إيه هي رياضة البوتشيا اللي منتخب مصر متألق فيها وليه بقت من أهم رياضات ذوي الهمم؟

منتخب مصر للبوتشيا مكمل نتائجه القوية في بطولة العالم لتحدي البوتشيا القاهرة 2026.. ونجح لحد دلوقتي يحصد 3 ذهبيات وبرونزيتين.

الذهبيات جت عن طريق مصطفى أبو سعدة وهناء علام وتسنيم جودة.. بينما مهند فوزي وعرفة حققوا البرونزيتين.. ومصر لسه عندها فرصة تزود حصيلتها قبل نهاية البطولة يوم 31 يوليو.

إيه هي رياضة البوتشيا؟

البوتشيا من الرياضات البارالمبية المخصصة لذوي الإعاقات الحركية الشديدة وبتعتمد على الدقة والتركيز والتخطيط أكتر من القوة عشان كده ناس كتير بتسميها “شطرنج على أرض الملعب”.

اللعبة بتتلعب بكرات ملونة والهدف إن اللاعب يقرب كراته من الكرة البيضاء “الجاك”.. وكل ما كراتك تبقى أقرب تكسب نقاط أكتر.

البوتشيا فيها أكتر من فئة حسب نوع الإعاقة.. وبتتلعب فردي وزوجي وفرق وهي لعبة موجودة في دورة الألعاب البارالمبية من سنة 1984.. وبتعتبر من أسرع الرياضات نموًا لذوي الهمم.

مصر تفرض نفسها في البطولة الحالية

النتايج اللي حققها منتخب مصر في بطولة القاهرة 2026 مكانتش صدفة.. بعد ما قدر ينافس ويحصد ميداليات قدام أفضل لاعبي العالم.. وده بيأكد قد إيه اللعبة اتطورت في مصر خلال السنين الأخيرة.

ومن أبرز المفاجآت كمان.. عرفة قدر يحقق برونزية في أول مشاركة ليه ببطولة عالم في دليل إن مصر بقت بتطلع عناصر جديدة قادرة تنافس على أعلى مستوى

تاريخ مصر في البوتشيا

ورغم إن البوتشيا لسه لعبة جديدة نسبيًا في مصر.. إلا إن المنتخب المصري فرض نفسه بقوة في إفريقيا، وحقق نتايج كبيرة في بطولات 2023 و2024 و2025.

وخلال الفترة دي برز أكتر من اسم زي تسنيم جودة وهناء علام ومصطفى أبو سعدة.. واللي بقوا من أهم لاعبي مصر في البطولات القارية والدولية.