وصفات آيس كريم سهلة تتعمل في البيت

في الجو الحر اللي إحنا فيه ده، بنبقى محتاجين باستمرار نشرب حاجات ساقعة وناكل حاجات ترطب علينا، والآيس كريم من أكتر الحلويات اللي الناس بتحبها، وخصوصا في الصيف، وعشان كده جمعنالكم شوية وصفات سهلة وبسيطة لـ الآيس كريم ممكن تعملها في البيت عشان تروّق عليك في الصيف.

آيس كريم الفواكه:

الوصفة دي ممكن تعملها بأي نوع فاكهة بتحبه.. كل اللي هتعمله إنك هتحط الكمية اللي إنت حاببها في الخلاط، لحد ما تبقى سائل، وتحطها بعد كده في قوالب آيس كريم، ودي ممكن تشتريها من أي مكان بيبيع أدوات منزلية.. وممكن تقطع الفاكهة بتاعتك لشرايح صغيرة وتحطها في القالب كمان مع المزيج.. وتحط القوالب في الفريزر لحد ما تجمد.. وبالهنا والشفا.

آيس كريم الفانيليا:

المكونات: نصف كوباية سكر – ربع معلقة صغيرة ملح – كوباية لبن – صفار ثلاث بيضات – معلقة صغيرة فانيليا – كوبايتين كريم شانتيه. 

الطريقة: هتحط كل المكونات ما عدا الكريم شانتيه في حلة كبيرة على نار هادية، وهتفضل تقلبهم لحد ما يبدأوا يغلوا، وبعد كده تطفي النار وتسيب الخليط يبرد خالص، وبعد كده هتزود الكريم شانتيه على الخليط وتقلبهم كويس، وهتحط كل ده في الفريزر لحوالي 4 ساعات أو لحد ما يجمد.. وبالهنا والشفا.

آيس كريم الشيكولاتة أو الكراميل:

المكونات: كوباية من الشيكولاتة السائلة أو الكراميل.. كوباية من الكريمة السائلة.. وعلبة حليب مركز محلى

الطريقة: هتجمد الشيكولاتة أو الكراميل في الفريزر.. وهتجيب حلة وتقلب كويس فيها الكريمة السائلة مع الحليب المحلى لحد ما حجمهم يزيد ويبقوا شبه الرغوة كده.. وبعد كده هتزود عليهم الشيكولاتة أو الكراميل اللي كنت مجمده.. وتقلب تقلب تقلب.. وهتحط كل ده في الفريزر تاني وتسيبه لحد ما يجمد خالص.. وبالهنا والشفا.

آيس كريم الزبادي بالفواكه:

المكونات: ثلاثة أرباع كوباية من أي نوع فاكهة بتحبه متقطعة شرايح صغيرة – كوباية كريمة سائلة – كوب زبادي أو لبن رايب كامل الدسم – ربع كوباية سكر بودرة.

الطريقة: هتحط الفاكهة في الخلاط، ومعاها الكريمة والرايب أو الزبادي والسكر البودرة، واضرب كل ده مع بعض كويس، وبعد كده هتحط الخليط ده في حلة أو طبق وتغطيه بكيس نايلون، وتحطه في الفريزر لمدة حوالي 6 ساعات أو لحد ما يجمد.. وبالهنا والشفا.

آيس كريم أي حاجة:

لو هتكسل تعمل أي حاجة من الوصفات اللي فوق دول.. فأنت بمنتهى البساطة ممكن تشتري قوالب آيس كريم من أي مكان بيبيع أدوات مطبخ أو أدوات منزلية.. وتحط في القوالب دي حرفيا أي مشروب بتحبه.. عصير بقى أو مشروبات غازية أو أي حاجة حرفيا، وتحطه في الفريزر لحد ما يجمد.. مفيش أسهل من كده واتفضل آيس كريم يبرد عليك في الجو الصعب ده.