اعرف عن عقلية النجاح والاستمرارية اللي بيمتلكها الناجحين

الأيام دي شوفنا في الأولمبياد نجاح كبير لأشخاص رياضيين ومن ضمنهم البطل المصري “أحمد الجندي” اللي نجح في إنه  يحصل على الذهبية الأولى لمصر في أولمبياد باريس ده غير إنه حصل على أول فضية في تاريح مصر في الخماسي الحديث وقت أولمبياد طوكيو 2020.. وكمان بطلتنا “سارة سمير” اللي حصلت على فضية في رفع الأثقال في أولمبياد باريس وشرفتنا وكانت حصلت قبل كده على ميدالية برونزية في أولمبياد ريو دي جانيرو 2016.. ده غير الرياضيين الأجانب زي المصارع الروماني “ميجان لوبيز ” البطل الاولمبي الوحيد اللي كسب 5 ميداليات دهبية في 5 أولمبياد متتالية من أول أولمبياد بكين 2008 ولحد أولمبياد باريس 2024.. وبقى أول رياضي يحصل على العدد ده من الميداليات لكنه أعلن اعتزاله بعد ما فاز بذهبية باريس.. ده غير لاعبة الجمباز الأمريكية “سيمون بايلز” اللي قدرت تحصل على ميداليتها الدهبية الأولمبية السابعة في أولمبياد باريس السنة دي بعد انساحابها من أولمبياد طوكيو بسبب معاناتها من الالتواءات”بتحصل للاعبي الجمباز خلال لعبهم إنهم يحسوا إن جسمهم مش قادر يترجم اللي عقلهم بيطلبوا”وكانت سيمون كسبت 4 ذهبيات وبرونزية في أولمبياد ريو 2016.. وحصلت على 3 ذهبيات وفضية في أولمبياد باريس.. فهل كل الناس دي بيكون عندها حظ ولا بيفكروا بطريقة مختلفة بس!

ووفقًا لموقع جامعة بوسطن ووفقًا لموقع hintsa . .. الرياضيين مش بس بيحتاجوا مجهود بدني لا كمان بيحتاجوا يكون عندهم حالة عقلية وذهنية كويسة عشان يكونوا فعلا مميزين في مجالهم.. والبطل محمد علي قال:”لا يُصنع الأبطال في صالة الألعاب الرياضية. الأبطال يُصنعون من شيء عميق بداخلهم – رغبة، حلم، رؤية”

وقال “توم برادي” الفايز ببطولة السوبر بول الأمريكية سبع مرات “أن القوة الذهنية هي ما يفصل بين الفوز والخسارة. لكن ماهيتها وكيف يمكنك تنميتها أكثر تعقيدًا بعض الشيء – ولكنها أيضًا رائعة!”
وده بيأكد إن النجاح بيجي من جوة ومن العقلية الداخلية.. ومن ضمن المفاهيم المتعلقة بالرياضة مفهوم  mental strength أو مفهوم القوة الذهنية  وعلم النفس الحديث بيناقش فيه هل القوة الذهنية حالة ذهنية بيمر بيها الأشخاص ولا مجموعة من الخصائص و حسب تعريفها هي “مجموعة من القيم والمواقف والعواطف والمعارف بيمتلكها الشخص وبتأثر على إزاي بيتعامل مع الأحداث اللي حواليه لتحقيق الأهداف باستمرار “

وفي الرياضة القوة العقلية بتكون من خلال القدرة على السيطرة على القلق والتوتر ومنع التشتت ومن أهم الحاجات اللي الأبطال المفروض يعملوها هي :

1- الثقة بالنفس بس مش الغرور:
أغلب الرياضيين في بداياتهم بيكون عندهم ثقة قليلة بنفسهم وخوف مهما كان مستواهم في اللعبة مميز.. عشان كده لازم يتعلموا يخلقوا بيئة تساعدهم يثقوا في نفسهم ويأمنوا بيها وده هو أساس فوزهم ونجاحهم المستقبلي.. بس نبعد عن الغرور عشان هيقلل احتمالية تعلمنا وتركيزنا وممكن يضيع مننا حاجات كتير.

2-التعافي من الفشل والتعامل معاه:
بعد ما يثق الرياضي في نفسه بيكون لازم يتعلم يتكلم مع نفسه ويعرف إزاي مايفضلش في فكرة الفشل ويرمي الأفكار السلبية من دماغه زي إنه ضيع فرصة عشان يفضل مركز ويفضل أدائه عالي مهما مر بصعوبات.. وكمان يفصل بين اللي بيحصل ويعرف يتعامل مع الضغوطات صح ويفضل هادي أكبر قدر ممكن وكمان تعرف تقوم نفسك من جديد.

3-التركيز على العملية كلها:
التركيز على الفوز بس مش هايضمنلك الفوز بالعكش ممكن يوقعك.. لكن التركيز على العملية كلها أو الجيم كله هيخليك تعرف تحدد عملت إيه صح وعملت إيه غلط عشان تقدر تتعلم منه وتعرف هتعمل إيه بعدين.. لأن ممكن تبدأ ناجح جدا بس تفكيرك في الفوز غالبا هيوديك للخسارة عشان هيشتتك.


في الأخر لازم تعرف إنها مهارات ممكن تتعلمها وتستفاد منها أي وقت وهتساعدك تكون رياضي أفضل وشخص ناجح في حياتك في المطلق فحاول تطبقها على قد ما تقدر.