10 أسباب بتخليك تكره الطبخ.. وإزاي تتعامل معاهم!

أيا كانت النتايج الجميلة اللي الواحد بيطلع بيها من الوقفة في المطبخ والطبخ أو الخبز وقد إيه هو مريح للنفسية فده مش معناه خالص إن كل الناس بيحبوه فيه ناس بتكره وقفة المطبخ وفكرة إنهم يعملوا أكل بالنسبة لهم بتبقى مزعجة جدا وبيكرهوها حتى لو كانوا مسؤولين عن بيت وأسرة ومضطرين إنهم يعملوا الأكل بنفسهم أو لو عايشين لوحدهم فبيعملوا ده من غير نفس واللي هو زي ما بنقول كده “تقضية واجب”

فيه دراسة عملها باحث اسمه ” Eddie Yoon” في جامعة هارفارد قال فيها إن حوالي 90% من الأمريكان مابيحبوش يطبخوا حوال 45% منهم بيكرهوه والـ 45% التانين مابحبهوش أوي يعني.. وقال إن ده بيكون بسبب زيادة المسؤوليات سواء على الصعيد المهني أو الشخصي.. لكن مش دي الأسباب بس اللي بتخلي الناس مابتحبش الطبخ فيه حوالي 10 أسباب تاني ممكن يخلوا أي حد في الدنيا بيتجنب المطبخ والطبخ زي ما قال موقع “summer tomato” في واحد من مقالاته وقال كمان إزاي نتجنب الأسباب دي عشان نحاول نصلح علاقتنا بالمطبخ:

1- تبقى مابتعرفش تطبخ أصلا:

أول حاجة محتاج تتعلمها هو إنك تفرق بين حبك للطبخ وبين رغبتك في إنك تكون مابتعملش أكل وحش وتعرف تعمل أكل حلو عشان فيه فرق كبير.. وماحدش فينا بيحب بعد ما يبذل مجهود في أكله تطلع وحشة فعلا بس الحل سهل هو إنك تسأل حد أو تتعلم الطريقة صح.

2- بتحس إنك بطئ:

عارفين إن عندك حاجات أحلى ممكن تعملها بدل ما تضيع وقتك في أكلة وممكن تطلع في الأخر طعمها مش حلو ولما يبقى ماعندكش خبرة في المطبخ كمان بتحس إن الموضوع بياخد وقت وطاقة كتير جدا بداية من إنك تنزل تشتري المكونات وتنضفها وتقطعها وتطبخها وكل ده عشان وجبة واحدة بس فليه كل الوقت ده؟ لكن مش هي دي الطريقة الصح اللي المفروض تفكر بيها لازم تعرف إنك بتبدأ تتعلم حاجة من الأول وإنك مبتدأ فعادي إنك تاخد كل الوقت ومع الخبرة مستواك هيبدأ يتحسن وتبقى أسرع.

3- بتستخدم سكاكين وحشة:

السكاكين في أي مطبخ عنصر مهم أوي عشان الأكلة تخلص في وقت أسرع وبتديك إحساس كمان إنك خبرة في المطبخ وبتخليك واثق في نفسك ولما بتججدها أصلا بتخلي عندك دافع تاني تدخل المطبخ بس خلي بالك لو مابتعرفش تستخدمها أو هتعورك ممكن تخلي الخطوة دي بعدين لما تتمرن عليها أكتر.

4- ممكن تبقى بتختار تجرب في وصفات معقدة:

أغلب الوجبات اللي بتعجبك بتبقى فيها 5 مكونات تقريبًا.. فلو كنت لسه مبتدئ بلاش تختار وصفة صعبة أوي وتجرب فيها زي الكلوسلو مثلا.. وبدل ما تدور على أكلة جديدة وتبدأ تعملها دور على أكلة سهلة وابدأ اتعلم فيها.

5- بتختار نوع خضار مش ده الموسم بتاعه:

من ضمن الأسباب اللي بتخلي الناس مابيحبوش الطبخ أو إنهم أكلهم يطلع مش حلو هو إنهم بيجيبوا نوع خضار مش في وقته فبيكون مزروع بطريقة مش طبيعية وطعمه مابيكونش أحلى حاجة.. فعادي انزل عند بتاع الخضار واشتري خضار أو فاكهة من بتوع الموسم المتوفرين حاليًا عشان ده هيغير طعم الأكل.

6- مابيكونش عندك مكونات الأكل كلها:

بيبقي شئ محبط جدًا إنك بعد ما تفكر إنك هتعمل أكله معينة وتبدأ فيها فعلا تكتشف إن ماعندكش زيت زيتون مثلا أو مفيش فلفل أسود أو بهارات.. فلو مش عارف عندك إيه في مطبخك مهم أوي قبل ما تبدأ تختار الأكلة اللي هتعملها تقوم تتأكد إن عندك مكوناتها وبعد كده تبدأ فيها عشان فيه شوية تفاصيل لو ماتضافيتش على الأكلة هتطلع طعمها مش أحسن حاجة.

7- بتسوي الأكل زيادة عن اللزوم:

مش معنى إنك مامتك كانت بتعملك الكوسة لونها غامق إن دي الطريقة الصح اللي المفروض تعمل بيها الأكل.. بعض أنواع الخضار أصلا بتستوي بسرعة وبيكون طعمها أحلى لما تبقى مستوية سوى مظبوط مش داخلة على حرق أو تبقى مهرية يعني.. فأول ما الخضار يتحول لونه للون الأخضر المظبوط ده وتبقى بتتمضغ حلو تبقى كده استوت سوى مظبوط.

8- بتعمل أكل لمجموعة كبيرة من الناس:

مش لازم أول تجربة ليك في المطبخ تبقى عزومة  وتعمل أكلات ضخمة وكبيرة، ابدأ بشوية حاجات بسيطة وابدأ أصلا في الأول إنك تتطوع وتساعد الشخص اللي بيطبخ واعمل معاه طبق بسيط أو وجبة لنفسك وهو جنبك في المطبخ عشان الممارسة دي هي اللي هتوصلك للي أنت عايزة في الأخر خصوصًا لو الممارسة دي بقت بطريقة سهلة وبتخليك تبقة واثق في نفسك.

9- بتعمل أكل بس في المناسبات:

الشخص المبتدئ في المطبخ مابيبقاش محتاج اي ضغط، وعشان كده لو أنت لسه بتتعلم في الأول فهتبقى محتاج تأجل عزومة رمضان شوية عشان الموضوع بيبقى مرهق شوية وأنت مش محتاج ضغط زيادة أو انتقادات أكتر من الناس في المواقف اللي زي دي.

10- مابتطلبش المساعدة:

لو كنت لسه جديد في الطبخ فلازم تعترف إنك هتبقى بطئ في الأول وهتفتقر شوية مهارات أساسية ومش هيبقى عندك نفس الأكل لسه زي بتاع الشخص الخبرة، وأنت أكيد قادر تعمل ده لكن في الأول كده محتاج تسهل الموضوع على نفسك وتستمتع بيه وده مش هيحصل إلا لو سألت الأشخاص اللي عندهم خبرة في الطبخ.

وفي الأخر بعد كل الأسباب دي لسه مقنع إنك مابتحبش الطبخ ولا في حاجات زي كده واقفة قصاد حبك للمطبخ؟