10 أفلام مناسبة لأجواء الخريف
بمناسبة الأجواء الخريفية اللي إحنا فيها دي، بنرشحلكم 10 أفلام ممكن تتفرجوا عليها الفترة دي:
1- When Harry Met Sally
فيلم بيغلب عليه الأجواء الخريفية بيحكي عن “هاري” و”سالي”.. اتنين صحاب يعرفوا بعض من سنين طويلة.. ومختلفين في وجهات نظرهم عن علاقة الصداقة بين الراجل والست.. ولما الحب بيبدأ يدخل بينهم، بيبدأوا يخافوا إنه يأثر على صداقتهم.
2- Harry Potter and The Prisoner of Azkaban
الجزء التالت من هاري بوتر يعتبر من أكتر الأجزاء اللي ممكن تحسسك بأجواء الخريف، وخصوصًا مشاهد كوخ هاجريد اللي حواليه قرع عسلي في كل حتة.. والشجرة السحرية اللي بتنزل ورقها.. وأجواء الفيلم كله مناسبة جدًا للخريف.
3- Dead Poets Society
في وسط مشاهد الخريف، ومشاعر الرجوع للمدرسة بعد زمن.. جون كيتنج بيرجع مدرسته الداخلية بعد ما كان طالب فيها بس المرة دي مدرس، وبيستخدم الشعر عشان يشجع تلاميذه إنهم يعبروا عن نفسهم بشكل جديد.
4- You’ve Got Mail
بيبدأ الفيلم خلال فصل الخريف في نيويورك وبيحكي عن كاثلين كيلي اللي فاتحة مكتبة بيع كتب صغيرة، وبيفتح “جو فوكس” مكتبة كبيرة في نفس الشارع، وبيأثر على مبيعاتها، والاتنين بيتعرفوا على الإنترنت من غير ما يعرفوا بعض حالة حب بيعيشها اتنين متخانقين على أرض الواقع، لكن على الإنترنت بيجمعهم الشات، لحد ما بيقرروا يتقابلوا في الحقيقة وتحصل المفاجأة.. وإتفرج أنت عالباقي بقى!
5- Legends of The Fall
في أوائل القرن العشرين، فيلم بيحكي عن 3 أخوات ولاد وأبوهم عايشين في البرية وبيتأثروا بقصص مختلفة عن الخيانة والتاريخ والحب والحرب.
6- Good Will Hunting
من أحلى الأفلام اللي ممكن تتفرج عليها في الخريف.. فيلم بيحكي عن ويل هانتنج، اللي بيشتغل عامل نظافة في معهد ماساتشوستس للتكنولوجيا، وعنده موهبة كبيرة جدا في الرياضيات، بس بيحتاج دكتور نفسي عشان يساعده يلاقي نفسه والحاجة اللي هو عايزها
7- The Blind Side
فيلم بيحكي القصة الحقيقية لـ مايكل أوهير، الأمريكي من أصل أفريقي اللي كان مشرد وعنده صدمة نفسية وبقى لاعب كرة قدم أمريكي وتم اختياره للدورة الأولى في الدوري الوطني لكرة القدم الأمريكية بمساعدة “ساندرا بولوك” وعيلتها اللي تبنته ودعمته واهتمت بيه.
8- Mona Lisa Smile
في أجواء خريفية وأجواء عودة الدراسة والجامعات، الفيلم بيحكي عن “كاثرين آن” اللي بتدرس فنون في مدرسة بنات كبيرة ومرموقة، وهي ست عصرية ومنفتحة جدا وبتبدأ تعلم البنات إنهم يفكروا في أدوارهم الاجتماعية “التقليدية” المفروضة عليهم.
9- Sweet November
فيلم بيحكي عن مدير تنفيذي مدمن شغل بيقابل ست عفوية وغير تقليدية وبيتفقوا على علاقة مع بعض لفترة قصيرة.. بس في الفترة القصيرة دي الست بتغير حياته كلها.
10- October Sky
فيلم بيحكي قصة حقيقية في الخمسينيات عن هومر هيكام، طفل عنده مستقبل واحد بس وهو إنه يشتغل في منجم فحم زي أبوه، لكن كل حاجة بتتغير لما بيدخل أول قمر صناعي “سبوتنيك” في مداره، وبيبقى مصدر إلهام لهومر وغيره من الطلاب لتعلم كيفية بناء الصواريخ. ومعظم سكان المدينة بما فيهم والد هومر بيشوفوا إن ده تضييع وقت، ماعدا مدرس واحد بس في الثانوية بيستوعب حماسهم وبيعلمهم.
