ليه بنصرف فلوس كتير واحنا زعلانين؟

أوقات كتير لما بنبقى مكتئبين أو مرينا بيوم وحش بنلاقي رغبتنا الشرائية تضاعفت ونفسنا نشتري كل حاجة و أي حاجة حتى لو مالهاش لازمة بس حاسين إن ده هيخلينا نحس أحسن ويعوضنا على اللي مرينا بيه..
عشان كده في الموضوع ده هنقولك السر وراء الحوار ده وفقا لموقع  psychologytoday و verywellmind و experian

في مصطلح في علم النفس اسمه emotional spending وده بيوصف الحالة اللي الإنسان فيها بيصرف فلوسه كرد فعل للمحفزات العاطفية والمشاعر زي ( القلق والتوتر والخوف والذعر والإرهاق والغضب وانعدام الأمان)
اللي بتحصلنا فجأة وبتأثر علينا.. وده بدل ما يكون ناتج عن رد فعل واعي من احتياجات عقلانية ..

وغالبا الأشخاص اللي بيعانوا من التوتر بيصرفوا اكتر على المنتجات اللي بيعتبروها ضرورية لإن ده بيديهم  إحساس بالسيطرة لما بيحسوا إن الدنيا مقلوبة حواليهم وحياتهم خارج السيطرة.
وخبراء الصحة النفسية بيشوفوا إن ده سلوك دفاعي بيستخدمه الإنسان لما بيحس بمشاعر سلبية عشان يقدر يتجنب المشاعر الصعبة اللي حاسس بيها.

والدكتور النفسي “فورمان” قال “إن القليل من الإنفاق العاطفي يمكن أن يكون مفيدًا للروح” لكن لما بيكون الصرف آلية التكيف اللي بنستخدمها دايما بيقى في عواقب وخيمة على الشخص زي الديون الخارجة عن السيطرة.
والدكتور “نيثرتون”: بيقول “يصبح الأمر مشكلة عندما يجد الناس أنفسهم ينفقون بطرق لا تتفق مع قيمهم أو مع أهدافهم فيما يتعلق بأموالهم ووقتهم” وهنا بتظهر فعلا المشكلة..

طيب امتى تعرف إن فعلا في مشكلة؟

– لو بتصرف الفلوس بشكل متهور وبعدين ترجع تندم
-لو بقى عندك ديون جديدة ومش عارف تسدد القديمة
-لما بتصرف وأنت متضايق والصرف بيخليك تحس أحسن على المدى القصير

-ولو طلعت بتعاني من المشكلة دي جمعنالك شوية خطوات تخليك تقلل من الإنفاق العاطفي:

-حاول تعمل ميزانية تجيب بيها حاجات لنفسك عشان تكافئها بيها بس ماتخرجش عن الميزانية دي
-اعرف شعورك وحاول تتعامل معاه لما تيجي تشتري حاجة فكر قبلها هي بدافع شعور معين ولا أنت فعلا محتاجها
-حاول تلاقي طرق صحية للتعامل مع مشاعرك زي إنك تتمشى شوية أو تقابل صديق ليك أو تتفرج على فيلم أو مسلسل بتحبه أو حتى تاخد حمام دافي وتريح شوية
-حاول تبعد نفسك عن الوسائل اللي بتشجعك على الصرف زي إعلانات السوشيال ميديا والجروبات اللي ليها علاقة بالمنتجات

في الأخر كلنا بشر وبيمر علينا أوقات صعبة ومش عيب إننا ندلع نفسنا من وقت للتاني و نكافئها بس المهم تكون حاجة فعلا مفيدة لينا ومش هتعملنا مشاكل مادية أكتر بعدين أو مجرد فرحة لحظية..