أكتر 30 سبب منتشرين بيخلوا الناس تنتقد أو تنظر على بعض
الانتقاد والتنظير هما تجارب أغلب الناس في العالم مروا بيهم وغير إنهم مؤلمين للشخص اللي جربهم فهما كمان بيعرضوا الشخص للكسوف والغضب وبيغذوا شعور عدم الأمان عند الشخص وبيحسسوه إنه مش كفاية.. وشبه “Winston Churchill” السياسي البريطاني الانتقاد إنه ألم في جسم الإنسان لكن برضه هو تجربة بتكون مش سعيدة لكن ضرورية عشان تكبر وتتعلم، وقال كمان إن التعرض للانتقاد يعتبر شئ كويس لإنك وأنت مش واخد بالك هتبقى كأنك دافعت عن حاجة.
موقع “psychologytoday” قال في أحد مقالاته إن النقد والتنظير يعتبروا وسيلة لتأكيد السلطة والسيطرة الاجتماعية لكن بيعتبروا برضه وسيلة للتعبير عن شكوى حقيقية أو إن الشخص بيتكلم عن نفسه، أكيد كل المواقف مش مشابهة بس الشخص اللي عنده ذكاء عاطفي هو اللي بيقدر يفهم الفروق البسيطة دي وبيقدر يرد في المواقف اللي زي دي.
وقالت دكتور “ميلاني جرينبيرج” إن فيه حوالي 30 سبب يخلوا صحابك أو شريكك أو زميلك أو حتى حد من معارفك ينتقدك أو ينظر عليك وهما:
1- إن كفاءتك أو جمالك أو كارزمتك حتى يكونوا بيهددوا الشخص ده وبيحاولوا يخلوك على نفس مستواهم.
2- قلقانين من دوافعك أو مستوى مهاراتك أو أدائك اللي بيزيدوا.
3-حاسين إنك مابتقومش بدورك في الشغل مثلا وإنك بتشتغل بشكل فردي مش جماعي.
4- عندهم احتياج قوى مش عارفين يلبوه وماتمش إشباع الاحتياج ده
5- عندهم شخصية مسيطرة وعايزين دايما يكونوا مسيطرين
6- حاسين إنهم يستحقوا معاملة خاصة أو وضع معين هما مش واخدينه
7- عايزين يخلوا شكلك وحش عشان يدعموا موقفهم إنهم يكسبوا ود المديرين أو الروساء.
8- عندهم إحساس بعدم الأمان وبيعوضوه بشكل مفرط
9- بيعتقدوا إنك بتخلي شكلهم وحش قدام الناس
10- حاسين إنك بتنظر عليهم وبيدافعوا عن نفسهم بالهجوم ده
11- معتقدين إنهم بيساعدوك فعلا عن طريق إنهم بيدوك من حكمتهم وخبرتهم
12- عندهم مثلا أراء عن موضوع معين سواء كان في السياسة أو الأمور الاجتماعية وبيشوفوا إن وجهات نظر الناس اللي حواليهم غلط أو أقل صحة منهم
13- بيحاولوا يشدوا انتباهك أو يتواصلوا معاك لكن ماعندهمش مهارات تواصل وبينتهي بيهم الأمر للندب زي الأطفال والمراهقين
14- بيختبروا الحدود عشان يحسوا باستقلالية أكتر
15- بيتنافسوا معاك على المنصب أو المكان اللي هما عايزين يبقوا فيه وأنت بتشكل عقبة على أهدافهم
16- بيشوفوا نفسهم عندهم خبرة في الموضوع ده بحكم تعليهم أو خبرتهم وعايزين يشاركوا معرفتهم معاك وعايزين تبقى معجب بيهم وبأراءهم
17- بيقوا محبطين منك عشان مش حاسين إنك بتسمعهم أو بتستجيب لطلباتهم
18- بيحاولوا يحطوا نفسهم في مواقف عشان يبانوا إنهم كويسين ويقللوا من سلوكهم السيئ
19- بيحاولوا يحطوا حدود مثلا لسلوك المتهور أو غير المحترم
20- بيقوا عايزينك تفهم إزاي أفعالك بتضرهم وتأذيهم
21- بيحاولوا يتنمروا عليك عشان يخوفك أو يحس بالقوة
22- بيحاولوا يدافعوا عن أفعالهم عن طريق إنهم بيشاوروا على أفعال غلط أنت كمان عملتها
23- بيفتقروا المهارات الاجتماعية وبيحاولوا يقدموا ردود فعل كويسة بس من غير مهارة
24- عايزين يحسوا بأهميتهم واحترامهم (وعلى سبيل المثال أفراد الأسرة المسنين)
25- بيداروا مشاعر الزعل والجرح عن طريق الغضب
26- ممكن يكونوا نرجسيين ومابيقدروش يتعاملوا مع مواجهتك أو إنك مابتبقاش موافقهم
27- عندهم مشكلة مش عارفين يتعاملوا معاهم وبيحاولوا يقنعوك تبقى زيهم
28- بيعتقدوا إنك بتتصرف بشكل غير عادل أو بتاخد مميزات أكتر
29- عندهم قيم أو وجهات نظر مختلفة وبيحكموا عليك
30- بيحاولوا يخلوك تبقى مكسوف من نفسك أو مذلول ليهم ممكن كانتقام أو تبقى مسرحية كسب قوة
في النهاية محدش فينا بيحب يتعرض للانتقاد أو التنظير بس هو جزء من التجربة الإنسانية، وفيه أوقات بيكون مجرد لعبة كسب قوة لكن في الأول والأخر ممكن تبقى معلومة قيمة عن فهمك لنفسك وإزاي تتعامل مع الناس في مكان الشغل أو الدراسة أو مع صحابك أو أهلك أو حتى شريكك.
