إزاي تفصل من أي حاجة مضايقاك في يوم الجمعة وتستمتع بالويك إند

يوم الجمعة اللي كلنا بنبقى عايزين نفصل فيه ساعات بيبقى يوم عبارة عن نوم وأكل وخناق بس وده بيبقى عشان بنسيب نفسنا الموجة تاخدنا وتودينا كده عادي من غير ما يبقى عندنا خطط، مع إننا بنبقى متوقعين إننا نفصل في اليوم ده من أي مشاكل عدينا بيها في الأسبوع اللي فات ونستمتع ونفصل شوية قبل دوشة الأسبوع الجديد

بس لو انت من النوع اللي ساعات بيحس إنه لسه مضغوط أو مش قادر يفصل، تعال نقولك شوية حاجات ممكن تعملها عشان تستمتع بالجمعة وتدخل الويك إند بشحنة طاقة جديدة حسب ما قال موقع “Verywell Mind” وموقع “Psychology Today”: 

1- ابدأ يومك بفطار جامد وعِش الدور:

أول حاجة، مفيش داعي تبدأ يومك بشكل روتيني، انزل افطر في أي مكان أو جهز لنفسك فطار حلو حتى لو بعيد عن الفول والطعمية المهم إنك تبدأ اليوم بحاجة بتفتح النفس وتخليك في موود كويس

2- انزل غير جو وشوف صحابك:

الجمعة دي اليوم المثالي إنك تشوف أصحابك اللي ممكن يكونوا مختفيين طول الأسبوع بسبب الشغل. روحوا كافيه جديد، العبوا بلايستيشن. اعملوا أي حاجة  بس خلي اليوم يبقى فيه أي حاجة مسلية عشان تفصل من اللي مضايقك شوية

3- اعمل أي حاجة تدلع بيها نفسك:

أي حاجة فيها اهتمام بنفسك أو بجسمك أو بشكلك تعتبر دلع أو حتى لو معاك فلوس ولسه قابض انزل بقى اشتري هدوم جديدة أو أي حاجة جديدة عشان الحاجات دي بتفرق فعلا

4- الرياضة مش بس للجسم، دي للعقل برضه:

مفيش حاجة بترفع حالتك النفسية قد الرياضة، لو مش حابب تلعب رياضة تقيلة، جرب حاجات بسيطة زي اليوجا أو تمارين خفيفة. ولو أنت من الناس اللي بتحب تطلع طاقة، انزل الجيم أو جرب تمرين جديد زي الملاكمة أو الرقص!

5- ادخل سينما أو اعمل موفي نايت:

لو أنت من النوع اللي بيحب الأفلام، اقعد واسترخي واعمل شوية فشار أو هات مقرمشات وقضيها أفلام قديم على جديد على عربي على أجنبي ونوع بقى بين كوميدي وأكشن واي حاجة عادي بس ماتبقاش دراما ونكد أنت مش ناقص خد بالك أنت عايز تفك من اللي حصلك طول الأسبوع.

6- حاول تبعد عن السوشيال ميديا لو ساعة حتى:

جرب إنك تبعد شوية عن السوشيال ميديا والضغوطات بتاعتها. مش كل حاجة لازم نكون متابعينها طول الوقت، خليك في اللحظة واستمتع بيومك من غير ما تفضل تقلب في الفيسبوك أو إنستجرام.

7- اختم يومك بحاجة مختلفة

في نهاية اليوم، اعمل حاجة مبتعملهاش كل أسبوع، سواء الخروج لعشاء في مطعم جديد أو التمشية في مكان هادي، المهم إنك تنهي الجمعة بحاجة تخليك سعيد ومتجدد، وتحس إنك استمتعت بكل لحظة.

في الآخر، الجمعة ده يومك انت، افصل واتبسط وخلي الأسبوع الجديد ييجي وأنت في أعلى مستوى من الراحة والطاقة الجديدة عشان تعرف تظبط نفسك في الشغل.