اعرف أنواع الصداع وإزاي تهرب منه
الصداع هو أسوأ رفيق ممكن يلازمنا وأكتر حاجة بتقلب مودنا وتخلينا مش عارفين نركز لا في شغلنا ولا في مذاكرتنا.. وكمان بتخلينا متعصبين لأننا مش عارفين سببه إيه ولا نوعه.. وبنبدأ نحط توقعات خيالية عن سببه.. ونقول غالبًا من الحر وتغيير الفصول أو لو بنسهر أو مش واكلين كويس بيبقى ده أول تفسير بنطلعه.. لكن الصداع ده ثعباني مش بالسهولة اللي فاكرينها.. عشان كده في الموضوع ده هنقولك أنواع الصداع المختلفة وأسبابها وفقا لموقع cnn وموقع webteb
1-صداع التوتر:
ده من أكتر أنواع الصداع المنتشرة وغالبا بيكون بسبب القلق أو الاجهاد.. بيكون الألم فيه من الناحيتين وبتحس إنك تقلان أوي
ومش طايق تسمع صوت جنبك ولا حتى طايق النور..والألم بتاعه بيقعد 30 دقيقة وممكن يوصل لـ 7 أيام.
2-الصداع النصفي:
وده أسبابه لسه مش واضحة بشكل كامل.. وبيكون في جنب واحد من الرأس وممكن تحس بضباب أو تغيرات في الرؤية وبيكون الشخص أحيانًا حاسس بغثيان أو قيء وبرضه مش طايق يسمع حاجة جنبه ولا يشوف ضوء والصداع ده ممكن يقعد لساعات أو أيام.
3-صداع الجيوب الأنفية:
وده الصداع الرسمي للفترة اللي احنا فيها خاصة لمرضى الجيوب الأنفية لأنه بيحصل بسببها.. وبيكون على جنب واحد او جنبين من الوجه.. وبنحس بألم شديد لو دوست على وشك.. وممكن تحس بوجع في سنانك وسيلان في الانف وعطس.
4-الصداع الثانوي:
وده بيعتبر عرض مرضي لأنه بيحصلنا نتيجة لمرض أو حالة بتأثر على دماغنا.. زي الارتجاج ومشاكل الأوعية الدموية وأب حاجة متعلقة بمرض عشان كده لازم نزور دكتور ونعرف سببه.
5-الصداع العنقودي:
وهو مالوش سبب محدد لكن بعض الدكاترة بيقولوا إنه مرتبط بعوامل وراثية..
ويعتبر نوع نادر من الصداع ومؤلم جدا.. وبيحصل في جنب واحد من الرأس وغالبا بيحصل ورا عين واحدة.. وممكن يسبب شوية اعراض معاه زي إن عينك تحمر ويجيلها انتفاخ فجأة أو تبدأ تدمع.. وممكن يستمر معاك لمدة 3 ساعات متواصة.
6-الصداع الناتج عن الجفاف:
وده بيحصل بسبب قلة شرب المياه وإن الجسم بيكون مش واخد كفايته منها.. فقوم أشرب كده وروق على نفسك عشان مايجيلكش صداع كمان.
7-صداع المرتفعات:
وهو بيكون متعلق بالمرتفعات زي تسلق الجبال وبيسبب ألم شديد في جبهة الرأس أو ممكن يوصل للرأس كلها.
ودي شوية نصايح هتحميك من الصداع وفقًا لموقع altibbi
1- حاول تنام الفترات اللي جسمك محتاجها عشان جسمك يكون مستريح
2-حاول على قد ما تقدر تتجنب المشروبات اللي فيها كافيين وتبدلها بمشروبات وأكلات صحية
3-حاول تمارس الرياضة على قد ماتقدر حتى لو هتتمشى شوية
4-حاول تسترخي وابعد عن الحاجات اللي بتخليك تتوتر وتجهد نفسك
وأهم حاجة لازم تعملها إنك لو لاحظت أي صداع غير طبيعي ومطول معاك ماتعتمدش على سيرش جوجل وتجرب تاخد أدوية وعلاج من نفسك لأن ده ممكن يأذيك أكتر ويسببلك مشاكل أكبر فالأفضل إنك تروح لدكتور يقول سبب الصداع إيه وإزاي تعالجه.
