أكلات ومشروبات تاكلها بليل في الشتاء عشان وزنك مايزيدش

أغلبنا في فصل الشتاء بنبقى عايزين حاجة تحتوينا في البرد والأجواء الشتوية ومابنلقيش غير الأكل يقف جنبنا ويحتوينا خاصة بليل قبل ماننام بس للأسف بنيجي على أخر الشتاء نكتشف أن وزننا زاد ونندم على الجريمة اللي عملناها عشان كده في الموضوع ده هنرشحلك أكلات تاكلها بليل لو حسيت إنك عايز احتواء تدفيك وفي نفس الوقت سعراتها الحرارية تكون قليلة وفقا ل  alarabiya وelconsolto

الفاكهة الغنية بالألياف:

زي الجريب فروت اللي بيساعد على تقليل الدهون في الجسم و التفاح لأنه غني بالألياف وبيساعد على الشعور بالشبع وكمان الفراولة والتوت اللي فيهم ألياف وفيتامين C هيقوي كمان مناعتك وكمان الكيوي اللي بيحتوي على فيتامين k وC  وحمض الفوليك وبرضه ألياف هتساعدك تحس بالشبع ومانساش طبعا الفاكهة الرسمية للشتاء اللي مليانة فيتامين C البرتقال واليوسفي.
وتقدر تاكل فواكه تانية كتير بس تتاكد من سعراتها و إنها غنية بالألياف وأرجوك أبعد عن الفاكهة اللي سعراتها عالية عشان هتندم..

المشروبات :

تقدر تشرب مشروبات كتير اوي بس أهم حاجة تكون من غير سكر
تقدر تشرب مياه كتير عارفين انه صعب في الشتاء بس حاول ..وتقدر تشرب الأعشاب: زي الينسون والنعناع والتيليو والكركديه والقرفة
والزنجبيل بالليمون وأي حاجة نفسك فيها بس من غير سكر
كمان تقدر تشرب شاي أحمر وشاي أخضر وقهوة وبرضه من غير سكر
وابعد عن الهوت شوكليت والسحلب بالمكسرات وأتقي الله

الأكلات:

السلطة الخضراء بلا منازع من أكتر الحاجات اللي مليانة فيتامينات وألياف وفي نفس الوقت بتحافظ على وزننا
شوربة الخضار: من أكتر الأكلات اللي بتدفي وبتشبع وكمان مفيدة لجسمنا
الحبوب الكاملة والبقوليات: بتساعد على الاحساس بالشبع ونقدر كمان نأكل مكسرات بس بكميات قليلة

وممكن تاكل أكلات غنية بالبروتين بس برضه تراعي كمية السعرات اللي جسمك بياخدها وماتتقلش.. لكن طبعا من أهم النصايح هي إنك بلاش تاكل بليل أحسن حاول تنام بدري وتبطل “أوفرثينكينج”.