٦ أسباب بتخلي بعض البنات تختار الـ best friend بتاعها ولد مش بنت
1- هيبقى بالنسبالك Insight متحرك أو جاسوس لعقل الرجالة اللي في حياتك، هيفهمك عقل الكراش وهيبقى عارف بيفكر إزاي فهيخليكي بتتصرفي بشكل أدق وتاخدي خطوات سليمة وماتتسحليش مع الرجالة الـ Toxic، وبرضو لو انت ولد وليك صديقة مقربة بنت هتساعدك تفهم طريقة تفكيرهم.
2- عشان مانعممش الكلام ونبقى Sexist خلينا نقول إن البعض مش كل البنات لما بيصاحبوا بعض بيبقى فيه شوية غيرة من بعض ومنافسة وبتسبب بعض المشاكل زي الحروب الباردة كده مين لابسة ايه حلو؟ مين شكلها وجسمها أحلى؟ مين محبوبة أكتر؟ وياه لو فيه ولد هما الاتنين أعجبوا بيه في نفس الوقت هيبقى صراع أنيل من صراع أمريكا وروسيا، لكن صحوبية الولد هتبقوا مع بعض حلفاء كده زي مصر والإمارات.
3- لو هو Gentle man في طريقته، هتتدلعي أخر دلع، هيوصلك لحد البيت لو خرجتوا وهيهتم بيكي جداً، وهيعاملك كإنك أخته أو حد من عيلته.
4- لو مالكيش في الحاجات المعروفة بـ “جو البنات” اللي بتعملها معظم البنات مش كلهم، زي ما بيتقال حاجات من نوعية النميمة أو الحوارات أو الرغي الكتير أو القفش بدون مبررات قوية، ففرصتك في فصل دماغك مع صاحبك الولد هتبقى أكبر لأنهم مابيركزوش في تفاصيل كتير.
5- لو أهلك عارفينه وبيثقوا فيه ده هيضمنلك إنهم مايبقوش قلقانين عليكي لو انتي برا أو لو اتاخرتي وخرجتي.
6- وخلينا نقول إنه في الأول في الأخر ممكن يكون Potential علاقة ارتباط، لو كملتوا مع بعض كأصدقاء وفشلتوا في إنكم تدخلوا علاقة ناجحة ارتبطوا ببعض وأهو تبقوا عارفين بلاوي بعض ومتقبلينها، والدراسات بتقول إن زواج الـ Best friends بيبقى أكثر سعادة.
بس ده مايمنعش إن كون الـ best friend بتاعك ولد مش بنت ممكن يكون ليها عيوب برضو، وإن سواء هتختاري صديقك المقرب ولد أو بنت المهم يكون شخص مريح بالنسبالك.
