8 علامات إن شريك حياتك داعم حقيقي ليك
في الفترة الأخيرة بقينا ننبهر لما نلاقي حد بيدعم شريك حياته وبيفتخر بيه وكأنها بقت حاجة نادرة تستحق إننا نحتفي بيها .. والدعم مابيبقاش في النجاح والأوقات السعيدة بس.. لا الدعم كمان بيبقى في الأوقات الصعبة كمان زي الأزمات والمرض مثلا..
بس إزاي أصلا تعرف إذا كان شريك حياتك بيدعمك ولالا.. في الموضوع ده هنقولك علامات تعرفك ده وفقًا لموقع Bustle
دكتورة علم النفس “دانييل فورشي” بتقول إن وجود دعم نفسي وعاطفي في العلاقات هو أساس تماسكها وهو اللي بيمثل مستوى التعلق والحب والرعاية بين الشريكين.. وبيساعد على إن الشريك يكون مستقر.. ووقت ما بيختفي الدعم من العلاقة بتكون معرضة للفشل في أي وقت!.
ودي شوية صفات تعرف منها الشريك الداعم:
1-عمره ما بيخذلك: بتكون أنت من أولويات شريكك.. وبيكون أول واحد جنبك في المناسبات المهمة السعيدة زي النجاح والترقيات والاحتفالات والمناسبات الحزينة كمان زي المرض والأوقات الحزينة.. من الأخر هتلاقيه دايمًا جمهورك الوحيد وأكتر حد فرحان لك مع أهلك!
2- بيكون سعيد من قلبه عشانك: بيكون مبسوط لنجاحك أكتر منك وعايزك تعلى أكتر وأكتر.. ومابيقفش قصاد أي فرصة ممكن تخليك أحسن في كاريرك وحياتك.
3- هتلاقيه مهتم بتفاصيلك: أي حاجة عايز تعملها مهما كانت صغيرة أو كبيرة هتلاقيه بيفكرك بيها وبيشجعك تعملها وبيسأل كل شوية عملتها ولا لأ.
4- مابيقللش من مشاعرك وبيحترمها: لازم شريكك يكون مصدق مشاعرك ومايحاولش يحسسك إنها مالهاش أهمية ولازم يبذل كل مجهوده عشان يفهمك أو من خلال إنه يفضل جنبك لو محتاجه معاك في الوقت ده.
5- مستمع كويس: هتلاقيه مركز مع كلامك وعايز يوصل معاك لنقطة تفاهم عشان تحلوا أي مشكلة ومابيحاولش يتهرب منها.
6- مابيخليش كل حاجة تدور حواليه بس: يعني من الأخر مابيقلبش الترابيزة عليك لما تكون متضايق أو عندك مشكلة أو يبدأ يقولك قد إيه مشاكله أكبر وأنت مكبر المواضيع.
7-بيحاول يسهل الحياة عليك: هتلاقيه دايمًا بيحاول يساعدك أو يجبلك حاجة تساعدك مهما كانت صغيرة بس هتفرق معاك زي إنه يوصلك أو يجبلك قهوة عشان تركز أو عشان بتحبها في المطلق.
8-مابيبقاش سلبي أو يحرجك: لما بيحصل موقف بتعبر فيه عن خططك وأحلامك مابيقللش منها أو يتريق ويحرجك لا بيبدأ يعلي منك ومن اللي بتعمله.
وطبعًا لو شريك حياتك مش داعم ومابيعملش الحاجات دي مش محتاجين نقولك إن ده أكبر red flag ولازم تهرب حالًا!
