ليه أوقات بيكون السكوت هو الحل الوحيد؟

وقت المشاكل في حاجات كده الشخص اللي قدامك مش هيقدر يفهمها وأنت مش هتقدر تشرحهاله وبيكون أنسب حاجة إنك تسيبه يشيلها جواه وهو ساكت.. طبعًا ممكن ييجي وقت ويتكلم فيه أو في الأغلب هيفضل مش عارف يقولها.. فخلونا نشوف ليه أوقات السكوت بيكون هو الحل الوحيد؟

حسب مقالات كتير على مواقع زي Ideadpod و Pathwayprofessional و Goodnet

أول حاجة كشخص بيسكت لازم تبقى عارف إن “السكوت” نفسه لغة تعبير وده بيكون في الوقت اللي الكلام عاجز إنه يوصل الشعور اللي حاسس بيه.. فهنا أنت مش حابب تتكلم عشان الشعور هيوصل بنسبة أقل مش زي ما أنت حاسس بالظبط وبالتالي رد الفعل على المشكلة هيكون أقل منها وده مش هيرضيك بالعكس ممكن يزود شعورك بإنك متضايق.. ساعتها سكوتك هيكون بيوضع قد إيه الموضوع مأثر عليك وبالتالي بيمثل هنا “لغة تعبير” 

تاني حاجة إنه أوقات السكوت بيكون “حماية”.. طب من إيه بقى؟

أنت دلوقتي متفقين إنك مش هتقدر توصل الحاجة اللي حاسس بيها ولا اللي قدامك هيفهم ويقدر.. فالسكوت هو الحل عشان لو اتكلمت غالبًا الخناقة هتكبر وتزيد ومش هتستفاد حاجة بالعكس هتزعل أكتر وهنا هو مش حل أوي على قد ماهو “بيحميك” من إن الموضوع يكبر وماتقلقش مش هيتحسب استسلام بالعكس دي حاجة مايعملهاش غير شخص قوي!

تالت حاجة بـ 40 جنيه احترام ذات.. بص يا سيدي أوقات المشكلة بتحس فيها بإهانة أو قلة تقدير ليك وهو هنا هيكون أشبه بالصمت العقابي.. في نفس الوقت برضه إحساس الشفقة بيحوم حواليك كده فأنت مش عايز تحس إنك قللت من نفسك فبتكست لزوم احترام الذات وبتحافظ على قوتك الداخلية بمعنى إنك تتحلى بالثبات والاستقلال العاطفي وإن مافيش حد يأثر فيك ولو أثر مايبقاش بشكل كبير.

رابع حاجة بقى السكوت ساعات بيكون مساحة ليك كشخص متأثر بالمشكلة بإنك تفكر كويس وتقيم الحاجات برؤية عقلانية كده وده عشان تتجنب رد الفعل السريع أو القرارات المتهورة فتشوف هتاخد قرار إيه بدل ماتعمل حاجة وترجع تندم عليها أو تعمل حاجة تضيع حقك وتبقى خسرت كل حاجة 

خامس حاجة والأخيرة هي إن السكوت ده تواصل ضمني ومعناه إنك بتقول الحاجة وتوصل مشاعرك بـ سكوتك من غير كلام.. وده مش مع كل الناس لازم يكون مع الناس اللي بتفهمك كويس وقريبة منك.. بيتعمل من غير تواصل واتفاقات وتفسيره مش قلة تقدير ولا قلة احترام بالعكس ده معناه إنه فاهمك ومديك مساحتك وكل واحد بيبقى حاسس بالتاني وفاهمه وفي آخره كده بيظهر مؤشر أخضر للشخص اللي قدامك يكلمك أو أنت بتبادر وتروح تكلمه 

في النهاية الصمت أو السكوت ولا هو ضعف من اللي زعلان ولا هو قلة احترام وتجاهل من اللي عامل المشكلة بالعكس هو أوقات كتير أوي بيكون الحل الأنسب في مواقف معينة ولو اتطبق بشكل صح بتقدر من خلال كده تعدي الموضوع مهما كان حجمة وتأثيره وبيقربكم من بعض أكتر أو تستخدمه بشكل غلط وعلاقتكم تنتهي.. ليه لأ والعلم عند الله!