دراسات: الجينات ممكن تكون سبب كرهك للخضار
ارجع بشريط ذكريات حياتك كده وأنت مروح من المدرسة جعان وفاكر إنك هتلاقي في البيت شوية مكرونة بشاميل أو محشي ورق عنب أو أي أكل مش صحي عموما، فبتدخل البيت وترمي شنطتك ومايهمكش كتاب الدين وتقول لست الحبايب إنك جعان بعلو صوتك وكلك حماس إنك هتاكل أكل حلو وتتبسط وبعدين تدخل المطبخ بقى فتلاقي خضار وتتصدم يا عيني صدمة عمرك.
يمكن مش أنت لوحدك اللي حصل معاك الموقف ده، أطفال كتير حصل معاهم ده في العالم كله، يمكن عشان الحقيقة اللي كلنا عارفينها إن الأطفال فعلا مابيحبوش الخضار، خصوصا لو كان سبانخ أو قلقاس أو بروكلي، بس مع الوقت والعمر بنتكيف مع الحاجات اللي بنكرها وبنبدأ ننسي مشاكلنا معاها وبناكل خضار عادي ويمكن كمان بيبقى أساسي في يومنا وأكلنا.
ممكن مش كل الأطفال بيكرهوا الخضار، لكن الأبحاث الجديدة كشفت إن الناس اللي بيكرهوا الخضار ده ممكن يكون بسبب جينات وراثية عندهم بتخليهم يكرهوا بعض الخضروات.
فيه علماء أمريكان قالوا إن موضوع الجينات الوراثية ده بيفسر السبب إن فيه ناس مابتقدرش تحط في نظامها الغذائي خضار كفاية، بحيث إن فيه جين زيادة بيخلي طعم الخضار مر بالنسبة لبعض الناس ومش زي ما باقي الناس بتدوقه عادي خصوصا لبعض الخضراوات زي البروكلي والبراعم عموما، ونفس الجين بيخلي طعم حاجات برضه مش مناسب للناس دي زي البيرة والقهوة والشوكولاتة الداكنة.
كل الناس بتورث نسختين من الجين المسؤول عن التذوق واللي اسمه “TAS2R38” واللي بيسمح لنا بتذوق المرارة عن طريق تشفير معين للبروتين في مستقبلات الطعم على اللسان، وفيه أشكال مختلفة برضه للجين ده، بمعنى إنه ممكن يسبب إحساس بطعم الأكل المُر بشكل زايد، وبيتقال على الناس بيعانوا من ده متذوقين خارقين.
وعلى النقيض بقى فيه ناس ممكن يورثوا نسختين من متغير اسمه “AVI” مابيحسوش بطعم الحاجات المُرة في الأكل خالص، لكن فيه ناس ممكن تورث جين الـ “PAV” وجين الـ “AVI” والناس دي بتدرك الطعم المُر قليل في الأكل.
العلماء عملوا دراسة على 175 شخص ولقوا إن اللي عندهم نسختين من جين الـ “PAV ” بياكلوا كميات صغيرة من الخضار الورقي الأخضر، وحذرت الدكتورة “جينيفر سميث” وقالت إن تغيير الجينات ده ممكن يمنع ناس من إنهم ياكلوا الخضار والفاكهة الطازة اللي كل دكاترة التغذية موصيين بأكلها كل يوم، وقالت كمان إنك كدكتور لازم تفكر المريض بيدوق الأكل إزاي لو عايزة فعلا يتبع نظام غذائي صح.
وأكيد البحث ده خلق أمل عند ناس كتير عشان عرفوا إن عدم تفضيلهم وحبهم للخضار ده غريزة وادى الناس اللي مابتحبش الخضار عذر عشان يعرفوا هما ليه صحتهم مش كويسة زي الناس اللي بتحب الخضار.
