٧ أسباب حقيقية بتخلي الجواز بعد علاقات طويلة يفشل
لما بنبقى في علاقة مستمرة مع حد لوقت والعلاقة مريحة بالنسبة للطرفين الطبيعي جدا إننا بنفكر في خطوة لقدام وهي الجواز، لإن الحياة مع شخص بتحبه للأبد فكرة مثالية، طلب الجواز لوحدة من أكتر اللحظات المؤثرة في أي علاقة، بس للأسف الواقع بيختلف خالص عن الخيال لإن مش معنى إن فيه شخصين في علاقة بقالهم سنين إنهم يتجوزوا، ولو اتجوزوا مش معنى كده إنهم هيعيشوا في سعادة طول العمر.
لما الأشخاص بياخدوا خطوة الجواز دي بينشغلوا في التجهيزات أكتر، يعني الشقة هتبقى لونها بني ولا أبيض، العفش هنفصله ولا نجيبه جاهز، وجهاز العروسة والصيني والنيش والمطبخ والحمام وأوض الأطفال والشبكة هتبقى بكام والفرح فين وشهر العسل هنروح فين وهكذا بس للأسف بينسوا يبصوا لبعيد عليهم هما شخصياً وعلى حياتهم مع بعض هتبقى عاملة إزاي ولو ركزوا أهلهم بيقولوا جملة “بعد الجواز هيتغير/ هتتغير” وعشان كده بقينا نسمع عن حالات طلاق كتير في آخر فترة.
خلينا نقولك ليه العلاقات اللي شبه كده اللي هي بتبقى قصص حب طويلة جدا قبل الجواز بتنتهي بطلاق في الأخر:
1- قلة الالتزام:
لما بتبقى صغير ولسه داخل العلاقة جديد أو في علاقة وبتحاول تحافظ عليها بكل الطرق غالبا مش هتفوت فرصة تقول فيها لشريكك قد ايه أنت بتحبه وهو مهم بالنسبة لك، هتحس بامتنان وشكر له في كل المواقف اللطيفة منه، بس على الناحية التانية بقي لما تتجوز هتاخد شريك حياتك “فور جرانتيد” يعني ما هو كده كده موجود، وبالتالي مش هتقدر الشخص اللي معاك بنفس الطريقة اللي هو بيقدرك بيها والفجوة اللي بين الشخصين بتبدأ توسع.
2- بيبقوا حنينين بشكل مبالغ فيه في البداية:
فيه دراسة تم نشرها في مجلة “Personality and Social Psychology” بتقول إن الأشخاص اللي بيبقى فيه بينهم حنان مفرط في أول العلاقة بينتهي بيهم المطاف في الآخر إنهم يسيبوا بعض، لإن مع الوقت هتلاقى إن مشاعرك بقيت ثابتة أكتر، فلو بتحاول تفاجئ مراتك مثلا هتلاقيها مش هتتفاجئ زي زمان وهتبدأ تحس بالملل في العلاقة وده كمان بيخلي شريكك يحس إن مفيش حاجة مثيرة في العلاقة وده بيخلق كم ضغط هايل وبيخلي الشخص يحس إنه غير مرغوب فيه في العلاقة.
3- ده مش حب حقيقي:
أسوأ غلطة الشخص بيقع فيها هو إنه يخلط بين الحب والانبهار، أو إنه يخلط بين الحب والتعود وده غلبا اللي بيقع فيه الأشخاص اللي بيدخلوا علاقات طويلة بيكونوا اتعودوا على الشخص وبيبقوا فاكرين إن ده حب، وده اللي بيدركوه بعد الجواز إن ده مش حب ولا حاجة، فإنك تحب شخص ده حاجة وإنك تلاقيه طول الوقت دول حاجتين مختلفتين تماما لكن لما بيتم إدراك ده بيبقى فات الميعاد على رأي الست أم كلثوم.
4- احتياجات الشخص بتتغير:
الشخص زي ما بيتغير مع مرور الوقت احتياجاته كمان بتتغير، وأولوياته كمان بتتغير فهتلاقي إن الناس بيتصاحبوا ويحبوا بعض سنين كتير وبعد الجواز بشهور وممكن ينفصلوا، عشان التغيير ده بيبقى راجع لإن الشخص بدأ ينضج ويكبر اهتماماته وأولوياته بتختلف، وطبعا ممكن ده يحصل وأنت مع شريكك بس غالبا هيبقى صعب لو هو مش متفهم ده عشان هيبقى اهتمامك وأهدافك ليك أنت في الأول، الجواز شيء جميل جدا بس بيتطلب إلتزام وصبر وحب وعشان كده ناس كتير بتتعب بعد الجواز وبيفضلوا يبقوا أنانيين ويركزوا على أهدافهم الشخصية.
5- بتبقى بس عايز تستقر:
أي سبب للجواز غير الحب بيخلي الجواز تجربة فاشلة عشان كده لو كنت مصاحب حد فترة طويلة وقررتوا تتجوزوا لمجرد إن هو “الكومفرتزون” بتاعك بس ماتتجوزش أحسن لإن الجواز هينهار في أسرع وقت ممكن.
كل الناس غالبا بتدور على الاستقرار والحياة الهادية والمثالية بس مش عشان تستقرر شهر أو سنة أو 5 سنين تعيش في عدم استقرار طول عمرك عشان كده ماتخليش كلام ماما وخالتو وطنط صاحبة ماما يأثر عليك فتتجوز وخلاص.
6- بتكتشف جزء جديد في شخصية شريكك:
إنك تبقى في علاقة لفترة طويلة مع حد مش معنى كده إنك تعرف كل حاجة عنه، لما تتجوز وتعيش مع نفس الشخص، لما تعيش مع شخص عبارة عن رحلة هتكتشف كل يوم حاجة جديدة مش كلها حاجات وحشة هتلاقي حاجات مثيرة وحاجات وحشة زي عدم الصراحة وعدم الولاء وقضايا الأموال والإفراط في التملك وغيرهم من المشاكل اللي مابتبنش إلا بعد الجواز.
7- مش هي الحياة اللي بتبان في الأفلام والمسلسلات:
أغلب الناس عندهم تصور معين ناحية الجواز وهو زي اللي بيبقى في الأفلام والمسلسلات وبتصدموا لما بينزلوا لأرض الواقع، لإن شريكك مش هيكمل الجمل اللي مش عارف تقولها ومش هيفتكر كل حاجة بتحبها ومش كل يوم هيبقى سعادة، فيه أيام أنت هتتقفل أو شريكك هيتقفل وهتحتاج مساحتك الشخصية.
