الناس اللي خطهم وحش بيكونوا مبدعين أكتر

أغلب الحاجات اللي بنكتبها الأيام دي، سواء لشغل أو لحياتنا الشخصية، بتكون على الموبايل أو اللاب توب، وبقينا نادرا لما نكتب بالورقة والقلم أو نكتب حاجات مكتوبة بخط الإيد، وزمن الرسايل المكتوبة بخط الإيد كمان شبه خلص.

لكن عند الكتابة بخط الإيد، بتلاقي إن فيه ناس كتير خطهم وحش، أو مش منظم أو مش مفهوم أو صعب يتقري، وأحيانا مستحيل.

وإحنا صغيرين في المدرسة، كنا بنلاقي أهلنا والمدرسين بيشجعونا إن خطنا يبقى حلو، واللي كان خطه بيبقى “وحش” كان أحيانا بيتم التنمر عليه، أو انتقاده، أو بيحاولوا محاولات كتير معاه إنه يحسن خطه، وأحيانا كل المحاولات دي كانت بتبوء بالفشل. 

وبعد ما بنكبر، الموضوع أحيانا بيتحول لإحراج وكسوف والشخص اللي خطه وحش بيتجنب إنه يكتب حاجة بخط إيده.

بس هل كنت تعرف قبل كده إن فيه دراسات قالت إن الأشخاص اللي خط إيدهم سيء بيكونوا مبدعين أكتر؟ وده طبقا لعدد كبير من المواقع زي “E Times” و “Write Choice” و “GraphologyWorld” وغيرهم.

أغلب الناس اللي خطهم وحش بيكونوا مفكرين وناقدين، وكمان خط الإيد المختلف غالبا بيقول إن صاحبه شخص مختلف عن العادي والسائد.

أغلب اللي خطهم وحش بيكونوا مبدعين، وأذكياء، وبيفكروا بره الصندوق، وبيتقال إن “قلمهم مش عارف يواكب عقلهم”.

كمان الخط الوحش أحيانا بيعبر عن الاستقلال وعدم التبعية، وإن صاحب الخط بيميل إنه يكون شخص مستقل وعنده أسلوبه الخاص والمتميز.

وأخيرا، ماتزعلش لو خط إيدك مش حلو، كل دي صفات اتقالت عن الأشخاص اللي خط إيدهم سيء، ده غير إن فيه فنانين، ورسامين، وعلماء، ومفكرين، وناس كتير عظيمة ومشهورة خطهم وحش.. والمرة الجاية اللي حد يتريق على خطك أو يحاول يقولك “حسن خطك”، خليه يشوف الموضوع ده.