اعرف فوائد الـ journaling “العلاج بالكتابة”

زمان وإحنا صغيرين كنا بنكتب مذكراتنا ونخبيها وبيكون فيها كل حاجة بنحس بيها وساعات بنكتب جوابات لناس في حياتنا نقولهم فيها إحنا حاسين بإيه ونديهالهم.. وعلى الرغم إن زمان كنا بنشوفه فعل بسيط أو تافه وبطلنا نعمله لما كبرنا لكن العلاج النفسي بالكتابة من أكتر الحاجات الفعالة اللي كلنا محتاجين نعملها خاصة لو بنعاني من التوتر أو الاكتئاب
أو القلق..

وهتكون فكرة حلوة ومناسبة  وهتساعدك تحسن من حالتك النفسية
وده وفقا لموقع جامعة rochester وموقع betterup

إيه هو الـ journaling:

هو كتابة مشاعرك بشكل يومك زي المذكرات كده.. لما بتحس بالقلق أو الحزن أو يحصلك أي حاجة تخليك مش مرتاح نفسيا.. وكتابة اليوميات مش شيء فيه صح و غلط أو ليه قواعد ميزته إنه بيخليك تكتب بطريقتك وبالشكل اللي تفضله المهم تكتب اللي في دماغك واللي حاسس بيه من غير خوف.. وده هيساعدك تفهم نفسك وتعرفها بشكل أفضل وكمان تطور من شخصيتك مع الوقت..

و في دراسة أتعملت في جامعة كامبريدج سنة 2018م أتطلب من المشاركين فيها الكتابة عن أعمق أفكارهم ومشاعرهم المتعلقة بالأحداث المرهقة أو المزعجة في حياتهم وبعد 4 أشهر  لقوا إن اللي كتبوا عن تجاربهم لمدة 15 دقيقة يوميًا نسبة زياراتهم للدكاترة قلت وبقوا بيتعبوا أقل.

والكتابة ليها فوايد كتير زي إنها:

1- بتخلينا نعبر عن نفسنا بطريقة صحية بعيدا عن الغضب أو كتمان المشاعر اللي بيخلينا نتعب نفسيًا أكتر أو نحس إن طاقتنا خلصت ومش عارفين إيه السبب..

2-بيساعد في تحسين الحالة النفسية ويقلل من القلق والتوتر من خلال إنه بيخليك تتابع مشاعرك كل يوم وده بيخليك تعرف إيه الحاجات اللي بتضايقك عشان تقدر تتحكم فيها مع الوقت..

3-كمان  بيساعدك تحدد أولوياتك وإيه هي المشاكل والمخاوف اللي بتواجهها فعلا وبيديك فرصة تكون بتتكلم مع نفسك كل يوم وتقدر تعرف مشاعرك بشكل أفضل..

4- بيديك فرصة أنك تحس بالامتنان للحاجات اللي بتملكها في حياتك وتقدر تلاحظ  من خلال الكتابة إيه الحاجات الحلوة اللي حصلت في يومك؟
وتقدر تشوف حب اللي حواليك ليك.. وده بيقلل من المشاعر السلبية وبيخليك تكون شخص متفاؤل أكتر .

5-بيساعدك تتعالج من من الصدمات اللي حصلتلك زمان والتجارب الصعبة اللي مريت بيها .. وفي دراسة عملتها جامعة ديوك على المشاركين اللي أتعرضوا لصدمات صعبة من فترة قريبة.. خلوهم يجربو إنهم يكتبوا لمدة
6 أسابيع وكانت عبارة عن تمارين كتابية مختلفة من ضمنها كتابة اليوميات التعبيرية والشعرية وغيرهم..

ولقت الدراسة أن الكتابة زودتت من مرونة المشاركين بشكل عام وقللت من نسبة التوتر اللي بيعانوا منها.


6-بتساعدك تحقق أهدافك..من أكتر الحاجات اللي بتخليك تسعى لتحقيق أهدافك وتكون متحمس ليها إنها تكون قدامك دايما وشايفها عشان تقدر تتصورها بشكل واضح.


وبنفكرك إن الكتابة مجرد عامل مساعد ليك بس مش هي الأساس في كل الحالات النفسية .. لو حاسس إن في حاجات مضايقاك ومأثرة عليك ده مايمنعش إنك لازم تزور دكتور نفسي وتتكلم معاه يساعدك أو تطلب الدعم من الدايرة القريبة اللي حواليك عشان تحافظ على صحتك النفسية وتكون
أفضل..