ليه في ناس بتلفت نظرها الحاجات الكيوت؟

عادة مصطلح كيوت بيبقى مرتبط أكتر بالحاجات الصغيرة زي الأطفال اللي لسه مولودين أو الحيوانات الأليفة الصغيرة والألعاب الصغيرة أو أي حاجة حجمها صغير وألوانها مبهجة.. وفي بعض الناس بيلفت نظرها الحاجات دي وبتتبسط لما بتشوفها وكمان بتحب تشاركها على السوشيال ميديا.. عشان كده هنقولك في الموضوع ده ليه في ناس بتحب الحاجات الكيوت؟ وفقا لموقع  ox.ac و موقع mentalfloss:

وفقًا لموقع جامعة أكسفورد من خلال بحث عملوه لقوا إن الحاجات الكيوت بتأثر على دماغنا عن طريق إنها بتشرك حواسنا وتجذب انتباهنا ليها من خلال إثارة نشاط الدماغ بشكل سريع.. وده بيساعد في تشكيل سلوكنا المتعاطف معاها.. زي الأطفال مابيقوا كيوت و الصفات دي بتجذبنا ليهم وبما إن الأطفال بيحتاجوا للرعاية من خلال لفت نظرنا بيقدروا ياخدوا مننا العناية والاهتمام.

عشان كده البحث بيقول إن الحاجات الكيوت ممكن تخلينا أشخاص أفضل.. لأن الجمال بيحفز عملية معالجة بطيئة ومستدامة في المخ في الشبكات الدماغية المرتبطة بالعاطفة والمتعة والتفاعلات الاجتماعية والأنشطة زي تربية الحيوانات الصغيرة بتحفز جوانا التعاطف والرحمة.. وكمان تنشيط الشبكة دي من نشاط المخ  بتخلي عندنا اهتمام أخلاقي بالحاجات اللي حوالينا زي إننا ممكن نساعد الحيوانات الصغيرة لما نلاقيها بتعاني.
ودي شوية أسباب تانية بتخلينا نميل للحاجات الكيوت:

1- إن الحاجات الكيوت بتخلي الدوبامين يتدفق وبيخلينا مبسوطين حتى الأفعال اللطيفة من مجرد ما بتحصل دماغنا بتطلق السيروتنين والدوبامين اللي بيسببوا السعادة.

2-الحاجات الصغيرة بتخلينا نوفر لها الرعاية.. بعض الأبحاث بتقول إننا مش بس بنفتكر إن الحاجات الصغيرة لطيفة وبس لا إحنا كمان ساعات بنشوفها أصغر من حجمها الحقيقي.. زي الأم بتشوف طفلها الصغير بشكل أصغر مما هو عليه أو أقصر وده بيخليها تخصص له قدر أكبر من الرعاية.

3- اللطف بيخلينا نهتم أكتر بالحاجات وبيخلينا أشخاص ودودين.. وفي دراسة اتعملت سنة  2009 لقت أن المشاركين اللي شافوا صور لطيفة لكلاب وقطط صغيرة حققوا أداءً أفضل من المشاركين اللي شافوا صور مش كيوت أوي للكلاب والقطط.

4- اللطف بيحسن أدائنا وبيخلينا نخلي بالنا ونحافظ على الحاجات أكتر  لإننا عارفين إن الحاجات الأصغر سهلة الكسر وده وفقًا لبحث عمله هيروشي نيتونو وزمايله في جامعة هيروشيما في اليابان.

5-إننا بنعتقد إن الأشياء الصغيرة اللي شكلها كيوت مستحيل تأذينا ومستحيل نحس منها بأي شعور بالتهديد.. وكمان بنحس إننا المسيطرين عليها ونقدر نتحكم فيها.


فلو شايف إنك بتميل للحاجات الكيوت معناه إنها بتقدر تأثر عليك وعلى مخك بشكل إيجابي فحاول تستغل النقطة دي في إنك تحافظ على مشاعر اللي حواليك وماتجيش على حد أضعف منك.