8 حقايق عن صفات مواليد شهر أكتوبر 

زي ما كل برج بيبقى له صفاته الخاصة والمميزة فمواليد كل شهر كمان بيبقى ليهم صفات بتميزهم، وزي ما اتكلمنا عن صفات هتلاقيها في شهر سبتمبر، تعالى نقولك أهم صفات هتلاقيها في مواليد أكتوبر حسب ما قال موقع “amerikanki”:

1- عندهم كاريزما:

مواليد أكتوبر شخصيات جذابة وعندهم شخصية ساحرة وبتشد ناس كتير، وغالبا هتحتاج تفكر كذا مرة قبل ما تختلف معاهم في رأيهم، خصوصا إنهم واثقين جدا في نفسهم لدرجة إنك ممكن تحسدهم على شخصيتهم.

2- أشخاص رومانسية:

أشخاص بيحبوا الرومانسية وبيعرفوا يحبوا فعلا، وجذابين كمان لإنهم بسهولة يقدروا يكسبوا أي شخص عن طريق إنهم يتكلموا معاه بس، ولو كان شريكك من مواليد أكتوبر فأنت محظوظ لإنه هيفضل يحبك طول عمره.

3- عندهم ذكاء عاطفي:

مواليد أكتوبر بيدركوا عواطفهم كويس وعندهم مهارات اجتماعية ده غير إنهم أشخاص عطوفة وبيحبوا التعاون.

4- بيحبوا السلام:

اللي اتولدوا في أكتوبر بيحبوا السلام وبيفضلوا الجو الهادي وبسبب الصفة دي ماعندهمش أعداء كتير وقليل ما هتلاقي عندهم أعداء، ونادر لما صوتهم يعلى أو بيفقدوا أعصابهم وده لإنهم بيلاقوا أرضية مشتركة ترضيهم بسهولة مع أي شخص.

5- بيكرموا ضيوفهم:

مواليد أكتوبر معروفين بكرم ضيافتهم وبتبسطوا لما يعرفوا إن جايلهم ضيوف، وبيعرفوا يضيفوا الناس وده لإنهم مؤدبين وبيحبوا يتأكدوا إن ضيوفهم مرتاحين.

6- متفائلين:

مابيفقدوش الأمل أبدا ومستمرين دايما في المحاولات، وبيحاولوا يوصلوا لأهدافهم وده لإنهم أغلب الوقت متفائلين، ده غير إنهم ممكن يبقوا قادة كويسين عشان عندهم قدرة على تحفيز غيرهم بسلوكياتهم الإيجابية كل ما الأمور بقيت صعبة.

7- شخصيات ودودة:

مواليد أكتوبر شخصيات “فريندلي” جدا، وبيتواصلوا مع معارفهم كلم بسهولة لإن شخصيتهم اللطيفة والمرنة بتساعدهم في تكوين صداقات جديدة مكان ما بيروحوا، خصوصا إن ضحكتهم مابتفارقش وشهم وبتحل أصعب المواقف.

8- بيعرفوا ينجزوا شغلهم:

معروف إن مواليد أكتوبر بيعرفوا ينجزوا مهامهم وماشين بمبدأ أهم من الشغل تظبيط الشغل، وبيحبوا الشغل يبقى كامل ومثالي ومش في النص كده، ده غير إنهم بينجزوا أي مهمة مهما كانت صعبة.

وزي ما شوفنا إن أغلب مواليد أكتوبر متفائلين و”فريندلي” ورومانسين وعندهم مميزات كتير كويسة فأكيد هما زي أي أشخاص فيهم عيوب ومميزات، بس احتفالا بيهم في شهر ميلادهم قررنا نقول مميزاتهم بس.