5 خطوات عشان تعرف تتعامل مع الأخبار السلبية
من إمبارح وإحنا بنعيش في دوامة من الأخبار السيئة اللي بيتم تداولها على السوشيال ميديا، والبعض للأسف بيتداول معاها فيديوهات وصور وكل ده بشكل أو بأخر بيأثر على الصحة النفسية للشخص وهو مش حاسس أو مدرك خصوصا لو الشخص تلقى كذا خبر مؤلم ورا بعض.. طيب أنت كشخص تتصرف إزاي في الحالة دي؟
1- أول ما يجيلك خبر سلبي، حاول تستعيد السيطرة على عواطفك ونظم نفسك، خد نفس عميق واحتفظ بيه لثواني معدودة، وسيبه يخرج تدريجيا، وكرر العملية دي لحد ما تحس إنك بقيت أحسن
2- لو عايز تبص على الأخبار، فا حاول تنقي المصادر اللي مش بتعرض صور وفيديوهات للحدث نفسه لإن ده بيكون أفضل، وحدد وقت تبص فيه على الأخبار على سبيل المثال مرة الصبح ومرة بليل، ده هيقلل من مقدار الوقت اللي بتقضيه في قراءة الأخبار وبالتبعية مش هتغرق في بحر الأخبار السلبية المنتشرة، حسب ما قالت جاكلين سبيرلينج، وهي عالمة نفس وعضو هيئة تدريس بكلية الطب في جامعة هارفارد.
3- دانا جارفين، الأستاذ المساعد في جامعة كاليفورنيا بتنصح بعدم مشاهدة نفس الأخبار، بمعنى إن لو في خبر عدى عليك ولقيته بيتعرض تاني فا ماتكملش قراءة أو فرجة عليه، وبتأكد على نصيحة جاكلين سبيرلينج اللي قولناها في النقطة السابقة، وهي معرفة الأخبار وتجنب أي صور أو فيديوهات عنيفة، وبتضيف إنه أقصى مدى تتطلع فيها على الأخبار بتكون 30 دقيقة بالكتير في اليوم كله.
4- حاول تركز على نفسك، يعني في فترة انقطاعك عن الأخبار شوف حاجات تعملها سواء إنك تخرج أو تشوف فيلم أو تلعب رياضة أو حتى تنام أو بمعنى تاني اهتم بنفسك وركز على نفسك أنت.
5- من الطبيعي إن الأخبار السلبية تأثر عليك، ولو ده حصل فا حاول تلجأ لشخص بتثق فيه واتكلم معاه لإن تلقي الدعم في الأوقات دي بيكون مهم.
وفي النهاية، بشكل عام حاول تقلل من متابعة الأخبار ولما تتابعها، اختار مصادرك بعناية وابعد أي صور أو فيديوهات للأخبار السلبية دي
