إزاي المشاعر السلبية ممكن تأذي جسمك؟

كتير مننا سمع من أهله أو من أي حد كبير.. إن ماتحرقش دمك ولا تزعل عشان صحتك أو إن حد زعل جامد فحصله مشكلة صحية مفاجئة.. بس هل ممكن المشاعر فعلاً تأثر عالجسم للدرجة دي الحقيقة إنه آه.. المشاعر السلبية بتأثر على  الصحة عموماً، وكفاءة عمل بعض أعضاء الجسم خصوصاً، واللي منها 

1- الرئتين

الشعور بالحزن بيأثر على الرئتين.. وبيسبب أعراض زي صعوبة أو ضيق في التنفس.. وآلام في الصدر 

2- الكلى

في حالة الشعور بالخوف ممكن تحس إنك محتاج تدخل الحمام بمعدل أكتر من الطبيعي، لأن الخوف بيحط ضغط زيادة على الكليتين، وبالتالي بالوقت ممكن يأثر سلبيًا على صحة الكليتين

3- المعدة

وجع البطن اللي بعضنا بيحس بيه لما بيكون قلقان، ده لأن الشعور بالقلق بيسبب آلام المعدة ومشاكل في الهضم، والطحال كمان بيتأثر بشعور القلق وبتقل كفاءته

4- الكبد

الغضب والعصبية الزايدة بتسبب مشاكل زي عسر الهضم، الإسهال عند الستات واضطرابات الدورة الشهرية، وكتم الغضب وعدم التعبير عنه بتضعف الكبد وبتزود نسبة تعرضه للأمراض

المشاعر دي كلنا بنحس بيها وصعب نمنعها أو نتجنبها للأبد.. لأنها شر ولابد منه.. بس اللي نقدر نتحكم فيه هو حجم سيطرة وتأثير المشاعر دي علينا.. عشان الأذى والضرر اللي ممكن تسببه لينا عالمستوى النفسي والجسدي مدمر عالمدى البعيد.. فنلحقه من الأول عشان الصحة تستاهل وماتتعوضش!