إزاي تبقى شخص لطيف وتعمل لنفسك حدود صحية برضه!

لما تبقى شخص لطيف وطيب ومابتعرفش ترفض الناس أو تضايقهم بتبقى محبوب “أو ممكن الناس تمثل عليك إنهم بيحبوك” وساعات بتبقى مبسوط من نفسك خصوصا إن كل الكلام اللي بتسمعه بعد التعامل بلطافة بيكون إيجابي بس العيب الخطير اللي في الموضوع ده هو إن الناس أوقات بتستغلك أو تتعدى على راحتك أو وقتك 

عشان كده مهم إنك تتعلم إزاي تكون لطيف وفي نفس الوقت تعرف تحمي نفسك وتحط حدود صحية ليك لإن اللطافة مش معناها إنك لازم توافق على كل حاجة أو ترضى بكل اللي بيحصل حواليك.. وعشان تحمي حدودك وتفضل لطيف وماتجيش على نفسك في نفس الوقت خلينا نقولك شوية نصايح زي ما قال موقع “Mind Tools” وموقع ” Verywell Mind” في أحد مقالاتهم”:

في الأول كده تعالى نقولك ليه فيه ناس كتير مابتعرفش تحط حدود لنفسها.. وأهم سبب ويمكن السبب الأساسي هو عدم  ثقتهم في نفسهم.. فمهم تعرف الأول قبل أي حاجة إزاي تبقى واثق في نفسك عشان ده هيساعدك في اللي هنقوله بعد كده:

1- ركّز على نجاحاتك: فكر في الحاجات اللي حققتها في حياتك، وخليك فخور بيها

2- اتمرن إنك تقول “لا”: كل ما تتمرن أكتر على إنك تحط حدود، هتبقى واثق في نفسك أكتر

3- اهتم براحتك النفسية: اعمل حاجات تخليك مرتاح نفسيًا.

طيب إزاي بقى تبقى لطيف وتحط حدود في نفس الوقت؟

1- خليك لطيف بس عندك موقف حازم: لما تيجي ترفض طلب، خلي كلامك مؤدب وواضح في نفس الوقت زي “معلش مش هقدر أعمل كده دلوقتي”

2- استخدم لغة جسدك: دايمًا لغة الجسد بتوصل رسالة.. فلو حاسس إن حد بيتجاوز اتكلم بلطف بس خلي جسمك يوصل إنك مش مرتاح زي إنك تبعد عنه مثلا

وهنا أنت لو ماتعودتش تحط لنفسك حدود أو تقول لا هتبقى مش عارف تقول لا إزاي بشكل لطيف وهادي.. فخلينا نقولك برضه فإزاي تقول “لا” بطريقة لطيفة؟

ودي شوية طرق تقول بيها “لأ” من غير ما تجرح حد:

1- خليك صريح وواضح: مش لازم تدي أعذار كتير، ممكن ببساطة تقول: “للأسف مش هقدر”

2- قدم بدائل لو تقدر: لو مش هتقدر تنفذ طلب، ممكن تقترح حاجة تانية: “مش هقدر دلوقتي، بس ممكن أساعدك بعدين”

3- حافظ على طريقة كلامك اللطيفة: استخدم كلمات زي “معلش” أو “للأسف” بتخلي رفضك يطلع بشكل أرقى

وخلي بالك إن الحدود الصحية اللي هتحطها دي بتحطها عشان تحمي نفسك من الاستغلال أو الإرهاق وهي اللي بتخلي الناس تحترم رغباتك ووقتك.. وعشان تحط الحدود الصحية من الأول قبل ما ترفض أو تقبل أي طلب أو حاجة من حد أنت محتاح تفكر في كام حاجة عشان يبقى ليك حدود واضحة قدام نفسك.. وده بيحصل عن طريق حاجتين وهم إنك تبقى عارف احتياجاتك زي إنك تبقى فاهم إيه اللي يريحك وإيه اللي لا، والحاجة التانية إنك تحدد أولوياتك وده بيحصل لما تحدد إيه أهم حاجة عندك سواء في شغلك أو حياتك الشخصية، وبالتالي حدودك هتبقى واضحة بناءً على الأساس ده.

وطبعا أنت لو ماكنتش بتحافظ على الحدود دي وسايبها كده وقررت تتغير احتمال كبير تسمع ردود أفعال سلبية.. فبلاش ترجع ورا وتعمل زي الأول فخلينا نقولك تتعامل إزاي مع ردود الأفعال السلبية دي:

1- خليك هادي: ماتردش بعصبية لو حد انتقد حدودك بالعكس خلي عندك ثقة في اللي بتعمله

2- كرر حدودك لو لزم الأمر: لو حد حاول يتعدى على حدودك تاني، كرر كلامك بلطف بس بإصرار.

وفي النهاية خلينا نفكرك إنك مهم تبقى شخص لطيف وياريت فعلا تبقى شخص محبوب وبتعرف ترضى الناس وتحببهم فيك.. بس الأهم من ده كله هو إنك تبقى شخص بيحترم نفسه وبيحافظ عليها وبيحافظ على طاقته ووقته ومجهوده وبيعرف يدي إيه لمين في الوقت المناسب ومفيش مشاكل برضه إنك تساعد الناس أو ترضيهم بس ده مايكونش على حسابك.