ليه محتاج تقوم تبص من البلكونة أو الشباك في الشغل شوية؟

أيام كتير بتصحى من النوم بيبقى نفسك بس تقعد تشرب كوباية قهوة ولا شاي في البلكونة الأول وبعدين تنزل أو تقعد تتنح حتى لحد ما تفوق بس تشوف الشمس وتشم شوية هوا في الولا حاجة.. وأوقات تانية تبقى عايز تقعد مع شخص بتحبه بس قعدة في البلكونة هادية بليل وتتكلموا أو ماتتكلموش خالص.

ساعات البلكونة أو الشباك بيبقوا مش مجرد مدخل هوا وشمس بس في يومنا أو مكان بنبص منه على اللي رايح واللي جاي وخناقات الشارع أغلب الوقت بيبقى ليهم فايدة أكتر من كده خصوصا لو أنت مضغوط ويومك مابيمرش بأحداث هادية.. ولما دورنا شوية لقينا إن أهم بلكونة أو شباك في يومك هم بتوع الشغل.

وده عشان لما بتقوم من على الشغل وتقف شوية في البلكونة تبص في اللاشئ هتلاقي نفسك بتفصل وتهدى وتشحن عشان تكمل شغل تاني، اه هي حركة ممكن تحسسك بالذنب أو تسمعك كلمتين من مديرك عشان أنت بتضيع الوقت من غير ما بتعمل حاجة مفيدة، بس بلاش تحس بالذنب لإن دي واحدة من أحسن الطرق اللي بتساعد عقلك يشتغل أحسن سواء في الشغل أو في الحياة عشان بتقدر تنتج أفكار جديدة أو بتحل مشاكل أو بتقلل ضغط الشغل من عليك وعموما زي ما كلنا عارفين إنك لو مارست الولا حاجة هتبقى هتحس إنك أحسن.

طيب برضه إيه أهمية الوقفة في البلكونة والبص من الشباك في الشغل في اللاشئ كده.. تعالى نقولك هم ليه مهمين كده حسب ما قال موقع “Metro” في أحد مقالاته: 

بيخلي مخك يسرح:

المجتمع اللي مهووس بالإنتاجية مش بيقدر “اللي ما بيعملش حاجة”، لكن الفلاسفة بيتأملوا في قيمتها من قرون. أفلاطون اقترح إن الأفكار جوا دماغنا زي الطيور اللي بتطير في قفص، محتاجين لحظات من الهدوء عشان الطيور تستقر، وأفكارنا تطلع.

لما تبص من الشباك مش بتبص على اللي بيحصل برا، بس بتستكشف اللي بيحصل جوا دماغك.

الكاتبة ماريسا بير بتقول: الفيلسوف “زوانغزي” كان بيسمي البص في الفراغ صيام العقل. السرحان أو البص في الفراغ ممكن يبقى مفيد جدًا، عشان بيسمح لينا نهرب من دماغنا الزحمة، وده بيخلق مساحة نلاقي فيها إجابات، ويدينا نظرة أعمق على نفسنا ويحررنا من إننا لازم نبقى دايمًا شغالين.

ماريسا بتقول إننا بنحس بالذنب لما نبص من الشباك، يمكن عشان نفتكر لما كانوا بيزعقولنا وإحنا صغيرين في المدرسة أو حتى في البيت، لكن المخترعين والعباقرة زي أينشتاين كانوا بينسبوا لحظات “لقيتها!” للسرحان. وكمان بتضيف: “اليابانيين إن عندهم كلمة مخصوصة لفن السرحان وهي “بوكيتو”ومعناها إنها نوع من التأمل المصغر.

والدكتورة “ساندمان” محاضرة علم النفس في جامعة سنترال لانكشاير ومؤلفة كتاب “علم الملل”، بتقول : لما بنبص من الشباك، بنختبر مستويات منخفضة من التحفيز. فبنبدأ نبص جوا نفسنا عشان نزود التحفيز العصبي ونتفادى الإحساس المزعج بالملل.

وغالبًأ أصلا بنسرح كتير وإحنا مش واخدين بالنا وبنعمل كده أكتر ما أحنا فاكرين.. الباحثين في جامعة “دارتموث” لقوا إننا بنقضي ما بين 30-50% من وقتنا واحنا صاحيين في السرحان، ويمكن ده يبان كأنه وقت ضايع، لكن دراسة على مفهوم “تجول العقل” من جامعة يورك وجامعة كاليفورنيا لقوا إن 40% من الأفكار الإبداعية بتحصل لما المشاركين بيكونوا في أنشطة بتسمح لمخهم يسرح.

ده غير إنه شباك للرفاهية: 

لو يوم شغلك كان متعب، فشباك مكتبك ممكن يكون بوابة لحالة ذهنية أهدأ.. وده ببساطة بالنظر للسماء.. فيه دراسة بثبت إن السماء ليها تأثير على رفاهيتنا، والدراسة دي ألفها عالم النفس والمدرب “بول كونواي” من شركة “سكسيزفل هيومنز”. العالم ده أبحاثه لقت إن البص  المتعمد في السماء ممكن يكون ليه تأثير إيجابي فورًأ على حالتنا الذهنية حتى لو لوقت قصير.

ووصفه وقال إنه كأنه زرار “ريستارت” ليومك.. وقال إنه مش هيخلي الاجتماع الصعب يختفي بس هيديك فرصة إنك تاخد نفسك، لأنه حل بيهدي فورًا وهو شكل فعال جدًا من أشكال التنظيم الذاتي العاطفي.. 

وقال في الدراسة دي إن التحديق المركز في السماء مع التنفس العميق كمان بيشجع إحساس أكبر بالترابط، وبيخلينا نشوف نفسنا جزء من الصورة الكبيرة ده بيساعدنا نشوف المشاكل من زاوية جديدة ويدينا المساحة العقلية للابتكار.. خصوصا إن السماء مساحة كبيرة، فبتحس بإحساس من التوازن والشعور بإنك جزء من حاجة أكبر من نفسك.

طيب هل لازم السماء تكون صافية وزرقا عشان نستفيد؟ لحسن الحظ لا مش لازم، وحتى لو السما فيها غيوم كتير وحركة للسحب بيقول “بول” إن اسمها “الطقس العاطفي” وهي فرصة عشان تتأمل مشاعرك في اللحظة دي.

وقال “بول” شوية نصايح عشان تقلل توتر الشغل لو هتقعد في البلكونة وتتنح في السماء:

1- اختار أحسن مكان عشان تشوف السماء عشان كل ما شوفت السماء أكبر كل ما كانت الفايدة أكبر

2- ارفع عينك وخد نفسين عميقين من مناخيرك وطلعهم من بوقك.

3- لاحظ السماء وأنت بتلاحظ أي أفكار أو مشاعر داخلية، وسيبها تمر زي السحب.

4- خلص النفسين العميقين ووقف وركز ولاحظ مشاعرك وحاسس إيه بشكل مختلف.

5- حاول تبص للسماء لمدة 60 ثانية على الأقل ولو مش قادر تلاقي 60 ثانية في يومك، كده ممكن يكون عندك مشاكل شغل أكبر مش هتتحل بس بالسماء.