حاجات متصنفة كمخدرات ممكن نكون مش عارفينها

النهاردة 26 يونيو بيوافق اليوم العالمي لمكافحة إساءة استعمال المخدرات والاتجار غير المشروع بيها.. واليوم هدفه توعية العالم كله بخطر المخدرات على المجتمع والبشر.. وزي ما في أنواع من المخدرات معروفة في أنواع تانية مابتبقاش واضحة عشان كده هنقولكوا في الموضوع ده على شوية حاجات بتتصنف كمخدرات وإحنا ممكن نكون مش عارفينها كلها!


في أدوية كتير بنستخدمها زي أدوية البرد والكحة.. تم تصنيفها ضمن المواد
المخدرة في مصر وفقًا للعربية
زي دواء كونجستال بس مش الأقراص  “شراب كونجستال” عشان فيه نسبة من المادة الفعالة أكبر.. ودواء توسكان وتوسيفان.. وكان القرار صادر سنة 2011م لإنهم بيحتووا على نسبة معينة من مادة الكافيين لكن القرار ماتمش تطبيقه غير سنة 2021م وتم إضافتهم ضمن 14 دواء تاني من أدوية البرد اللي بيستخدمها لمصريين من غير مايستشيروا الدكاترة.

ووفقًا لموقع drugs.ie  بتتصنف المخدرات لـكذا نوع من ضمنهم:

1-المثبطات Depressants: زي الكحول اللي بيسبب تصفية الذهن وتقليل القلق

2-المهدئات ومضادات القلق زي أدوية البينزوديازبين والفاليوم واللي في دكاترة بتكتبها كمهدئات أو منومات بليل لكن ممكن  تسبب الإدمان بطرق مختلفة لو اسأت استخدامها

3-الأفيونات أو المسكنات المخدرة: ودي بتكون مسكنات قوية بتسبب شعور بالسعادة وتخليك نعسان من ضمنها مواد زي : الأفيونات المورفين، والهيروين، والميثادون.

4- المنشطات: وهي نوع من المخدرات بتخليك منتبه ونشيط أكتر زي الكوكايين والأمفيتامينات (منشط بيستخدم لعلاج بعض الاضطرابات النفسية)

5-المهلوسات: هي نوع من المخدرات بتولد أوهام غريبة وشديدة زي الهلاوس ومن ضمنها  حمض إل.سي.دي وعش الغراب السحري اللي بيسبب هلاوس وبيتم أكله أو طبخه وفي ناس بتشربه كشاي.

6-نبات القنب: وهو نبات طبيعي بيتم تعاطيه عن طريق لفه مع التبغ في سيجارة لكنه برضه في ناس بتطبخه وتأكله في بلاد تانية.

7-وفقًا لموقع webteb بذور جوزة الطيب من المواد اللي ليها  خصائص مخدرة ومهلوسة ولو تم  إساءة استخدامها ممكن تسبب تأثيرات نفسية سلبية على الشخص.

8- زهرة الخشخاش المخدرة أو المنومة: اللي بيستخلص منها نبات الأفيون رغم إن ليها فوايد واستخدامات تانية

فخلي بالك بقى من أي دواء أو مواد بتستخدمها في حياتك اليومية تكون تحت إشراف دكتور متخصص عشان ماتعرضش نفسك لأي ضرر