12 نصيحة حياة الكبار أو الـ Adult Life محتاجاهم منك
كل ما بنكبر كل ما بنحس إن مسؤولياتنا ووجبتنا في الحياة كتروا وده طبعا بيحسسننا بضغط رهيب.. بتبقى طول الوقت محتاج تخلي بالك من شغلك ونفسك وجسمك وحياة الاجتماعية وصحتك النفسية و أهلك وشريكك وحاجات تانية كتير مش هنفضل نعدهم بدل ما تنهار مننا.. ولكن مفيش حاجة بتيجي مرة واحدة كله بالتعود بيظبط فترة بعد فترة.
لو لسه داخل حياة الكبار أو الـ Adult Life دي قريب أو بقالك فترة هناك بس بدأت تتعب منها خلينا نقولك شوية مهارات حياة البالغين دي محتاجها حسب ما قال موقع “businessinsider” عشان تقدر تنجو فيها من غير ما تتعب:
1- تقبل الملاحظات بصدر رحب:
بالنسبة لأغلب الناس صعب يسمعوا إزاي غلطوا أو كانوا يقدروا يعملوا حاجة أحسن.. بس من المهارات اللي محتاجها لما تكبر وهتتعلمها بالممارسة هو إنك تحط مشاعرك على جنب وتركز في المعلومات القيمة اللي بتتقدملك، وممكن تبقى مش كلها مناسبة ليك وجزء منها مناسب بس خلي عقلك هو اللي يقرر ده بعد ما تسمع مش كبرياءك.
2- تتعلم تعتذر بصدق:
إنك تتأسف حاجة سهلة كلنا بنعملها من وإحنا صغيرين بس إنك تعتذر بصدق دي اللي صعبة.. والإعتذار مش بطريقته ولا بكميته لكن أنت محتاج توضح إزاي الفعل ده مش هيتكرر مرة تانية.
3- إدارة الوقت كويس:
أهم درس في إنك تعرف تنظم وقتك كويس هو إنك تلتزم إنك تعمل حاجة واحدة بس في كل مرة، لإن الأبحاث بتقول إن تعدد المهام أو الـ Multitasking بيوصل لنتايج عكسية بشكل عام عشان الدماغ بتبذل طاقة عشان ترجع تركز تاني.. ومن الحكمة برضه إنك تحدد ساعات الشغل لنفسك عشان كتر الشغل هيقلل إنتاجيتك.
4- تقول “لا” باحترام:
كتير مننا بيتكسف أو بيخاف يقول لا عشان مابنبقاش عايزين نكسف الناس، لكن لما يحصل موقف زي إن حد من زمايلك في الشغل يطلب منك تقعد تساعده في الشغل بعد عدد ساعات شغلك فأكيد هترد عليه بالرد الكليشية طبعا وأكيد وعنيا ليك بس عادي أنت تقدر تقول لا لإن فيه حاجات مش هتقدر ترجعها أبدا زي وقتك وصحتك وحياتك وهتعرف ده خصوصا لما تكبر وتبقى محتاج الحاجات دي لنفسك.
5- اتعاطف مع الناس أكتر:
التعاطف جزء أساسي من المشاعر الإنسانية والأشخاص اللي بيفتقروا ده غالبًا ما بيكونوا نرجسيين.
6- تتعلم تكون صداقات في بيئات مختلفة:
الجامعة غالبًأ بتبقى أسهل مكان لتكوين الصداقات وبمجرد تخرجك من الجامعة بيبقى الموضوع أصعب شوية.. لكن حاول تتعلم ده عن طريق إنك تتكلم مع الناس عن نفسك وتقرب ليهم وتبني علاقات وتقضي وقت أكتر مع الناس اللي عايز تقرب منهم.
7- اظبط ميزانية وامشى عليها:
أغلبنا بيحس إنه كبر أصلا لما بيبدأ يصرف على نفسه وبيبقى عنده دخل ثابت.. فمن الحاجات المهمة اللي لازم تتعلمها لما تكبر هو إنك تظبط ميزانية لنفسك وتتأكد إن الفلوس اللي بتدخلك أكتر من اللي بتصرفه وتقسم ميزانية الشهر وماتخرجش براها ومحتاج تتعلم تحوش كمان خصوصا لو عندك خطط مستقبلية زي الجواز أو الخلفة أو السفر عشان في حالة حصل أي ظرف طارئ.
8- قضي وقت أكتر مع نفسك:
كشخص كبير لازم تقدر تقضي يوم كامل مع نفسك من غير ما تحس إنك هتتجن عشان محتاج تفاعل إجتماعي.. واتعلم تخرج الخروجات اللي بتحبها مع نفسك في أوقات عادي محدش فاضيلك فيها.. ولو كنت عايز تعيش لوحدك فاتعلم تقبل إنك هتحس بالوحدة أوقات كتير وأكيد مش هيبقى عيب إنك وقتها تدخل أشخاص وناس بتحبهم في جدول يومك.
9- اتعلم التفاوض أو الفصال يعني:
من المهارات المهمة اللي محتاج تتعلمها لما تكبر هي إنك تعرف تفاصل سواء على مرتبك لو في مكان شغل جديد أو لو وأنت بتشترى حاجة.. وعشان تتأكد إن دي مهارة مهمة في حياة الكبار شوف ماما بتعمل إيه ومش هتلاقي حد أحسن منها يعلمك.
10- اتعلم تطبخ وصفات سهلة حتى:
مش محتاج تبقى الشيف الشربيني لما تكبر يعني بس محتاج تعرف إزاي تعمل الوجبات الأساسية زي الفطار والعشا وتعمل على الأقل 5 طبخات للغدا عشان تقدر تلحق نفسك في أي وقت وفي أي ظروف.
11- اطلب مساعدة عادي:
مفيش أي حاجة تكسف لما تطلب من الناس مساعدة أو نصايح خصوصا في الشغل، لإن النصايح بتطورك أنت شخصيًأ والشخص اللي بتطلب منه نصيحة خصوصًا لو في الشغل بيحس إنك بتشكر فيه بشكل ما.
12- اتعلم تصحى في ميعادك:
عادي وأنت في الكلية كانت تصحى قبل ميعاد المحاضرة بربع ساعة تلبس وتنزل وتروح متأخر ومش مهم اللي يحصل لكن لما تكبر وتبقى شغال لازم تتعلم تصحى في ميعادك، وتعمل ميعاد لنفسك تخرج فيه من البيت وتوصل فيه للشغل في ميعادك، والموضوع بيبدأ من الروتين الليلي ليك عشان تعرف تنام زي إنك تاخد دش سخن قبل ما تنام مش تقعد سهران لحد الفجر وتنام متأخر كل يوم وتستنى إنك تصحى بدري.
