دليلك الكامل لعالم تويتر: أكتر من 20 مصطلح هيساعدوك تفهم الدنيا هناك
لو أنت مش من مستخدمين تويتر، فاكيد حاولت تدخل ويبقى ليك أكونت عليه وماعرفتش تبقى “اكتف” فيه، ولقيت شوية حاجات ومصطلحات مافهمتهاش واللي في الفترة الأخيرة اتعملت ميم كتير بتسف على مصطلحات تويتر العميقة اللي لازم تكون بالإنجليزي.. حاولنا نجمعلك شوية مصطلحات من هناك وكتبناها بالعربي كمان زي ما بتتكتب على تويتر عشان تتويت براحتك ويبقى ليك أكونت عميق على تويتر:
1- ننورماليز: وهي أصلها “Normalize” واللي هي تطبيع أو إننا نتعامل عادي مع حاجة معينة كأن مفيش مشكلة أو أي حاجة غريبة حصلت
2- تروماتيذد: وهي كلمة “Traumatized” ومعناها مصدوم ودي بتتقال على الشخص اللي شاف تجربة صعبة خليته يتعرض لصدمة عاطفية أو إصابة.
3- تروما: وهي كلمة “Trauma” ومعناها صدمة عادي نتيجة تجربة صعبة
4- تراست ايشوز: وهي “Trust issues” وهي مشاكل انعدام الثقة زي مشاكل الثقة في إن حد يخونك أو يتلاعب بيك أو يتخلى عنك
5- توكسيك: وهي كلمة “Toxic” ومعناها العادي سامة وبيتم استخدامها على تويتر بدل كلمة مؤذي وبتتقال أكتر في سياق العلاقات المتعبة أو المؤذية.. مثال للتوضيح: دي كانت علاقة توكسيك.
6- ريد فلاج: وهي “Red flag” ومعناها الحرفي اللي هو علم أحمر بس المعنى المجازي إن فيه خطر ويتم استخدامها للتحذير من الخطر ده وبالبلدي كده “حسيت إنها إشارة”.
7- إنسكيور: وهي “Insecure” ومعناها الحرفي إن الشخص غير آمن ودي بتسخدمها لو حد عنده مشكلة بتخليه مش واثق في نفسه كفاية فبيقول بلاش نتكلم في الموضوع ده عشان أنا عندي “انسكيورتز”
8- مانبيوليتف: وهي كلمة “Manipulative” واللي يعني متلاعب ودي بتستخدمها لما بيجننك ويتلاعب بيك وبتقول المانبيوليتيف جيه المانبيوليتيف راح.
9- فير أوف كوميتمينت: وهي “Fear of commitment” ودي معناها الخوف من الالتزامات وبتستخدمها لما تبقى عايز تطلع تجري وتخلع من علاقة.
10- توكسيك ميسكولانتي: وهي “Toxic masculinity” ومعناها الذكورية السامة وبمعنى أوضح هي عبارة عن مجموعة من المواقف وطرق التصرف المرتبطة بشكل نمطي بالرجالة أو المتوقعة منهم.
11- هوموفوبيك: واللي هي “Homophobic” وهي الخوف من المثليين، وبيتم استخدامها لأي حد ينتقد المثلية الجنسية.
12- الإيجو: وهي “Ego” ومعناها الحرفي الغرور أو الأنانية وبيتم استخدامها بالشكل ده “الإيجو بتاعي منعني” وهنا هتيجي بمعنى الكبرياء والغرور.
13- فليرتينج: وأصل الكلمة “Flirt” واللي هي يعني بيعاكس أو بيتغزل، بس بتُستخدم في تويتر عشان لما تبقى بتعاكس حد متقولها بشكل شيك ومش مبتذل.
14- انكزايتي: واللي هي “Anxiety” واللي هو القلق ودي بتتقال في سياق إنك قلقان أو مش مستريح.
15- چادچينج: واللي هي “Judging” واللي هي يعني إطلاق الأحكام ودي بتتقال لما حد بيقول رأيه في حاجة تخصك وبتبقى عايز تسكته بتقوله أنت كده بتچادچ
16- مينستريم: واللي هي “Mainstream” ودي معناها التيار، يعني لما بيبقى فيه اتجاه سائد في الرأي أو الموضة أو الفن أو حتى في الأراء بنقول الحاجة دي مينستريم
17- مانسبلينيج: واللي هي “Mansplaining” ودي معناها قوامة الرجالة وده بيتقال لما راجل يشرح لست حاجة بشكل متعالي كأنه بيفهم أكتر منها أو يعرف أكتر منها بس لمجرد إنه راجل وإنها هي الست.
18- سمب: وهي “Simp” وده مش معناه إن الشخص من السمبالوين هيخيخو،احم، سوري، المهم ده مصطلح عام جديد على الإنترنت معناه إن شخص بتعاطف زيادة مع شخص تاني مش بيبادله نفس المشاعر عشان بيسعي يكسبه أو بيسعي يشد انتباهه بشكل ما والرجالة بقيت تستخدمها على بعض أكتر لما يلاقوا واحد بيتشقلب قدام واحدة عشان يشد انتباهها وهي مش معبراه.
19- ريباوند: واللي هي “Rebound” وده معناه تعويض عادي بس بيتم استخدامها في العلاقات بالتحديد لما تبقى خارج من علاقة وتدخل في واحدة بعدها بسرعة عشان تنسي اللي قبلها.
20- أبيوزر: واللي هي “Abuser” ومعناها شخص مسئ، ودي بتستخدمها على أي شخص بيأذيك أو بيطلع عينك وبيتوكسيك (من توكسيك يعني)عليك.
21- سيلف ستيم: وهي “Self esteem” ومعناها احترام الذات وبتستخدم لما تلاقي حد مش مقدر نفسه مثلا فبتقوله أنت السليف ستيم بتاعك ضايع كده ليه؟ حب نفسك شوية.
22- سكسيست: واللي هي “sexist” ومعناها “متحيز جنسيا” وهو الشخص اللي بيبقى متحيز لجنس معين في كلامه وأفعاله.
