اللي بيكسب في النهاية هو اللاعب اللي يعرف يقرأ خصمه بشكل أفضل ويحافظ على هدوئه تحت الضغط.

كمان الرياضة ليها فوائد بدنية كبيرة.. فهي بتحسن التوازن وسرعة رد الفعل والتوافق بين العين واليد وكفاءة الحركة وبتقوي عضلات الجسم بالكامل بسبب الحركة المستمرة وعلشان كده فيه رياضيين في ألعاب تانية بيستخدموا تدريبات “كان دي كومبا” كجزء من برامجهم لتحسين السرعة ورد الفعل.

وعلى المستوى الدولي بتنظم بطولات عالمية بشكل دوري تحت إشراف الاتحاد الدولي للفنون  القتالية الفرنسية (FISav) واللي بيضم عدد متزايد من الدول المشاركة كل سنة ورغم إن فرنسا لسه هي القوة الأكبر في اللعبة إلا إن انتشارها بيزيد بشكل واضح مع الوقت خصوصًا بعد دخولها مدارس وأندية رياضية في دول كتير.

يمكن الرياضة دي لسه بعيدة عن الأضواء مقارنة بالملاكمة أو الكاراتيه أو التايكوندو لكنها بتقدم تجربة مختلفة تمامًا.. اللي يشوف مباراة “كان دي كومبا” لأول مرة هيلاحظ إنها أقرب لعرض فني سريع مليان مهارة أكتر من كونها مجرد مواجهة قتالية