لو انت شاب من السكان الأصليين للفريندزون، وأول ما الدنيا ضحكتلك وارتبطت، فجأة لقيت بنات من اللي كنت معجب بيهم زمان، رجعوا يكلموك تاني، أو معاملة البنات كلها بقت ليك أحسن بعد ما ارتبطت، ولو إنتي بنت وفجأة حسيتي بندم على بُعد زميلك اللي حطتيه في الفريندزون وارتبط بعدها، ورجعتي تسألي نفسك أنا مديتوش فرصة ليه؟
اللي حصل ده ليه تفسير علمي وتحليل نفسي، مثبت بأبحاث ودراسات علمية اتعملت في أوقات وسنين مختلفة.. بعض أخصائيين علم النفس أكدوا إن أغلب الستات بيشوفوا الرجالة المتربطين أو المرغوب فيهم من الستات، جذابين أكتر، وإن الستات بيبصوا دايما لتفضيلات زميلاتهن من الستات التانيين، وده ببساطة لأن البشر عندهم ميل عام للتأثر بآراء الآخرين.
ده غير إن الراجل المتجوز بيبقى شكل حياته من برا مستقر وأمان لأنه كوّن أسرة وبيت خلاص، وده ممكن يبقى مغري للبنات اللي لسه مش عارفين مستقبلهم هيبقى عامل إزاي ومع مين.. وبيبقى فيه انطباع عن الراجل المتجوز إن عنده خبرة في العلاقات وبيعرف يتعامل مع مشاكلها، وده بيجذب الستات اللي بيدوروا على شخص خبير في العلاقات أو مش بيجرب فيهم.
وفي رأي تاني بيقول إن الستات بيهتموا بالراجل المرتبط بسبب العبارة الشهيرة اللي بتقول “إن كل الرجال الجيدين مرتبطين بالفعل “All the good guys are taken”.
فيا أخي العزيز متتغرش أوي ولا تفتكر نفسك سلالة نادرة مهددة بالإنقراض حاجة كده شبه آخر ذكر حيوان القندس في جزر القمر لأن ده مش حقيقي.
ويا أختي العزيزة مش معنى إن في ست تانية اختارته يبقى هو راجل مفيهوش عيب، ممكن الست دي تكون بتندم على اختيارها وبتلعن الساعة اللي اختارته فيها!
و في بديهيات في الدنيا زي إن الراجل (بالمعنى الحقيقي للكلمة) مابيتخطفش لأنه مش هاند باج، والراجل الحقيقي بيكون واثق من نفسه ومن اختياراته وبيحسس الست اللي معاه بالأمان.
وإن الست اللي بتقرر تدخل من باب موارب في علاقة بين شخصين وتستغل الجزء اللي ممكن يكون فاضي بينهم، فهي بتقلل من نظرتها لنفسها ومن اللي هي فعلاً تستحقه، والراجل اللي ساب واحدة وجالك ممكن يسيبك ويروح لواحدة تالتة عادي جداً بنفس الطريقة اللي جالك بيها يا ست الكل!
