إزاي تربي طفلك بيحب نفسه وواثق فيها؟

من الحاجات الصعبة اللي بنواجهها وإحنا كبار هي إنك ماتكونش عندك ثقة في نفسك ولا بتحب نفسك بشكل كافي.. عشان ده هيخليك تتأثر بشكل كبير في كل تعاملات الحياة سواء دراسة أو شغل أو حتى حياة اجتماعية.. فا حبينا نقولك إزاي تربي طفلك يطلع عنده ثقة في نفسه وكمان بيحبها 

حسب منظمة الصحة العالمية ومنظمة ChildMindInstitute

الأطفال وهي بتكبر في السن بيمروا بتجارب وبيكون عندهم مهارات وكمان قدرات معينة بس كل ده محتاج عامل مهم وهو “الثقة بالنفس” عشان يعرف يطور الحاجات دي وكمان يقدر يتعامل مع الفشل ويتعافى منه 

12 حاجة محتاج تعملهم وإنت بتربي طفلك:

1- أول حاجة ماتضايقش من الغلطات:

لازم توريه إن كل الناس بتغلط وإن المهم إنه يتعلم مش يركز على الغلط.. الشخص مش هيخاف من الفشل مش عشان مابيغلطش بس لو عارف إزاي هيتعامل مع الغلط أو الوقعة اللي بيقابلها

2- تاني حاجة لازم توريله ثقتك بنفسك:

إنت ممكن تكون مش واثق من نفسك أوي بس لازم على الأقل تبين إنك واثق من نفسك قدامه.. فا تبقى داخل على الحاجات بشغف وتفاؤل ومش معنى كده إنك تتظاهر بالكمال.. مافيش مانع من شوية قلق صغيرين ودايمًا ركز على الحاجات الإيجابية في كل موضوع

3- خليه يجرب حاجات جديدة:

هتلاقيه مميز في حاجة وبيعرف يعملها كويس.. بس التنويع مهم جدا فا اديله مساحة إنه يجرب حاجات جديدة ويبقى واثق إنه يتقدر يتعامل مع كل حاجة بكل أشكالها

4- خليه يفشل:

إحنا عندنا بعبع اسمه “الغلط” وبنخاف منه ومابنحبش عيالنا يقعوا فيه.. بس التجربة والغلط من أفضل طرق التعليم وبيساعده يعرف إن مش كل غلط بيكون نهاية العالم بالعكس ممكن تكون نقطة بداية قوية

5- المعافرة والمجهود:

احترام النفس مش محتاج نجاح على طول عشان يبقى موجود.. إنما الاستمرار في المحاولة وإنك تبذل مجهود مرة واتنين وتلاتة ده بيديك ثقة واحترام لنفسك برضه وعشان كده محتاج تشجعه على إنه مايستسلمش

6- ساعده يلاقي شغفه:

عشان الطفل يحس بوجوده ويعرف نفسه أكتر محتاج ينط في بحر الاهتمامات ويجرب ومنها يتعرف أكتر على نفسه والثقة تزيد خصوصا لو شاف موهبته بتطور وبيحقق تقدم ونجاح

7- حطله أهداف:

أهداف كبيرة وصغيرة كده خصوصا الصغيرة بتخليه يحس بالقوة وساعده يحول الأهداف دي لحاجات محققة ويحس إنها قابلة للتنفيذ وده بإنك تخليه يكتب أو يعمل قايمة كده بالحاجات دي وساعده كمان إنه يقسم الأهداف الكبيرة على المدى الطويل 

8- احتفلللل:

لازم الطفل يحس إن الإنجاز اللي حققه في حد بيقدره ومعترف بيه.. فا إنت محتاج تشكره ومش بس كده لأ تقوله إنك فخور بيه وده حتى لو ماحققش الحاجة ووصل لنتيجة نهائية عشان تقدير المجهود بيكون مشجع للطفل 

9- المشاركة:

الطفل بيحس بقيمته وبيحس إن هو مرتبط بيك أكتر لو حسسته إنك محتاجه وإنك معتمد عليه.. لما يشوف أهله محتاجينه دي حاجة مهمة وكبيرة بالنسبالهم

10- تقبل العيوب:

لازم يعرف إن مش كل اللي ظاهر صح وإن الناس ممكن تكون بتظهر إنها حياتها كويسة وناجحة ومافيش أي مشاكل لكن لازم تعرفه إن الكمال دي حاجة مستحيلة فا لازم تتقبل العيوب اللي موجودة عندك

11- جهزه للنجاح:

التحديات حلوة مافيش كلام.. بس حاول تحط الطفل في اختبارات وحاجات يقدر ينجح فيها ومن هنا هيكتسب الثقة وده هيساعده يواجه التحديات الكبيرة بقى

12- الحب:

لازم تخليه يعرف إنك بتحبه مهما كان وتاخد الفنان “توفيق عبدالحميد” قدوة وتقوله سواء غلبت أو اتغلبت أنا فخور بيك.. حتى لو إنت متعصب منهم بلاش تطلع العصبية بشكل سلبي عشان ماتهزش ثقته بنفسه ولازم تحسسه إنك بتحبه في الوحش قبل الحلو