إيه هي الـ eSIM اللي هتاخد مكان الـ Nano-SIM أو الخطوط العادية؟
كلنا عارفين شكل خطوط التليفون اللي اتطورت من أول Mini-SIM أو الخط الكامل وبعدها Micro-SIM حجم أصغر وبعدها آخر حاجة بنستخدمها دلوقتي وهي الـ Nano-SIM.. دلوقتي هيبقى مكانهم حاجة اسمها eSIM فعايزين نعرف إيه هي ومميزاتها إيه وبتشتغل إزاي؟
إيه هي شريحة eSIM؟
شريحة رقمية بتفعّل خدمات الاتصالات من خلال QR code بتعمله scan وده لو تليفونك مؤهل أو متاح فيه الخاصية دي بدل ما تستخدم الشريحة العادية اللي بتتركب وتتشال عشان تقدر تبدل بسهولة بين الشبكات وكمان هتحسن تجربة الاتصال بشكل عام
مميزاتها
1- التبديل بسهولة بين الشبكات:
تقدر تغير بسهولة وتتنقل من شبكة للتانية من غير حوارات كتير وخصوصًا للناس اللي بتسافر
2- تصميم أحسن للجهاز:
طالما مش هتبقى محتاج مكان في تليفونك للخط ده هيسهل إن المصنعين يطلعوا أجهزة أرق وكمان مقاومة أكتر للمياه
3- هتوفر وقت:
وقت الشراء لو حبيت تجيب خط جديد مش هتحتاج تروح بقى الفروع مخصوص عشان تطلع خط جديد.. الموضوع هيكون أسرع وأسهل
4- الأمان:
طالما الشريحة مدمجة في الجهاز هيبقى صعب تضيع منك أو حتى تتسرق فهيكون أمان أكتر
5- تقليل استخدام الموارد الطبيعية في التصنيع
ولو جهازك مابيدعمش خاصية eSIM دي فهو مستحيل يتعمل عليه.. بمعنى إنه لازم تكون موجودة في جهازك من أول ما اشتريته
وبالنسبة للآيفون هتخليك تقدر تستخدم حوالي 8 أرقام في نفس الجهاز
ومن الأجهزة اللي بتدعم الـ eSIM:
- أجهزة iPhone من أول 11 لحد أحدث حاجة وكمان أجهزة الـ XE و XS و SE
- وأجهزة سامسونج الحديثة ومنها S20 والإصدارات اللي بعدها
- أجهزة جوجل بيكسل من أول 4 لحد الإصدارات الحديثة بعده والـ A55 وسلسلة Galaxy Z
- والـ Smart watches النسخ الحديثة منها أبل وسامسونج
- أجهزة الـ iPad والـ Tab
- وأجهزة تانية كمان زي هواوي وشاومي وسوني وأوبو وهونر وبالأخص بتكون النسخ الحديثة من الأجهزة دي
بعض العيوب اللي فيها هي إنها هتكون صعبة الصيانة.. بمعنى أي مشكلة فيها هتحتاج وقت ومجهود شوية عشان تتصلح وكمان مش متوفرة في كل الأجهزة.. هيكون سهل تتنقل في نفس الجهاز بسرعة ولكن لما تحب تنقل من جهاز لجهاز أكيد هياخد وقت
في النهاية وبعد موافقة جهاز تنظيم الاتصالات حسب إكسترا نيوز على تطبيق الخدمة دي.. شركات الاتصالات بتستعد الفترة دي إنها تخلي الخاصية متاحة عندها عشان الناس تقدر تفعلها.. الأكيد إنها فعلًا ممكن توفر حاجات كتير وإجراءات كتير بتتعمل في الشريحة العادية لكن قولنا رأيك.. هل شايف إنها هتعمل فارق كبير فعلًا ومفيد ولا عادي؟
