8 حاجات محتاج تعرفها لو عايز تبقى نباتي
لو تعرف حد نباتي أو أنت بتفكر تعمل نظام غذائي نباتي فدي شوية
حاجات محتاج تعرفها عشان ماتعكش الدنيا وفقًا لموقع The Guardian وموقع shape
مبدأيًا كده لو أنت كنت مش نباتي طول حياتك وقررت فجأة تدخل النظام النباتي هيكون صعب عليك تعرف تبدأ منين عشان كده هنبسطهالك واحدة واحدة في الـ 8 حاجات الجاية.
1-إزاي تبدأ تبقى نباتي؟
في دكاترة بتفضل إنك تدخل فيه على طول ودكاترة تانيين بيفضلوا إنك تحول أكلك تدريجيًا وتبدل المنتجات الحيوانية بنباتية مع الوقت
عشان ماتزهقش وتقدر تتعود بسهولة.. فشوف إنت إيه أريح
واختار على حسب اللي يناسبك أكتر .
2-تتأكد منين إنك بتاخد بروتين كويس من أكلك؟
تقدر تاخد البروتين من الفاصوليا والبقوليات والمكسرات والعدس والحمص ومنتجات الصويا وزبدة الفول السوداني والكاجو والبذور زي بذور قرع العسل.. فاتأكد إنك تضيفهم لأكلك واعمل سيرش كويس أوي واتأكد من الأكل اللي بتاكله في بروتين يكفيك..وطبعا الـ protein powder هيبقى صديقك عشان يقويك بس اتأكد إنه يكون صحي وبتاخد منه جرعات مناسبة.
3–هتعمل إيه في الفيتامينات والمعادن؟
يعني مثلا فيتامين زي بـ 12 ده موجود بس في اللحوم والأسماك والبيض تاخده منين بقى؟ قدامك حلين يا تاخده مكمل غذائي.. ياتاخده من الأكل اللي بيحتوي على فيتامين بـ 12 زي بدائل الألبان وحبوب الفطار والزبدة الخالية من الألبان ومستخلص الخميرة.. طيب والكالسيوم لو مش هاخده فيتامين هلاقيه فين؟.. تقدر تلاقي الكالسيوم برضه في عيش الصويا وبذور الكتان المدعمة بالكالسيوم وكمان من لبن النباتات.
4-هتحس بشوية انتفاخ في الأول في جسمك:
في البداية الجسم بينتفخ عشان الخضار والفاكهة مليانين ألياف فبالتالي لما بتيجي تاكلهم جسمك الألياف فيه هتزيد.. لأن الجسم هياخد وقت على ما يقدر يتعامل مع كم الألياف اللي دخلته فجأة ولحد ما تقدر بكتيريا الأمعاء تعالج الألياف دي هتاخد وقت حوالي أسبوعين مثلا أو على حسب جسمك.
5–هتاكل كتير وهتجوع أسرع من الأول:
وده طبيعي لأن النباتات بتتهضم أسرع مش زي اللحوم بتاخد وقت.. عشان كده هتحس بالجوع أوقات كتير وكمان هتحتاج تاكل أكل في دهون نباتية أو بروتين نباتي عشان تشبعك فترات أطول.
6-هتبتدي تعرف إن عندك حساسية من شوية حاجات:
بعض الحاجات اللي هتاكلها ممكن تسببلك انتفاخ أو صداع وهتاخد وقت عشان تعرف هى إيه بالظبط وتقدر تشوفلها بدايل تانية.
7-هتتعلم حاجات كتير عن التغذية بشكل شامل:
لأن البروتين اللي كنت بتاخده من اللحمة والفراخ والأسماك مابقاش موجود فبالتالي هتبدأ تدور على سكة جديدة زي الطحينة والخميرة الغذائية والبطاطا الحلوة اللي بتساعد على الاحساس بالشبع.. ولبن الصويا وغيرهم كتير.. فده هيخلي عندك اختيارات كتير وهيخليك دايما عايز تعرف معلومات عن كل حاجة عشان تكتشف هتفيدك في إيه.
8–طيب هل فعلا النظام النباتي مكلف ولا ممكن تمشي الدنيا؟
هو مكلف لو اشتريت منتجات مصنعة.. فأنت حاول تبعد عن الأكل المصنع لأنه محتاج ميزانية كبيرة لو أنت قادر عليها تمام لكن لو مش هاتقدر عليها تقدر تعمل شوية حاجات تانية زي الأساسيات:الفاكهة والخضار والحبوب والمكسرات والفاصوليا وهتبقى كويس برضو مع الفيتامينات.
وماتنساش قبل ما تجرب أي نظام غذائي لازم تسأل دكتور مختص الأول وتتأكد إن جسمك بيستفاد منه كويس وماتعتمدش على معلوماتك من صحابك والنت بس!
