لو حاسس بوحدة.. 8 حاجات تعملها عشان تقلل الإحساس ده
الوحدة هو شعور سيء، شعور بلا شيء والعدم تماما، ممكن يكون ماعندكش صحاب أو ممكن يكون في ناس في حياتك بس مشاغل الحياة بتخليك مش عارف تشوف أي حد، بس في النهاية شعور الوحدة واحد.. حاجة بتخليك تشوف الحياة كئيبة ومملة وبتوصلك لمرحلة إن مالهاش معنى ولا طعم.
لكن موقع Healthline بيقولنا على طرق ظريفة هتقلل من شعورنا بالوحدة:
1- لما تبص للوحدة من زاوية مختلفة ده ممكن يخليك تتعامل معاها بشكل كويس، يعني ركز على إنك تكتشف نفسك وتفكر في أهدافك الشخصية، تمارس هواية أنت بتحبها، تسمع المزيكا اللي بتعجبك، تشوف الأفلام اللي أنت بتحبها.
2- رجوعا لأول نقطة، سماعك للمزيكا في البيت ممكن يساعدك على تحسين مزاجك، أو إنك تسمع كتب صوتية، حتى لوهتشغل برنامج على التلفزيون أو اليوتيوب من غير ما تقعد تتفرج ولكن مجرد وجود الصوت طول الوقت ده هيكسر حالة الصمت والملل، وحاجة تانية سهلة وبسيطة ومش هتكلفك كتير.. افتح الشباك واخرج للطبيعة والضوضاء اللي برا، صوت الطيور.. صوت الناس.
3- حاول تكون على تواصل مع عائلتك لو عايش لوحدك، وكمان صحابك، لو طول الوقت مشغول ومش لاقي وقت، مكالمة فيديو أو فويس نوت قصيرة ممكن تبان حاجة عادية ولكن هيكون ليها تأثير في تخفيف شعور الوحدة.. المهم تفضل مٌتصل بيهم طول الوقت.
4- وجود عدد كبير من الصحاب مش هيقلل شعورك بالوحدة، الفكرة في جودة العلاقات دي، يعني قعدة فيها 20 شخص، ممكن تكون مالهاش قيمة وتحس إنك وحيد برضه، ولكن قعدة مع شخص واحد قريب منك بتشاركه مشاعرك وتجاربك الشخصية وتسمع رأيه فيها، وخلوا كلامكم يكون في الحاجات المهمة والمفيدة ليكم سواء خطوات في العمل والحياة عموما وتجنبوا كلام في الحاجات هتجيبلكم كآبة وغم.
5- حتى لو مافيش حد تخرج معاه، اخرج لوحدك واعمل الحاجة اللي بتحبها وغير جو، اخرج اشتغل في أي كافيه، اقعد كُل في مطعم بتحبه وبيعملوا الأكل سخن وحلو، انزل اتمشى في مناطق مروحتهاش قبل كدة وشم شوية هوا حلوين، وحسب موقع Healthline، اتعمل دراسات في 2010 ولقت إن الشعور بالوحدة له تأثير على جودة النوم، ولو نومك كان سيء، أداءك في اليوم اللي بعده هيكون سيء برضه.
6- هوايتك أو موهبتك ممكن يكونوا هما صحابك في الحياة، بتحب تعزف على حاجة؟ اتعلمها واعزف، بتحب الرسم؟ شخبط شخابيط ولخبط لخابيط، بتحب تكتب؟ طلع كل أفكارك وانفعالاتك في الكتابة، كل ده مش زرار هتدوس عليه ينسيك الوحدة.. بس هيسحلك سحلة حلوة.
7- وجود كلب أو قطة في البيت ده ممكن يساعدك بشكل كبير في التعامل مع الوحدة وتحسين الصحة النفسية والجسدية بشكل عام، ومش شرط على فكرة كلب وقطة بس، ممكن عصافير لو بتحب الطيور أو أسماك أو أي حيوانات تانية، هتعملك جو في البيت جميل، كل حيوان وله خصائصه، في حيوانات رعايتها محتاجة وقت كبير وحيوانات تانية بتبقى عادية وسهلة، خليك متأكد بس إنك هتقدر ترعى الحيوان ده قبل ما تجيبه.
8- لو الوحدة بدأت تديك مشاعر تانية زي اليأس، هتحتاج تتواصل مع طبيب نفسي، هيسمعك ويفهم اللي بيدور في دماغك وهيساعدك.
وفي النهاية.. مافيش أي شعور بيدوم للأبد، حتى الوحدة.. في وقت ما هتزول، لو في علاقاتك قليلة في حياتك، حافظ عليها ونميها واختار الناس اللي تكون في حياتك، ولو مفيش أي شخص.. هيجي أكيد وقت ما هتتعرف على ناس جديدة سواء من شغل، دراسة.. ولحد ما ده يحصل.. ركز على تنمية نفسك والتفكير في خطواتك المستقبلية في الدراسة والشغل والحياة عموما.
