ترشيحات لمجموعة كتب من أدب الرسائل

النهاردة اليوم العالمي لكتابة الرسائل.. عشان كده جمعنالكوا مجموعة ترشيحات لكتب من أدب الرسائل.. هتخليك تروح معاها في عالم تاني خالص خاصة لمحبي الرسايل القديمة والنوستالجيا هتحس إنك اتنقلت من مكانك لرحلة ذكريات مع كل كاتب هتقرأله.

1-رسائل إلى ميلينا
الكتاب للمؤلف “فرانز كافكا” وفيه مراسلات بينه وبين حبيبته “ميلينا” اللي بدأت علاقتهم  برسايل عملية وبعد كده اتطورت لرسايل حب وشغف بينهم.. فلو ليك في الرومانسية هتحب الكتاب أوي!

2- رسائل غسان كنفاني إلى غادة السمان
نشرت الكاتبة “غادة السمان” الكتاب ده بعد وفاة الكاتب الفلسطيني الشهير “غسان كنفاني” وجمعت فيه كل رسايله ليها وأشعاره اللي كتبها ليها مخصوص.. وبنشوف في الكتاب جانب مختلف خالص لغسان كنفاني اللي اتعودنا عليه مناضل للقضية الفلسطينية لكن بنشوف الجانب التاني منه كمحب في الكتاب ده.



3-رسائل مي صفحات وعبرات من أدب مي الخالد
الكتاب عبارة عن مجموعة من الرسايل اللي كتبتها الكاتبة الكبيرة اللبنانية الفلسطينية “مي زيادة” لأشخاص مختلفة وبنعرف من خلال كتير عن أراء مي وشخصيتها ومدى مكانتها في المجتمع الوقت ده من خلال محادثتها في الكتاب.

4- مراسلات غوركي وتشيخوف
لمحبي الأدب والكتابة ده هيكون كتاب مهم جدا لمحادثات أتنين من كبار الكتاب الروسيين والعالميين وهما “مكسيم جوركي” و”أنطوان تشيخوف” وكانوا بيتناقشوا فيها في كتابات بعضهم.. وبينصح تشيخوف فيه نصايح لجوركي بتدل على مدى تواضعه ككاتب كبير وقتها.

5-خطابات محمد خان إلى سعيد الشيمي
الكتاب ده بقى مفاجئة لعشاق السينما والإخراج هتعرف فيه معلومات كبيرة أوي عن السينما زمان وعن الإخراج من رؤية المخرج الكبير “محمد خان” وهو بيحكيها لصديقه مدير التصوير “سعيد الشيمي” والكتاب ليه كذا جزء يعني لو عجبك تقدر تقرأ باقي أجزائه وتستمتع أكتر بيهم.

6- رسائل إلى فيرا
الكتاب ده لمحبي الواقعية والرومانسية لأنه بيتناول رسايل الكاتب “فلاديمير نابوكوف” لزوجته وهو صاحب رواية “لوليتا”.. وبيحكي الكاتب كل حاجة لزوجته وآرائه السياسية والأدبية وكل حاجة ممكن تحب تعرفها عنه.

وماتنساش لو لو قريت كتاب من دول قولنا إيه أكتر كتاب فيهم عجبك