نصايح عشان تشتت عقلك وتعيد توجيه أفكارك 

أوقات ضغوطات الحياة بتجبرنا مانفصلش عن اللي بيحصل فيها وبتضغطنا أكتر وبنلاقي نفسنا في الأخر مش مضغوطين بس من الروتين اليومي لا ده بنتضغط أكتر من أي مشاكل بتظهر قدامنا في تفاصيل الروتين اليومي ده سواء كانت المشاكل دي في الشغل أو العلاقات أو الصحاب أو الأهل أو حتى حال الدنيا والأخبار.. ومش كل الناس بتبقى قادرة تسافر عشان تفصل أو تعمل حاجة جديدة تفصل بيها.. فالأفضل إنهم يشتتوا نفسهم بأي حاجة.

تشتيت الانتباه ده بس مش بيكون على المواقف الكبيرة.. ممكن يكون كمان على مواقف تانية زي مثلا لو عندك قلق أو توتر أو أفكار سلبية ممكن تسببلك “Panic attacks” أو توصلك لمرحلة وحشة من الاكتئاب بتبقى لازم تقطع الدايرة دي وتلهي نفسك وتفكر في حاجة تانية وبالذات لو حاجة تشتت انتباهك.. موقع “uhhospitals” قال في واحد من مقالاته على طرق مختلفة تستخدمها لو عايز تلهي نفسك وتشتت انتباهك وهي زي:

1- العب لعب بتعتمد على الذاكرة:

زي إنك تبص لصورة مثلا فيها مناظر مدينة أو مشهد زحمة لمدة 5 أو 10 دقايق بعدين اقلب الصورة وحاول تفتكر أكبر تفاصيل من الصورة بدماغك على قد ما تقدر أو تحاول ترسم الصورة في دماغك زي ما كانت

2- فكر في شكل فئات:

اختار نوع معين من أي حاجة في الدنيا ليها فئات زي الآلات الموسيقية مثلا أو أطعمة الأيس كريم أو أنواع الثدييات أو مين هما اللاعيبة اللي في فريق كرة القدم المفضل ليك! وخد دقيقتين كده مثلا تسرد فيهم أكبر كم وعدد من الحاجات دي في دماغك

3- استخدم الحساب والأرقام:

حتى لو أنت شخص مابيحبش الرياضيات والحساب بس الأرقام والعمليات الحسابية هتساعدك تبقى أحسن.. يعني مثلا افتكر جدول الضرب في دماغك أو عد بشكل تنازلي من 100 أو اختار رقم واقعد فكر في طرق تقدر من خلالها تكون الرقم ده أو ده يبقى النتايج بشوية مسائل حسابية زي (6 + 11 = 17، 20 – 3 = 17، 8 × 2 + 1 = 17)

4- اقرأ حاجة:

زي مثلا قصيدة أو أغنية أو كتاب أنت حافظة كويس أوي أقراه لنفسك بكل هدوء في دماغك، ولو قولت الكلام بصوت عالي حاول تركز في شكل كل كلمة وهي طالعه من شفايفك بتبقى عاملة إزاي، ولو قولت الكلام في دماغك بس فكر في تصور كل كلمة.

5- ضحك نفسك:

فكر في ألشه أو نكتة سخيفة أو تتفرج على فيلم كوميدي أو مسرحية بتحبها بتضحكك أو تشوف برنامج بتحبه أصلا وتركز فيه أو أي حاجة تانية بتضحكك اعملها.

6- كون جمل عنك وعن حالتك:

زي مثلا قول في دماغك “أنا اسمي كذا وعمري كذا سنة وعايش في البلد الفلانية في محافظة كذا والنهاردة يوم كذا كذا والساعة دلوقتي 11 الصبح وقاعد لوحدي على المكتب والمكتب فاضي مفيش حد غيري وممكن تزد أكتر في الجمل دي زي إن الدنيا بتمطر برا بس أنا لسه شايف الشمس ودلوقتي ده وقت استراحتي وأنا عطشان فهقوم أعمل شاي”.

7- فكر في مهمة يومية بتحب تعملها أو ماعندكش مانع تعملها: 

لو كنت بتحب غسيل الهدوم مثلا ففكر الهدوم لما بتطلع من المجفف بتبقى دافية وناعمة وإن وزنهم بيبقى خفيف في سبت الغسيل وإنهم بيبقوا شكلهم مرفوع كده وإنك بتحطهم على السرير عشان مايتكرمشوش وبعدين تطبقهم، بالنسبة للفوط فأنت بتقسمها نصين بعدين تلاتة وهكذا.

8- أوصف مهمة بتعملها باستمرار:

زي إنك تفتكر في حاجة بتعملها كويس جدا وبتعملها كتير كمان زي إنك بتعمل قهوة أو شاي أو بتروق السرير أو المكتب أو بتظبط آلة موسيقية، اشرحها لنفسك كأنك بتشرح لشخص تاني تعلمات إنه يعملها.

9- تخيل نفسك بتسيب كل المشاعر المؤلمة دي:

زي إنك تجمع مشاعرك وتحطها في صندوق، أو تقوم تتمشى أو تجري أو تعوم أو تركب عجل أو تتخيل أفكارك كأنها أغنية أو برنامج تلفزيوني مش عاجبك وأنت بتغير القناة أو بتوطي الصوت وهما لسه موجودين برضه بس أنت مش سامعهم.

10- اوصف اللي حواليك:

اقعد دقايق كده بتحاول تلاحظ اللي بيحصل حواليك.. وفكر في أكبر قدر من التفاصيل زي الكرسي ده أحمر لكن اللي هناك أخضر والجو دافي وأنا قاعد في الشمس، والشجر لونه أصفر وريحة الهواء زي الدخان، وأنا سامع أطفال بيلعبوا وكلبين بيهوهو.

في النهاية إنك تلهي نفسك مش حاجة سهلة وممكن تحتاج شوية وقت وتمارين بس ماتبطلش تعمل كده لإنه هيساعدك كل ما تضايق أو تغضب أو تدخل في أي مشكلة.. وحاول تعمل التمارين دي بدري في أول ما تحس بالمشاعر السيئة ومش لازم تستني لحد ما الموقف ومشاعرك يكبروا.