لو انفجرت محطة زابوريجيا النووية في أوكرانيا.. هل مصر هتتأثر؟
خلال الأيام اللي فاتت.. انتشر بعض الكلام عن وجود خطر ضخم لو انفجرت محطة زابوريجيا النووية في أوكرانيا وإن الإشعاعات ممكن توصل لمصر .. هل ده حقيقي؟ عملنا بحث وحاولنا نلخص المعلومات اللي وصلنالها بشكل بسيط
وفقا للـ”تيليجراف”.. فمحطة زابوريجيا من مفاعلات مائية مضغوطة “PWR” والأكبر في أوروبا والتاسعة على مستوى العالم.. والمحطة أكثر أمانا ومختلفة عن محطة تشيرنوبيل اللي الناس واخدها كمثال في حال حدوث انفجار في المحطة الأوكرانية.. مختلفة إزاي؟
بحسب توني إيروين أحد أساتذة الجامعة الوطنية الأسترالية واللي أدار محطات طاقة نووية لـ30 سنة في المملكة المتحدة قال إن مفاعل زابوريجيا من مفاعلات الماء المضغوط وأكثر أمانا من مفاعل تشيرنوبيل، والمفاعل يحتوي على خرسانة كبيرة وأنظمة حماية من الحرائق وفيها أنظمة تبريد احتياطية غير الأساسية في حالات الطوارئ، حسب موقع “الجارديان”
وبالرغم من اشتعال النيران في المفاعل من 3 أيام واللي فضلت مستمرة لخمس ساعات، مدير عام الوكالة الدولية للطاقة الذرية رافائيل ماريانو قال إن أنظمة الأمان في المحطة ماتأثرتش ولم يتم إطلاق أي مواد مشعة وده وفقا لموقع “واشنطن بوست”
وبعيدا عن كل ده.. حسب موقع CNN Money، لجنة التنظيم النووي الأمريكية بتقول لو حصلت كارثة نووية كبيرة، فمنطقة الخطر بتكون دائرة نصف قطرها 10 ميل، والهواء هيكون مش آمن للتنفس في مساحة 50 ميل، بالإضافة للأكل والمياه اللي برضه مش هيكون آمن.. فحسبنا المسافة بين مدينة زابوريجيا اللي فيها المفاعل وبين أقرب نقطة في مصر “محافظة الأسكندرية”
طيب المسافة بين مدينة زابوريجيا واللي فيها المحطة النووية وبين إسكندرية قد إيه؟ 1,900 كيلومتر تقريبا “1180.605 ميل”
ولحد دلوقتي مفيش أي معلومات أكيدة عن تأثير الإشعاع لو مفاعلات المحطة انفجرت.. فياريت نقلل من نشر الإشاعات والذعر لأن دي مش ريد زون في PUBG نهزر فيها.
