9 أماكن للسياحة السوداء في مصر
مصر معروف عنها إنها من أكبر وجهات السياحة في العالم العربي.. ومعروف عن مصر وجود أنواع كتيرة من الثقافة أولها السياحة الثقافية والأثار المصرية القديمة زي الأهرامات اللي الناس بتجيلها مخصوص من مختلف البلاد حوالين العالم.. وكمان وجود نوع تاني من السياحة زي السياحة الدينية والشاطئية وغيرهم كتير.. بس عمرك كنت تعرف عن وجود السياحة السوداء في مصر؟.. وإيه هي أصلا السياحة السوداء؟
وفقا لبحث اتعمل في جامعة حلوان لكلية السياحة والفنادق دي شوية معلومات عن السياحة السوداء وأنواعها..
السياحة السوداء: هي السياحة المرتبطة بزيارة أماكن مرتبطة تاريخيًا بالمآسي أو الجرايم أو الموت أوأي حاجة حزينة كده من الأخر باين من اسمها..
وفي منها أنواع كتير زي: سياحة الحرب والكوارث وسياحة الجريمة وسياحة الرعب والأماكن المسكونة وكمان سياحة القبور.. ولو عايز تشوف شرح أكتر ليهم ممكن تشوف اللينك ده
ودي شوية معلومات عن مناطق فيها سياحة سوداء في جميع أنحاء مصر
1- جبل “الإنجليز” في الواحات البحرية:
والمكان شهد العمليات الحربية اللي حصلت خلال الحرب العالمية الأولى في عصر الكابتن ويليام الإنجليزي اللي كان متمركز في الحتة دي وقت الحرب والاحتلال للواحة..
.وكان في مبنى مراقبة القوات السنوسية اللي كانت بتهاجم الواحة وقتها
2-متحف المنصورة القومي
والمتحف ده شاهد على مقاومة المصريين ضد الفرنسيين اللي احتلوا مصر بقيادة الملك لويس التاسع سنة 1249م.. وكان المتحف بيت لـ “فخر الدين القاضي” اللي كان وقتها القاضي الأساسي في مصر.. والمتحف فيه صور للويس التاسع و تماثيل وبعض وبيضم 46 قطعة من أهمها بعض الأسلحة وملابس الحرب الخاصة بالموقعة.
3-المقبرة المرمرية في إسكندرية:
واتسمت بالاسم ده لأن الرخام مكون من مادة الألباستر (المرمر).. والمؤرخين بيعتقدوا إنها من المقابر الملكية المملوكة للإسكندر الأكبر.
4-مقابر العلمين:
وفيها مقابر ألمانية ومقابر إيطالية للجنود اللي ماتوا وقت الحرب العالمية التانية في معركة العلمين.. وكمان بيضم مقبرة تاريخية فيها 7367 من جنود وظباط بريطانيا ونيوزيلندا وأستراليا وجنوب أفريقيا وفرنسا وماليزيا والهند..وكمان اتكتب على المقابر أسماء 11945 من المفقودين فى الحرب.
5- تل الربع “منديس” في الدقهلية:
وكانت بتتسمى زمان المنطقة دي “عانيت” وبعد كده اتسمت “مندس” وكانت عاصمة الإقليم الـ 16 في مصر.. وبيرمز لها برمز السمكة “محت” ومن أهم
الآثار الموجودة فيها بقايا معبد بناه الملك “أحمس التانى”
6-صالة “كراكلا” في الإسكندرية
وفيها مجموعة من المقابر المنحوتة في الصخر ولما اكتشفوه كان فيه بواقي عظام لبني أدمين وخيول.. وده لأن حصل فيها أكبر المدابح سنة 215م لما عمل الإمبراطور الروماني “كراكلا” مدبحة كبيرة انتقاماً من شباب إسكندرية بسبب سخريتهم منه.
7-متحف”دنشواي” في المنوفية
المتحف بيسجل ذكرى حادثة “دنشواى” اللي حصلت بين البريطانيين وأهل دنشواي وقت الاحتلال البريطاني لمصر.. وقتلوا الإنجليز فيها عدد من الفلاحين المصريين
والمتحف بيحتوي على صور ولوحات وتماثيل بتوصف الحادثة.
8-جبل البنات- سانت كاترين:
وهو جبل كبير ويقال إنه اتسمى كدة عشان في بعض بنات البادية هربوا من أهلهم عشان مايتجوزوش غصب وحدفوا نفسهم من الجبل واتسمى باسمهم من بعدها.
9- قبر البنت- دهب:
ويقال إن في أسطورة عن بنت كانت بتحب شاب ولكن أهلها موافقوش عليه فقررت إنها تنط من الجبل وماتت والشعاب المرجانية غطتها في البحر وبقى مكان يتزار ويتحكي فيه قصة البنت
ولسه مصر فيها أنواع كتيرة من السياحة ومناطق مختلفة مبهرة بس حبينا نقولك على الحاجات اللي ممكن تكون مش واخد بالك منها!
