إزاي الصيام بيحسن من حالتنا النفسية ؟

هل تعلم عزيزي الصائم إن الصيام – علمياً- بيحسن من حالتنا النفسية؟ وإن الصيام ليه فوائد كتير على الإنسان من الناحية النفسية زي ما ليه فوائد بدنية.. موقع “amenclinics” قال في واحد من مقالاته الفوائد النفسية للصيام.. لو عايزين تعرفوا إيه هي فهي دي: 

1-حل مثالي للي بيعاني من ال mood swings:

كلنا بنسمع المصطلح ده وأي حد مش بيبقى طايق نفسه بيقول إنه عنده mood swings.

 لكن الحقيقة إن ده مصطلح علمي بجد معناه بشكل بسيط تقلب الحالة المزاجية والصيام بيساعدنا نتخلص من حالة التقلب المزاجي عشان بيقلل افراز هرمون الكورتيزول المسئول عن مشاعرنا الخاصة بالقلق و التوتر و التقلب المزاجي المفاجئ.

٢-صيام اكتر ..اكتئاب أقل:

-و ده عن طريق إن الصيام بيساهم في زيادة إفراز هرمون الإندروفين اللي ليه دور كبير جداً في السيطرة على أعراض الاكتئاب زي الشعور بالوحدة واليأس وفقدان الشغف بشكل كبير في السيطرة على أعراض الاكتئاب وبيخلي عندك راحه نفسيه أكبر.

٣-تفكير احسن وذاكرة أقوى:

-الطبيعي أول كام يوم صيام هتحس بتعب وإرهاق وإنك مش قادر تفكر أو تنجز أي مهام ليك، لكن هتتفاجئ لما تعرف إن الصيام بيساعدنا نفكر أحسن وننجز كمان أسرع، لأن الطاقة اللي جسمك بيستخدمها في هضم الأكل بيستخدمها الدماغ ولحد ما جسمك يتعود على الصيام زي اليومين دول كده، الدم هيوصل لعقلك أنظف وأسرع وده اللي بيساعدنا نفكر أحسن و بيحسن من ذاكرتنا وده معناها عزيزي الصائم لما نعمل قرارات متخلفة وإحنا صايمين مانعملش الصيام شماعة ليها ممكن نكون إحنا أساسا اللي مش عارفين نفكر صح!.

٤- أقل توتر وأقل قلق:

التوتر والقلق المستمر الصيام بيساعدنا نتخلص منهم وده من خلال إن وإحنا صايمين بنفرز هرمون الدوبامين اللي بيساعد على تهدئة الأعصاب والإحساس بالراحة والاسترخاء .

وعشان كده ناس كتير في العالم بتستخدم نظام intermittent fasting أو ما يعرف بالصيام المتقطع وهو إنك تصوم عن الأكل بس لعدد معين من الساعات وتاكل في الساعات الباقية وده نظام صحي للناس اللي حابه تفقد وزن أو تعيش حياة صحية أكتر.